LECCIÓN 06
¿Imaynatá tukuy imapis rikhurerqa?
Bibliaqa Diosmanta nin: “Qanmin kausay yaku juturi kanki”, nispa (Salmo 36:9). ¿Ajinapunichu kanman? ¿Diospunichu tukuy kausajkunata ruwanman karqa? Wakin runasqa tukuy kausajkuna jinallamanta rikhurisqankuta ninku. Jina kajtin, noqanchejpis qhasillapajchá kausashasunman. Jehová Dios kausayta qowanchej, manataj qhasipajchu kausashanchej. a Chayrayku Bibliapi yachakuy imaynatachus kausay rikhurisqanta. Qan kikiykitaj reparay Bibliaj nisqan cuentollachus manachus kasqanta.
1. ¿Imaynapitaj cielowan jallpʼawan rikhurerqanku?
Bibliaqa nin: “Qallariypeqa Dios ruwarqa cielotawan jallpʼatawan”, nispa (Génesis 1:1). ¿Imaynatá chayta ruwarqa? Jehová Diosqa cielopipis jallpʼapipis kaj chhikata, ‘atiyninwan’ chayri espíritu santonwan ruwarqa (Génesis 1:2). Ashkha cientificospis ninku cielowan jallpʼawan qallariyniyoj kasqankuta.
2. ¿Imapajtaj Dios kay jallpʼata ruwarqa?
Jehová Dios “jallpʼataqa mana qhasipajchu ruwarqa, manachayqa runas tiyakunankupaj” (Isaías 45:18). Payqa jallpʼanchejta tukuy imayojta ruwarqa, may kʼachitutataj. Ajinamanta runas chaypi wiñaypaj kausakunankupaj (Isaías 40:28; 42:5 leey). Cientificosqa ninku kay jallpʼanchejqa ni mayqen planetawan kikinchu kasqanta. Imaraykuchus kay jallpʼalla runas kausakunankupaj jina.
3. ¿Imaraykutaj runas animaleswan mana kikinchu kanchej?
Imaraykuchus “Diosqa runata ruwarqa payman rijchʼakojta” (Génesis 1:27 leey). Chayrayku pay jina munakuyniyoj kanchej, cheqan kajta, waj imastapis ruwayta atinchej. Chantapis Diosqa waj parlaykunata yachakuyta atinapaj jina ruwawarqanchej. Payqa ruwallawarqanchejtaj kʼachitu imasta rikuspa kusirikunapaj, takiykunata uyarispa gustachikunapajpis. Chantapis animalesmanta nisqaqa, runaslla Diosta yupaychayta atinchej. Jinapis Jehová Diosqa, mana noqanchejtachu ñaupajta jallpʼapi churawarqanchej, manachayqa plantasta, animalesta imaraj churarqa.
ASTAWAN YACHAKUNA
Kaypi yachakusun Diospuni tukuy kausayniyojkunata ruwasqanta. Yachakullasuntaj Bibliaj nisqanqa, creenapaj jinapuni kasqanta. Chantá yachakusun Jehová Diosqa tʼukunapaj jina ruwawasqanchejta, chaytaj payta rejsinapaj yanapawanchej.
4. Tukuy kausajkunataqa Diospuni ruwarqa
Runasqa plantasmantawan animalesmantawan copiakuspa, tʼukuna imasta ruwanku. Chayrayku paykunaqa may jatunpaj qhawasqa kanku. Jinapis, ¿pitaj plantitasta, animalitostapis ruwanman karqa? Chaypaj VIDEOTA qhawariychej, chantá yachakojta tapuriy:
-
¿Imastataj runas ruwasqanku animalitosta qhawaspa?
Ni mayqen wasipis jinallamanta rikhurinchu. Sapa wasitaqa uj runapuni sumaj yuyaywan ruwan. Kay jallpʼapi kaj imasta pichus ruwasqanta yachanapajqa Bibliapi qhawarina. Hebreos 3:4 leeriychej, chantá yachakojta tapuriy:
-
Plantaspi, animalespi, cuerponchejpi ima piensarispa, ¿imataj qanta astawan tʼukuchisunki?
