LECCIÓN 50
Familiaykiwan kusisqa kausakuy (2 kaj)
Wawasqa Jehovamanta uj regalo kanku. Chayrayku Jehovaqa munan tatas wawasninkuta sumajta cuidanankuta. Bibliapeqa tataspaj, wawaspajpis ashkha yuyaychaykuna tiyan, familiapi kusisqa kausakunankupaj.
1. ¿Imatataj Jehová tatasman kamachin?
Jehovaqa suyan tatapis mamapis wawasninkuta munakunankuta, paykunapajtaj tiempochakunankuta. Chantapis munan sajra kajmanta cuidanankuta, Bibliaj nisqanman jinataj yachachinankuta (Proverbios 1:8). Jehovaqa familiamanta uma kajkunaman nin: “Paykunata uywaychej, Jehová Dios nisqanman jina [yachachispa]”, nispa (Efesios 6:4 leey). Jehová Diosqa mayta kusikun tatas wawasninkuta kamachisqanman jina uywajtinku, nitaj waj runasman uywanankupaj saqejtinku.
2. ¿Imatá Jehová wawasman kamachin?
Jehovaqa wawasman nin: “Tataykichejta, mamaykichejtawan tukuy imapi kasuychej”, nispa (Colosenses 3:20). Uj wawa tatasninta kasukun, respetantaj chayqa, tatanqa mayta kusikun, Jehovapis kusikullantaj (Proverbios 23:22-25). Jesusqa sumaj wawa karqa, mana pantaj runachu kaspapis tatasninta kasukoj, respetajtaj (Lucas 2:51, 52).
3. ¿Imatataj uj familia ruwanman Jehovaman astawan qayllaykunanpaj?
Tata chayri mama kanki chayqa, maytachá munashanki wawaykipis Jehovata munakunanta. Wawaykitaqa yanapawaj Bibliaj nisqanman jina ruwaspa. Biblia nin: “[Jehovaj nisqasninta] wawasniykichejman yachachiychej. Kay kamachiykunataqa paykunaman willaychejpuni, wasiykichejpi kashaspapis, ñanta purishaspapis”, nispa (Deuteronomio 6:7). Chaywan nishan kutin kutita wawasman ‘yachachina’ kasqanta. Wawasniykimanqa kutin kutitapunichá imatapis yuyarichinki. Jehovamanta yachachinaykipajpis, kutin kutita yachachinaykipaj tiempochakunayki tiyan. Chantapis may allin kanman tukuy familia tiempochakunaykichej, sapa semana Bibliata estudiaspa Diosta yupaychanaykichejpaj. Mana wawasniyoj kajtiykipis Bibliata sapa semana sapallaykimanta estudiayqa mayta yanapasonqa.
ASTAWAN YACHAKUNA
Kaypi yachakusun imatachus familias ruwanankuta kusisqa kausakunankupaj.
4. Wawasniykichejta munakuywan yachachiychej
Tatasqa wawasninkuman yachachiyta mana atillankuchu. Jinapis Biblia paykunata yanapanman. Santiago 1:19, 20 leeriychej, chantá yachakojta tapuriy:
-
¿Imastataj tatas mana ruwanankuchu kasqa wawasninkuwan parlashaspa?
-
¿Imaraykutaj mana allinchu uj tata phiñasqa kashaspa wawasninta kʼaminan? a
5. Wawasniykichejta cuidaychej
Tatasqa wawasninkuta cuidanankupaj sapa ujwan parlarinankupuni tiyan qhariwarmi jina puñuykuymanta, chaymanta parlayta pʼenqakojtinkupis. VIDEOTA qhawariychej, chantá yachakojta tapuriy:
-
¿Imaraykutaj tatas mana parlariyta atillankuchu qhariwarmi jina puñuykuymanta?
-
¿Imataj wakin tatasta yanapasqa wawasninkuwan qhariwarmi jina puñuykuymanta parlanankupaj?
Bibliapi nisqanman jina Satanaspa mundonqa astawan sajrayashan. 2 Timoteo 3:1, 13 leeriychej, chantá yachakojta tapuriy:
-
Wakin sajra runasqa wawasta abusanku. Chayrayku, ¿imaraykutaj tatas wawasninkuwan parlarinankupuni tiyan qhariwarmi jina puñuykuymanta? ¿Imatataj tatas ruwankuman wawasninkuta abusajkunamanta jarkʼanankupaj?
