¿MAYQEN wawataj Jehovata astawan kusicherqa?... Wawan Jesús. Tatan Jehovata kusichinanpaj imastachus ruwasqanta yachakuna.

Jerusalenqa Jesuspa wasinmanta kinsa día puriypi kasharqa. Chay llajtapitaj Jehovaj templon karqa. Jesusqa chay templo ‘Tatanpa wasin’ kasqanta nerqa. Paywan familianwanqa, sapa wata Jerusalenman Pascuapaj rej kanku.

Jesús 12 watayoj kashajtin, familianqa Pascua pasayta llajtanman kutipusharqa. Chʼisiyaykuytaña samarinankupaj uj lugarman chayarqanku. Chaypitaj Jesusta ayllusninku ukhupi, rejsisqasninku ukhupi ima watukorqanku, nitaj tarerqankuchu. Chayrayku Mariawan Josewanqa, Jerusalenman chay rato Jesusta maskʼaj kutirerqanku. ¿Yachankichu maypichus tarisqankuta?...

Templopi tarerqanku. Jesusqa yachachejkunaj parlasqankuta uyarispa, tapurispa ima kasharqa. Chay yachachejkuna imata tapojtinkupis, Jesusqa sumajta kutichej. Paykunataj tʼukulla kasharqanku. ¿Reparankichu imaraykuchus Jesús maytapuni Diosta kusichisqanta?...

Mariawan Josewanqa Jesusta tarispa kusikorqanku. Jesustajrí mana llakisqachu kasharqa. Imaraykuchus paypajqa, Diospa wasinpi kay, ¡may sumaj karqa! Chayrayku paykunata taporqa: ‘¿Manachu yachankichej Tataypa wasinpi kashanayta?’, nispa. Jesusqa chay templo Diospa wasin kasqanta yacharqa. Chaypi kaspataj kusisqa karqa.

 Chantá Mariawan Josewanqa, Jesusta Nazaret llajtankuman pusakaporqanku. Jesús, ¿tatasninta jatunpajchu qhawaj?... Biblia nin: “Paykunata kasuspa kakorqa”, nispa. Jesusqa tatasninta tukuy imapi kasukoj. Wasipi ruwanastapis ruwaysikoj, yakutapis pujyumanta apamoj (Lucas 2:41-52).

Kaypi tʼukuriy: Jesusqa mana pantaj runa kaspapis, tatamamanta kasukojpuni, paykuna pantaj runas kajtinkupis. Jehovarí chayta rikuspa, ¿kusikojchu?... Arí, kusikoj. Diosqa Palabranpi nin: ‘Wawas, tataykichejta mamaykichejta kasuychej’, nispa (Efesios 6:1). Qanpis tataykita, mamaykita Jesús jina kasukunki chayqa, Diosta kusichinki.

Chantapis wajkunaman Jehovamanta parlarispa, payta kusichillawajtaj. Wakenqa, chayta ruway mana wawaspajchu kasqanta ninku. Uj kutipi, wakin runasqa wawas Diosta yupaychanankuta mana munarqankuchu. Jesustaj nerqa: ‘¿Manachu  jaykʼajpis Diosmanta Qhelqasqapi leerqankichej: “Juchʼuy wawasqa Diosta yupaychanqanku”, nisqanta?’ (Mateo 21:16). Chayrayku tukuy runas, Jehovamanta, may kʼacha kasqanmantawan willayta atinchej. Chayta ruwaspaqa Diosta kusichisun.

Diosmanta willanapaj, ¿maypitaj paymanta yachakusunman?... Wasinchejpi Bibliata estudiaspa. Chaywanpis astawan yachakusunman, maypichus Diospa llajtan Bibliata estudianapaj tantakun chaypi. ¿Imaynatá yachasunman pikunachus Diospa kamachisnin kasqankuta?...

