Uj jovencitomanta parlarina, payqa apóstol Pablota salvarqa. Imachus sutikusqanta mana yachanchejchu. Jinapis apóstol Pabloj sobrinon karqa. Nitaj manchachikorqachu. ¿Yachayta munawajchu imatachus pay ruwasqanta?...

Pabloqa, Jerusalenpi carcelpi kasharqa. Jesusmanta runasman willasqanrayku wisqʼaykorqanku. Wakin runastaj, Pablota chejnikorqanku, wañuchinankupajtaj yachachinakorqanku. Paykunaqa, soldadosta kamachejman rispa jinata niyta munarqanku: “Soldadosniykita kamachiy, Pablota juzgadoman pusanankupaj”, nispa. Paykunaqa ñanpi pakaykukunanku karqa, Pablota chaynejta rishajtin wañuchinankupaj.

Pabloj sobrinonqa, chayta uyarispa, Pabloman willaj rerqa. Chayrayku Pablo nerqa: “Soldadosta kamachejman usqhayta rispa, willamuy”, nispa. Chaytaj mana atinapaj jinallachu karqa. Imaraykuchus soldadosta kamachejwanqa, mana pipis parlayta atillanmanchu karqa. Pabloj sobrinon, ¿chayta ruwayta atillanmanchu karqa?... Arí. Payqa, mana manchachikorqachu, tukuy imatataj willaykorqa.

Soldadosta kamachejqa, allinta uyarerqa. Pablota jarkʼachinanpajtaj Cesarea llajtaman kachaporqa. Chantapis 500 soldadosta jina paywan khuska rinankupaj kacharqa. Nerqataj: “Kay tutapacha apaychej”, nispa. ¿Pablo salvakorqachu?... Arí, salvakorqa. Chay sajra runasqa, mana imanayta aterqankuchu.

¿Imatá leerisqanchejpi yachakunki wawáy?... Pabloj sobrinonqa, mana manchachikorqachu. Qanpis, pay jina kawaj. Jehovamanta runasman parlanapajqa, mana manchachikunachu. ¿Mana manchachikuspa Jehovamanta parlallankipunichu wawáy?... Diosmantaqa parlanallapuni. Ajinamanta ashkha runas salvakonqanku.