Astawan yachanaykipaj
Jehovaj testigosnenqa tataspaj ashkha yanapasta orqhonku, wawasninkuwan qhariwarmi jina puñuykuymanta parlarinankupaj, abusajkunamanta cuidanankupaj ima. Chaykunamanta wakin kashan:
-
Wawasniykichejta jarkʼaychej (video)
-
“¿Imaynatá wawaswan qhariwarmi puñuykuymanta parlawaq?” (Torremanta Qhawaj, 1 de enero de 2011)
6. Wawas, tatasniykichejta respetaychej
Wawasqa juchʼuyllaraj chayri jovenesña kaspapis tatasninkuta respetananku tiyan. Respetasqankutataj rikuchinkuman parlasqankupi. VIDEOTA qhawariychej, chantá yachakojta tapuriy.
-
¿Imaraykutaj wawas tatasninkuwan respetowanpuni parlarinanku tiyan?
-
¿Imaynatá wawas rikuchinkuman tatasninkuta respetasqankuta?
Proverbios 1:8 leeriychej, chantá yachakojta tapuriy:
-
¿Imatataj wawas ruwananku tiyan tatanpis chayri mamanpis yuyaychajtin?
7. Familiapi Diosta yupaychana
Jehovaj testigosnenqa sapa semana tiempochakunku familiapi Diosta yupaychanankupaj. Imaynatachus chayta ruwasqankuta yachanapaj VIDEOTA qhawariychej, chantá yachakojta tapuriy:
-
¿Imatataj familias ruwananku kasqa sapa semana familiapi Diosta yupaychanankupaj?
-
¿Imatataj tatas ruwankuman familiapi Diosta yupaychaywan tukuy familia gustachikunankupaj? (Kay leccionpa qallariyninpi rikhurej fotota qhawariy).
-
Qankunarí, ¿familiapi Diosta yupaychanaykichejpaj tantakuyta atillankichejchu?
Jehová Diosqa munarqa israelitas wawasninkuman Palabranmanta parlarinankutapuni. Deuteronomio 6:6, 7 leeriychej, chantá yachakojta tapuriy:
-
¿Imastataj tatas ruwananku kasqa? Qanrí, ¿kay nisqanman jina ruwayta atiwajchu?
Familiapi Diosta yupaychanapaj yuyaychaykuna
-
Tantakuykunapaj wakichikuychej.
-
Pejpa kausaynillanmantapis Bibliapi leeriychej, chantá chaymanta parlariychej.
-
Wawas juchʼuyllaraj kanku chayqa, Internetpi jw.org nisqapi paykunapaj yachaqanasta maskʼay. Chaytataj uraqachiwaj chayri imprimiwaj.
-
Wawas jovenesña kanku chayqa, paykunapaj jina yachaqanasta Internetpi jw.org nisqapi maskʼay.
-
Bibliamanta pejpa kausaynillanmantapis uj rikuchiyta ruwaychej.
-
Internetpi jw.org nisqapi uj videota qhawariychej, chaymantataj parlariychej.
WAKIN RUNAS NINKU: “Wawasqa Bibliamanta parlajtinchej mana entiendenkumanchu”, nispa.
-
¿Ajinachu kanman, imatá qan niwaj?
¿IMASTÁ YACHAKUNCHEJ?
Kaypi yachakunchej tatas wawasninkuta munakunanku, yachachinanku, cuidananku kasqanta, wawaspis tatasninkuta respetananku, kasukunanku kasqanta, tukuy familiataj Jehovata yupaychananku kasqanta.
Yuyarikunapaj
-
¿Imaynatá tatas wawasninkuta yachachinkuman, cuidankumantaj?
-
¿Imaynatá wawas tatasninkuta respetasqankuta rikuchinkuman?
-
¿Imaspitaj familiata yanapan sapa semana Bibliata estudiay?
ASTAWAN YACHAKUNAYKIPAJ
¿Imastá wawas yachakunanku tiyan allin runas kanankupaj? Chayta yachanaykipaj kayta leeriy.
“Wawayki 6 imasta yachakunan tiyan” (¡Rijchʼariy!, 2 kaj 2019)
¿Imaynatá wawas machitu tatasninkuta cuidankuman? Chayta yachanaykipaj kayta leeriy.
Uj runataqa Biblia yanaparqa sumaj tata kananpaj. Paymanta yachanaykipaj kay videota qhawariy.
Jehová Diosqa wawasniykuta uywanaykupaj yanapawarqayku (5:58)
¿Imaynatá tatas wawasninkuwan sumajta apanakunkuman? Chayta yachanaykipaj kayta leeriy.
a Bibliapi ‘kʼamiy’ palabraqa niyta munan: yachachiy, yuyaychay, cheqanchay ima, manataj jasutʼinamantachu parlashan (Proverbios 4:1, sutʼinchaynin).
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