Tapurikuna: ¿Imatataj chay runas tantakuyninkupi ruwanku? ¿Bibliaj nisqantachu yachachinku? ¿Bibliata leenkuchu, estudiankutajchu? Diospa nisqanta yachakunapajqa chaykunata ruwana tiyan, ¿icharí?... Cristianos tantakunku chaypeqa, Diospa nisqanta yachachikunan tiyan, ¿icharí?... Wakin runastajrí, Bibliaj nisqanta mana kasunachu kasqanta ninku. Paykuna, ¿Diospa llajtanchu kankuman?...

Kaypi tʼukurillaytaj. Bibliaqa nin, Diospa kamachisnin ‘paypata kanankuta’, nisunman sutinta apanankuta (Hechos 15:14). Diospa sutenqa Jehová. Chayrayku “Diospa kamachisnin kayku” nejkunata, Diosninkoj sutin Jehovachus manachus kasqanta tapurisunman. “Mana” niwajtinchejqa, mana Diospa kamachisninchu kanku. Chantapis Diospa kamachisnenqa, Diospa Gobiernonmanta willananku tiyan. Jehová Diosta munakusqankuta rikuchinankupajtaj, kamachisqanta kasukunanku tiyan (1 Juan 5:3).

Chay imasta ruwajkunata rejsinki chayqa, paykunawan Diosta yupaychanaykipaj tantakuy. Tantakuyninkupi yachachikusqanta sumajta uyariy, tapumojtinkutaj kutichiy. Jesusqa Diospa wasinpi  chayta ruwaj. Jesús jina ruwanki chayqa, qanpis Jehovata kusichinki.

Biblia nin jina, ¿pitaj wawa kashaspa Diosta kusichillarqataj?... Timoteo. Tatanqa mana Jehovapi creerqachu. Jinapis maman Eunice, abuelan Loidapis Jehovapi creej kanku. Timoteoqa paykunaj yachachisqankuta uyarispa, Jehovamanta yachakorqa.

Apóstol Pablo Timoteoj llajtanta watukoj rishajtin, Timoteoqa jovenña karqa. Payqa Jehovata sirviyta munarqa. Pablotaj chayta reparaspa, Diosta astawan sirvinanpaj paywan khuska rinanta nerqa. Iskayninku maymanchá rerqanku chaypi, Diospa Gobiernonmanta, Jesusmantawan runasman willarqanku (Hechos 16:1-5; 2 Timoteo 1:5; 3:14, 15).

Imillitasrí, ¿Diosta kusichillarqankutajchu?... Arí. Bibliaqa uj israelita sipasitamanta parlan. Chay sipasitaj tiemponpeqa, Siriawan Israelwan enemigos karqanku. Uj kuti, Siriamanta soldados  Israelwan maqanakorqanku. Chay sipasitatataj presochasqata apakaporqanku. Chantá Naamanpa wasinman aparqanku. Payqa Siriamanta soldadospa kurajninku karqa. Chay sipasitataqa Naamanpa warminpa sirvientan kananpaj churarqanku.

Naamanqa leprayoj karqa, nitaj mayqen doctorpis jampiyta aterqachu. Israelmanta sipasitataj, Diospa profetan sanoyachiyta atisqanta yacharqa. Naamanwan warminwanqa mana Jehovata sirvejchu kanku. ¿Allinchu kanman karqa chay sipasita paykunaman profetamanta willarinan? ¿Imatá qan ruwawaj karqa?...

Chay sipasitaqa nerqa: ‘Sichus Naamán Israelpi profetawan parlamunman chayqa, lepranmanta sanoyapunman’, nispa. Naamanqa nisqanta kasuspa rerqa. Profetaj nisqanta ruwajtintaj, sanoyaporqa. Ajinamanta payqa Diosta yupaychayta qallarerqa (2 Reyes 5:1-15).

Chay sipasita jina, Jehovamanta, imastachus ruwananmanta willaspa, ¿wajkunata yanapayta munawajchu?... ¿Pikunatá yanapawaj?... Ichapis wakin runasqa mana yanapanaykita munanqankuchu. Jinapis Jehová imastachus ruwasqanmanta willarejtiykeqa, ichá uyarisonqanku. Chayta ruwajtiykeqa, Dios kusikonqa.