LECCIÓN 16
¿Imastataj Jesús kay jallpʼapi ruwarqa?
Ashkha runasqa Jesusta qhawanku wawitata jinallapuni chayri wañuy patapi kashaj runata jinalla. Wakintaj kʼacha runalla kasqanta ninku. Chayrayku kaypi yachakusun imatachus Jesús kay jallpʼapi kashaspa ruwasqanta, imaynatachus chay ruwasqan yanapawasqanchejtapis. Ajinamanta Jesusta astawan rejsisun.
1. ¿Imatataj Jesús kay jallpʼapi kashaspa astawan ruwarqa?
Jesusqa ‘Diospa Gobiernonmanta sumaj willaykunata willarqa’. Chay ruwaytaj kausayninpi ñaupajpi karqa (Lucas 4:43 leey). Payqa runasman willarqa Dios uj Gobiernota sayarichinanta, chay Gobiernotaj tukuy runaspa problemasninkuta chinkachinanta. a Jesusqa kinsa wata khuskanniyojta mana saykʼuspa chay Gobiernomanta willarqa (Mateo 9:35).
2. ¿Imaraykú Jesús milagrosta ruwarqa?
Jesusqa milagrosta ruwarqa Diospuni payta kachamusqanta rikuchinanpaj. Chantapis chaywan rikucherqa Jehová Dios atiyniyoj kasqanta tukuy problemasninchejta chinkachinanpaj. Jesusqa Diospa atiyninwan sinchʼi wayrata, paratapis thañicherqa. Chantá may chhika runasta mikhucherqa, onqosqasta sanoyacherqa, wañusqastapis kausaricherqa (Mateo 8:23-27; 14:15-21; Marcos 6:56; Lucas 7:11-17). Chayrayku Biblia nin, ‘Diosqa Jesusnejta milagrosta, tʼukuna imasta, señalestawan ruwasqantaʼ (Hechos 2:22).
3. ¿Imatá Jesuspa kausaynin yachachiwanchej?
Jesuspa kausaynin yachachiwanchej llakiykunapi kaspapis, Diosta pay jina sirviyta atisqanchejta. Jesusqa Tatan Jehovata tukuy imapi kasukorqa (Juan 8:29 leey). Payqa runas churanakojtinkupis, Tatanpa kamachisqanta wañupunankama kasukorqa. Jesusqa ajinata kausakorqa ‘pay jina ruwananchejpaj. Ajinamanta purisqanta sumajta qhatinanchejpajʼ (1 Pedro 2:21).
ASTAWAN YACHAKUNA
Kaypi yachakusun imaynatachus Jesús sumaj willaykunata willasqanta, milagrosta ruwasqantapis.
4. Jesusqa sumaj willaykunata willarqa
Jesusqa may karusta purerqa, jallpʼa ñankunatataj rerqa ashkha runasman sumaj willaykunata willananpaj. Lucas 8:1 leeriychej, chantá yachakojta tapuriy:
-
¿Jesús payman qayllaykojkunallamanchu willarqa?
-
¿Imastá Jesús ruwarqa runasta tarinanpaj?
Diosqa ñaupajtaña willarqa Mesías sumaj willaykunata willananta. Isaías 61:1, 2 leeriychej, chantá yachakojta tapuriy:
-
¿Imaynatá Jesús kay versiculoj nisqanta juntʼarqa?
-
¿Chay sumaj willaykuna kay tiemponchejmanta runasta yanapanmanchu?
5. Jesusqa ashkha imasta yachacherqa
Jesusqa mana Diospa Gobiernollanmantachu willarqa. Payqa allinta kausakunanchejpaj ashkha imasta yachacherqa. Orqopi Yachachisqanmanta wakinta qhawarina. Mateo 6:14, 34; 7:12 leeriychej, chantá yachakojta tapuriy:
-
¿Imastataj Jesús yachachisqa?
-
¿Chay yachachisqan kunan yanapawasunmanchu?
6. Jesusqa milagrosta ruwarqa
Jehová Diosqa Jesusman atiyta qorqa ashkha milagrosta ruwananpaj. Chaykunamanta ujta yachanapaj Marcos 5:25-34 leeriychej chayri VIDEOTA qhawariychej. Chantá yachakojta tapuriy.
-
¿Imatataj uj warmi ruwasqa sanoyapuyta munaspa?
-
Jesús chay milagrota ruwasqanmanta, ¿imataj astawan tʼukuchisunki?
Juan 5:36 leeriychej, chantá yachakojta tapuriy:
-
¿Imatataj Jesús chay milagrosta ruwaspa rikucherqa?
Astawan yachanaykipaj
Jesuspa kausayninmantaqa Mateo, Marcos, Lucas, Juan librospi qhelqasqa kashan. Chay librostaqa Evangelios sutiwan rejsikullantaj. Chay librosta qhelqajkunaqa, mana kikin imastapunichu Jesusmanta qhelqarqanku. Jinapis chay qhelqasqankoqa Jesuspa kausayninta sumajta entiendenapaj yanapawanchej.
-
MATEOQA
ñaupaj kaj evangeliota qhelqarqa. Payqa Jesuspa yachachiykunasninmanta astawan parlarqa. Astawanqa Jesús Diospa Gobiernonmanta willasqanta qhelqarqa.
-
MARCOSQA
Jesusmanta pisillata qhelqaspapis, Jesús imastachus ruwasqanmanta astawan parlarqa.
-
LUCASQA
Jesús orakusqanmanta, warmiswan kʼacha kasqanmanta ima astawan parlarqa.
-
JUANQA
astawan parlan imaynatachus Jesús amigosninwan, waj runaswan ima parlasqanmanta. Chaytaj yanapawanchej Jesús imayna runachus kasqanta yachanapaj.
WAKIN RUNAS NINKU: “Jesusqa Tukuy Atiyniyoj Diosninchej”, nispa.
-
¿Imatá qan niwaj?
¿IMASTÁ YACHAKUNCHEJ?
Kaypi yachakunchej Jesusqa Diospa Gobiernonmanta willasqanta, milagrosta ruwasqanta, tukuy imapitaj Jehová Diosta kasukusqanta.
Yuyarikunapaj
-
Jesús kay jallpʼapi kashaspa, ¿imatataj astawan ruwarqa?
-
¿Imaraykutaj Jesús milagrosta ruwarqa?
-
¿Imastá Jesús sumajta kausakunanchejpaj yachacherqa?
ASTAWAN YACHAKUNAYKIPAJ
¿Imamantá Jesús astawan parlarqa? Chayta yachanaykipaj kayta leeriy.
“¿Imaraykú Jesús mayta parlarqa Diospa Reinonmanta?” (Torremanta Qhawaj, 1 de octubre de 2014)
¿Jesús milagrosta ruwasqan cuentollachu? Chayta yachanaykipaj kayta leeriy.
“¿Imatá yachakunchej Jesús milagrosta ruwasqanmanta?” (La Atalaya, 15 de julio de 2004)
Payllapi yuyaj runata Jesuspa kausaynin yanaparqa. Imaynatachus yanapasqanta yachanaykipaj kayta leeriy.
“Noqallapi yuyaj kani” (Torremanta Qhawaj, 1 de octubre de 2014)
Tiempo pasasqanman jina imastachus Jesús kay jallpʼapi kashaspa ruwasqanmanta yachakunaykipaj kayta leeriy.
“Jesús jallpʼapi kasqanmanta” (Mosoj Jallpʼapi Kausajkunapaj Diospa Palabran, Yanapa A7)
a Diospa Gobiernonmantaqa 31 a 33 leccionespi astawan yachakusun.
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