-
¿Diospunichu cielota, jallpʼata chaypi tukuy ima kajtawan ruwanman karqa? ¿Imaraykutaj chayta ninki?
Astawan yachanaykipaj
Internetpi jw.org nisqapi, “¿Pitaj ruwanman karqa?”, chantá “Diospuni kausayta rikhurichisqanmanta parlanku” nisqata maskʼariy.
“Sapa waseqa ruwajniyojpuni. Tukuy imata ruwajtajrí Diospuni”.
5. Bibliaj nisqanqa creenapaj jinapuni
Génesis libroj ñaupaj capitulonqa, imaynatachus kay jallpʼawan chaypi tukuy kausajkunawan rikhurisqankumanta parlan. Chaypi nisqan cuentollachus manachus kasqanta yachanapaj VIDEOTA qhawariychej, chantá yachakojta tapuriy:
-
Jallpʼawan chaypi kaj imaswan, ¿sojta diasllapichu ruwasqa kasqanku?
-
Bibliaj nisqan, ¿creenapaj jinachu? ¿Imaraykú chayta ninki?
Génesis 1:1 leeriychej, chantá yachakojta tapuriy:
-
Cientificosqa ninku, cielopis jallpʼapis qallariyniyoj kasqankuta. Bibliarí, ¿chayllatatajchu nisqa?
Wakin runasqa ninku: “Diosqa uj juchʼuy khurituta ruwarqa. Chay khuritullamanta tukuy ima rikhurerqa”, nispa. Génesis 1:21, 25, 27 leeriychej, chantá yachakojta tapuriy:
-
Biblia nisqanman jina, ¿uj juchʼuy khuritullamantachu pescados, animales, runaspis rikhurisqanchej, chayrí Diospunichu tukuy imata ‘layankuman jina’ ruwasqa?
6. Runasqa Diospa ni mayqen ruwasqasninwan kikinchu kanchej
Noqanchejqa mana animaleswan kikinchu kanchej. Génesis 1:26 leeriychej, chantá yachakojta tapuriy:
-
Runasqa Diospa rijchʼayninman jina ruwasqa kasqanchejrayku, munakuyniyoj, khuyakuyniyojtaj kanchej. ¿Ajinallatajchu Jehová Diospis kanman?
WAKIN RUNAS NINKU: “Biblia imaynatachus tukuy ima rikhurisqanmanta willasqanqa cuentolla”, nispa.
-
Qanrí, ¿ima niwajtaj, jinapunichu kanman?
¿IMASTÁ YACHAKUNCHEJ?
Kaypi yachakunchej Jehová Diosqa cielota, jallpʼata, chaypi tukuy ima kajtawan ruwasqanta.
Yuyarikunapaj
-
Biblia nisqanman jina, ¿imaynatá cielowan jallpʼawan rikhurisqanku?
-
¿Diosninchej uj juchʼuy khuritullamantachu tukuy imata rikhurichisqa, chayrí paypunichu tukuy imata ruwasqa?
-
¿Imaraykutaj runas, animaleswan mana kikinchu kasqanchej?
ASTAWAN YACHAKUNAYKIPAJ
Imaynatachus animaleswan plantaswan rikhurisqankuta yachanaykipaj kayta leeriy.
“¿Imatá yachakusunman animalesmanta plantasmantawan?” (¡Despertad!, septiembre de 2006)
Kay videopi uj tata wawitanman yachachin imaynatachus tukuy ima rikhurisqanta. Chaymanta astawan yachanaykipaj kay videota qhawariy.
¿Biblia yachachinchu Diosqa evolucionnejta tukuy imata rikhurichisqanta? Chayta yachanaykipaj kayta leeriy.
Científicos tarisqankuman jina, tukuy ima jinallamantachus manachus rikhurisqanta yachanaykipaj kayta leeriy.
El origen de la vida. Cinco cuestiones dignas de análisis (Folleto)
a 25 leccionpi yachakusun imapajchus Dios ruwawasqanchejta.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
