ÑAUPAJPIPUNI kayta munajta, ¿rejsinkichu?... Filapi ñaupajpi kayta munaspa, ichá wajkunata tanqarparin. ¿Chayta rikorqankichu?... Jesusqa kuraj runastapis allin tiyanasta ajllakojta rikorqa. Chaytataj mana allinpajchu qhawarqa. Chaymanta parlarina.

Biblia nisqanman jina, fariseospa religionninkuta kamachej, Jesusta uj jatun mikhuyman wajyarerqa. Jesusqa chaypi qhawarqa imaynatachus wajyarisqas sumaj tiyanasta ajllarakusqankuta. Chayrayku chaypi kajkunaman uj rijchʼanachinata willarqa. ¿Yachayta munawajchu?...

 Jesús nerqa: “Casarakuman wajyarisqa kaspaqa, ama ñawpajpi tiyaykuychu”, nispa. ¿Yachankichu imaraykuchus chayta nisqanta?... Jesús sutʼincharqa: “Pajtataj wajpis qanmanta aswan sumaj runa wajyarisqallataj kanman”, nispa. Chantá kay dibujopi rikushanki jina, wajyarikojqa ñaupajpi tiyaykoj runaman ninman: ‘Kay tiyanata payman qoy, qantaj jaqayman riy’, nispa. ¿Imataj kanman chay wajyarisqa runamanta?... Pʼenqaypichá rikhurinman tukuypa ñaupaqenpi qhepanejman tiyakoj rispaqa.

Jesusqa yachachisharqa, ñaupajpi kayta maskʼayqa mana allinchu kasqanta. Chayrayku nerqa: ‘Casarakuman wajyarisqa kaspaqa, qhepanejpi tiyaykuy. Wajyasojniykitaj jamuspa nisonqa: “Kausaqéy, aswan ñaupajpi tiyakamuy”, nispa. Ajinapeqa aswan sumaj tiyanaman pusasojtinku, allinpi rikhurinki tukuy wajyarisqaspa ñaupaqenkupi’ (Lucas 14:1, 7-11).

¿Entiendenkichu imatachus Jesús yachachisqanta?... Kikincharina: Uj juntʼa microman wicharejtiyki, ¿allinchu kanman kuraj runaswan asientota qhechunakunayki?... Chayta ruwajtiyki, ¿Jesús kusikunmanchu?...

Ichá wakenqa ninkuman: “Jesuspajqa kikillan”, nispa. ¿Ajinachu?... Jesusqa chay jatun mikhuypi kashaspa, runas tiyanasta ajllarakusqankuta qhawarqa. ¿Nichu ruwasqanchejta qhawamushallanmantaj?... Payqa cielopi kashan, tukuy imatataj qhawamushan.

Ñaupajpi kayta munajqa chʼajwata rikhurichinman. Runasqa paywan phiñakuspa siminakunkuman. Chaytaj rikukuyta yachan,  wawaspuralla autopi rejtinku. Autoj punkun kicharikusqantawan, wawasqa ventana ladopi asientota japʼikuyta munaspa atipanaku wicharinku. Chayta ruwasqankurayku, ¿imapí rikukunkuman?... Phiñanaykukunkuman.

Ñaupajpipuni kayta munayqa chʼajwata rikhurichinman. Chayrayku Jesuspa apostolesninpis chʼajwarqanku. Sojta yachaqanapi yachakorqanchej jina, mayqenninkuchus aswan kurajpaj qhawasqa kasqanmanta siminakorqanku. ¿Imatá Jesús ruwarqa?... Yuyayninkuta cheqancharqa. Chaymanta aswan qhepaman, watejmanta siminakullarqankutaj. Chaymanta parlarina.

Jesusqa wañupunan qayllata apostolesninwan, waj yachachisqasninwan ima Jerusalenman risharqa. Payqa yachachisqasninman  Gobiernonmanta willarqaña. Santiagowan Juanwantaj, Jesuswan reyes kanankupi mayta tʼukusharqanku, mamanku Salomemanpis chayta willarqanku (Mateo 27:56; Marcos 15:40). Chayrayku Jerusalenman rishajtinku, Salomeqa Jesusman qonqoriykukorqa uj imata mañakunanpaj.

Jesustaj nerqa: “Imatataj munankiri?”, nispa. Salometaj kuticherqa: ‘Kay iskay wawasniy Gobiernoykipi ujnin pañaykipi, ujnintaj lloqʼeykipi tiyaykukuchunku ari’, nispa. Chay chunka waj apostolesrí, ¿imatataj nerqanku chayta yachaspa?...

Paykunaqa Santiagopaj Juanpajwan maytapuni phiñakorqanku. Chayrayku Jesusqa 12 apostolesninman nerqa: ‘Sapa llajtapi kamachejkunaqa munanku atiyniyoj kayta, sumajpajtaj qhawachikuyta. Paykunaqa patapi kayta munanku, runaswan kasuchikunankupaj’,  nispa. Chantá yachachisqasninman nerqa: “Qankuna ukhupirí mana jinachu kanan tiyan. Pichus qankunamanta kurajpaj qhawasqa kayta munajqa tukuypa kamachin kanan tiyan”, nispa. Ama chayta qonqaychu (Mateo 20:20-28).

¿Imatataj uj kamachi chayri uj esclavo ruwan?... Uj esclavoqa mana sirvichikunchu, astawanpis wajkunata sirvin. Payqa mana ñaupajpichu, manaqa qhepapipuni. Nitaj aswan sumaj runa jinachu purin, manaqa pisipaj qhawasqa runa jina. Chantapis Jesuspa nisqanta ama qonqaychu: “Kurajpaj qhawasqa kayta munajqa tukuypa kamachin kanan tiyan”.

¿Imatá chaymanta yachakunchej?... Uj kamachi, ¿sumaj tiyanata patronninwan qhechunakunmanchu? Chayri, ¿mayqenninkuchus ñaupajta mikhunanmanta siminakunmanchu? ¿Imatá niwaj?... Jesús nisqanman jina, uj kamacheqa patronnintaraj ñaupajta atienden (Lucas 17:7-10).

Chayrayku ñaupajpi kayta maskʼanamanta, ¿imata ruwaytaj aswan allin?... Arí, kamachis jina kana. Nisunman wajkunata ñaupajman churananchej tiyan, aswan kurajta jinataj qhawana tiyan. ¿Imaynatá wajkunata ñaupajman churawaj?... Kay libropi 40, 41 paginasta qhawarispaqa, imaynatachus wajkunata yanaparinata yuyarikunki. Ajinamantataj paykunata ñaupajman churanki.

Sumaj Yachachej Jesusqa wajkunata sirvispa, paykunata ñaupajman churarqa. Wañupunanpaj uj chʼisi kashajtin, apostolesninpa chakisninkutapis mayllarqa. Noqanchejpis wajkunata sirvispa, paykunata ñaupajman churasun chayqa, Sumaj Yachachej Jesusta, Tatan Jehovatawan kusichisunchej.