Juan Bautista willayta qallarisqanmanta sojta killasninman, Jesusqa Jordán mayuman rerqa. Chaypachaqa Jesús 30 watasniyoj jina kasharqa. Payqa mana Juan imatachus ruwashasqanta qhawaykachajchu rerqa, nitaj payta waturikojllachu. Manachayqa Juanwan bautizachikoj rerqa.

Juantajrí Jesusta mana bautizayta munarqachu. Payqa yacharqa, Jesusqa Diospa munasqa Wawan kasqanta. Chantapis yachakorqanchej jina, Juanqa maman Elisabetpa wijsanpi kashaspa, kusiywan kuyurerqa Mariaj napaykusqanta uyarispa. Chay kutipi Mariaqa Jesusmanta onqoj kasharqa. Juanpa mamanqa chayta payman willarerqachá. Juanqa yacharqachá, ángel Gabriel Mariaman willasqanta Jesusta nacechikunanta. Yachallarqatajchá Jesús nacekorqa chay chʼisi, ángeles michejkunaman rikhurisqankuta. Chantapis payqa juchasninkumanta pesachikojkunata bautizasharqa. Jesustajrí mana ima juchayojchu karqa.

Chayraykuchá Juanqa Jesusman nerqa: “Noqa qanwan bautizachikunay kashajtinchu, ¿qan noqawan bautizachikoj jamunki?”, nispa. Jesustajrí Juanman nerqa: “Ama jarkʼawaychu ari, aswan walej Diospa munayninta juntʼananchejqa”, nispa (Mateo 3:14, 15).

¿Imajtintaj chanta Jesús bautizakuyta munasharqa? Payqa mana juchasapa kasqanraykuchu bautizachikuyta munarqa, manachayqa Diospa munayninta ruwayta qallarinanpaj. Jesusqa bautizakuspa kayta nisharqa: ‘Diosníy, kaypi kashani munayniykita ruwanaypaj’, nispa (Hebreos 10:5-7). Payqa bautizakunan diakama carpintero karqa. Jinapis chay diamantapacha, ima llankʼaytachus Diosninchej payman qorqa, chayta ruwayta qallarerqa.

¿Juan suyasharqachu Jesús bautizakojtin imapis kananta? Arí. Imajtinchus Juanllataj aswan qhepaman nerqa: “Diostajrí runasta yakupi bautizanaypaj kachamuwarqa, niwarqataj: ‘Pejpa patanmanchus rikunki atiyniyta uraykamojta, paypitaj qhepakojta chayqa, paymin atiyniywan runasta bautizanqa’, nispa” (Juan 1:33). Chayrayku Juanqa ichá mana tʼukorqachu Jesusta bautizasqantawan Diospa  atiynin uraykamojtin. Diospa atiynenqa paloma jina Jesuspa patanman uraykamorqa (Mateo 3:16).

Jinapis niraj Diospa atiynin uraykamushajtenqa, ‘cielo kicharikorqa’. ¿Ima niyta munan chay? Ichapis Jesusqa, bautizakuytawan yuyarikorqa niraj jallpʼaman jamushaspa cielopi tiyakusqanta. Chantapis ichá yuyarikullarqataj, cielopi Tatan Jehovawan kasqanta, imastachus pay yachachisqantapis.

¿Imataj chanta karqa? Cielomanta Dios nimorqa: “Kaymin munasqa Wawayqa, paytaqa allinpaj qhawani”, nispa (Mateo 3:17). Diosqa cielomantapacha parlamorqa, Jesustajrí kay jallpʼapi kasharqa. Ajinapi sutʼita reparanchej, Jesusqa mana Tukuy Atiyniyoj Dioschu kasqanta, manachayqa Diospa Wawan kasqanta.

Bibliaqa Lucas libropi Jesús bautizakusqanmanta parlaytawan, nin: “Jesusqa willarayta qallarishaspa, 30 watasniyoj jina karqa. Runas nisqankuman jinataj payqa karqa: Josejpa wawan, Helijpa wawan, [...] Davidpa wawan, [...] Abrahanpa wawan, [...] Noejpa wawan, [...] Adanpa wawan, Diospa wawan”, nispa (Lucas 3:23-38). Jesusqa jallpʼapi kashaspa Adán jinallataj Diospa wawan karqa, imaraykuchus iskayninku mana juchayoj runas karqanku.

Jinapis Jesús bautizakusqantawan, Jehová Diosqa atiyninta payman qorqa. Ajinamanta Jesusqa Diospa Wawan kasqanta, cielomantaj kutipunanta entienderqa. Chaymantapacha, Jesusqa Diosmanta yachachiyta aterqa, runastataj yanapayta aterqa kausayman pusaj ñanta rinankupaj. Chantapis chay kutimantapacha, Jesusqa ima llankʼaytachus Tatan Jehová qorqa, chayta juntʼayta qallarerqa. Chay llankʼaynintataj kausayninta noqanchejrayku qospa tukucharqa.