Kay tiempopi llakiykuna kasqanrayku mana allintachu kausakunchej, aswan qhepaman imachus kananmantataj llakikunchej. ¿Llakiykunata runa chinkachinmanchu? Chaypajqa yachananchej tiyan maypichus qallarisqanta.

Chayta entiendenapaj Tom sutiyoj runamanta parlarina. Payqa onqoykuspa wañuporqa. Doctornenqa niraj Tom wañupushajtin nerqa: “Tom qallariypi nanaykunata sientesqantaqa mana pipis averiguarqachu imaraykuchus chay nanaykunata sientesqanta”, nispa. Tomtaqa qallariypi onqoyninmanta mana jamperqankuchu, ichá calmantesllata qorqanku nanayninta pisiyachinanpaj.

Kay tiempopi problemaswanpis kikillantaj kashan. Gobiernosqa suwasta chinkachinankupaj leyesta, camarasta churanku, policiastapis yapanku. Chaywan runasta yanapaspapis, mana yachankuchu imajtinchus astawan suwas mirasqankuta. Runastaj paykunallapaj imatapis munanku, sajras kanku, manakaj imaspitaj yuyanku.

Danielmanta parlarina. Payqa Sudamericamanta ujnin suyupi tiyakun. Chaypeqa pisi qolqe tiyan. Pay nin: “Ñaupajtaqa mana ancha suwas kajchu, nitaj manchachikojchu kayku. Kunanrí niña maypipis kausayta atikunchu. Qolqe pisiyasqanrayku runasqa astawan paykunallapaj imatapis munanku. Chayraykutaj pitapis wañurpachillanku, cosasninkutapis japʼikapullanku”, nispa.

Uj runaqa uj suyumanta chʼajwas kasqanrayku ayqekorqa. Aswan qhepamantaj Bibliata estudiarqa. Pay nin: “Llajtaypeqa ashkha familias, políticos, iglesiasmanta kajkuna ima, jovenesta tanqaj kanku guerrasman rinankupaj. Jinamantataj jatunchasqa kanankupaj. Llajtaywan japʼinakoj llajtaspis, kikillantataj ruwarqanku. Chaymantapacha niña gobiernospi confiarqanichu”, nispa.

Biblia nin:

• “Runaqa wawamantapacha mana allin kajllata yuyan” (Génesis 8:21).

• “Tukuy imamanta nisqaqa runaj sonqonmin aswan chʼawka, nitaj chaypaj jampi kanchu. Pitaj chayta entiendeyta atinmanri?” (Jeremías 17:9).

• “Runaspa sonqonmantaqa llojsimun sajra yuyaykuna. Chayrayku runata wañuchinku, qhenchachakunku, khuchichakuspa juchachakunku, suwakunku, llullakunku, sajratataj rimanku” (Mateo 15:19).

Ñaupaj yachaqanapi rikorqanchej jina, runas sajra ruwaykunata chinkachinankumantaqa, aswan sajrasman tukushanku. (2 Timoteo 3:1-5). Kay tiempopi tukuy imata yachaspapis, celularnejta, Internetnejta karu lugaresman wajyayta atispapis nipuni problemasta allinchayta atinchejchu. ¿Imaraykú mana chayta ruwayta atinchejchu? ¿Mana atisqanchejtachu ruwayta munashanchej? ¿Qhasillatachu kallpachakushanchej?

Kay mundomanta sajra ruwaykuna chinkajtinpis, chʼampaykunaqa kallanqapuni. Imajtinchus runaqa mana tukuy imatapunichu ruwayta atin.

Bibliaqa nin: ‘Runaqa kausayninpi imatachus ruwananta mana niyta atinchu’, nispa (Jeremías 10:23). Biblia nin jinapuni, runaqa mana noqanchejpura kamachinakunapajchu ruwasqa kashanchej. Imaynatachus cielopi nitaj yaku ukhupi kausayta atinchejchu, ajinallatataj mana kamachinakuyta atinchejchu.

 Kaypi piensarina. Runasqa mana munankuchu ninankuta, imaynatachus kausakunankuta, imatatajchus ruwanankuta. Wakin runasqa ninku wawata orqhochikuy allillan kasqanta, wakintaj ninku mana allinchu kasqanta. Chantá uj runata juchanmanta wañuchisqa kananta nikojtin, wakenqa ninku chayqa allin kasqanta, wakintaj mana allinchu kasqanta. Wakintaj imaynatachus wawasta uywanamanta yuyaychaykunata japʼikunku, wakintaj ni imata yuyaychachikuyta munankuchu. Tukuy chay imastaj runasta astawan chʼajwaspi rikhurichin. Jinapis Bibliaj nisqanman jina kausakoyqa allinninchejpaj. Imaraykuchus runasqa mana noqanchejpura kamachinakunapajchu ruwasqa kanchej. Ajina kajtin, ¿pitaj yanapawasunman?

Dioslla yanapawasunman, imajtinchus pay ruwawarqanchej. Wakin runasqa piensanku Dios noqanchejmanta qonqapusqanta. Jinapis Diosqa ni jaykʼaj noqanchejmanta qonqapunchu. Bibliapi sumaj yuyaychaykunata churapuwasqanchejqa, sutʼita rikuchiwanchej Dios mayta noqanchejmanta llakikusqanta. Bibliamanta sumajta yachakoyqa yanapawanchej juchasapas kasqanchejta, imasllatatajchus ruwayta atisqanchejta entiendenapaj. Chantá yanapallawanchejtaj imaraykuchus unaymantapachaña runa llakiypi kausashasqanta entiendenapaj. Alemaniamanta uj runa nerqa: “Ashkha runas, gobiernos imaqa yachanku imaschus ñaupa tiempopi pasasqanta, runasta ñakʼarichisqanta ima. Chayta yachaspapis kikillanpuni kashanku, nitaj ni imata yachakorqankuchu”, nispa.

Biblia nin: “Uj runaj yachaynenqa cheqan kajta ruwasqanpi yachakun”, nispa (Lucas 7:35). Salmo 146:3 nin: “Kamachej runaspeqa ama atienekuychejchu; ama atienekuychejchu runasllapi”, nispa. Kay versiculoqa yanapawanchej kamachejkunaj nisqankupi mana atienekunapaj. Kennethmanta parlarina. Payqa Norteamericapi tiyakun, chaypeqa manchay suwa tiyan. Pay nin: “Politicosqa tukuy imata allinchanankuta ninku, nitaj allinchankuchu. Chaytaj rikuchin Bibliaj nisqanqa cheqapuni kasqanta”, nispa.

Daniel nin: “Sapa día astawan sutʼita yachani ni pí allinta gobernayta atisqanta. Bancopi qolqeta tantakuy, chayri sumaj jubilacionniyoj kayqa, mana garantizawanchejchu machuyaspa kusisqa kausakunapaj. Ashkha runasta rikorqani ajinata ruwaspa llakiyllapi kausakusqankuta”, nispa.

Bibliaqa yanapawanchej mana qhasi manakaj imaspi yuyanapaj, astawanpis uj suyakuyniyoj kasqanchejta niwanchej. Chaymantataj qhepan yachaqanaspi yachakusun.