1, 2. ¿Imatá Jehová Jesuspa kinsa apostolesninman nerqa, chantá imatataj paykuna ruwarqanku?

 JEHOVÁ janaj pachamantapacha parlamususqanta uyarispa, ¿ima niwajtaj? Ima nisojtinpis kasuwajpacha, ¿icharí?

² Jesuspa kinsa apostolesnin Pedro, Santiago, Juan ima chay jinapi rikukorqanku (Mateo 17:1-5 leey). Paykunaqa, Pascua pasayta 32 watapi “uj jatun” orqopi Jesuswan kasharqanku. Mosqoypi jinataj Jesusta janaj pachapi Reyta jinaña rikorqanku. Sutʼipi jina rikusqankurayku, Pedroqa chaypi kayta munarqa. Parlashajtintaj phuyu paykunata pʼampaykorqa. Jehovatataj janaj pachamantapacha parlamusqanta uyarerqanku. Diospa parlamusqantaqa mana tukuychu uyariyta atej kanku. Jehovaqa, Jesús Churin kasqanta niytawan, “payta uyariychej” nerqa. Apostolesqa chayman jina ruwarqanku. Chantapis Jesuspa yachachisqanta kasukorqanku, wajkunatapis chayman jina ruwanankuta nerqanku (Hech. 3:19-23; 4:18-20).

3. 1) ¿Imaraykutaj Jehová Churinta uyarinanchejta niwanchej? 2) ¿Imatataj allinta ukhuncharinanchej tiyan?

³ Jehová “payta uyariychej” nisqanqa, Bibliapi qhelqasqa kashan, chaytaj noqanchejtapis yanapawanchej (Rom. 15:4). Imaraykuchus Diosqa Jesusnejta parlan. Chayrayku Jehová yachananchejta munarqa chayta Jesusqa yachacherqa (Juan 1:1, 14). Jesusqa, Diospa Reinonmanta astawan parlarqa. Chay Reinopeqa Jesucristo, 144.000 ajllasqa cristianoswan kamachenqanku. Diospa Reinonmantaqa yachakunanchejpuni tiyan, chayrayku allinta ukhuncharina (Apo. 5:9, 10; 14:1-3; 20:6). Kunanqa imaraykuchus Jesús, Diospa Reinonmanta parlasqanta qhawarina.

4. ¿Imaynatá Jesús, Diospa Reinonta may valorniyojpaj qhawasqanta rikucherqa?

⁴ Jesusqa, Diospa Reinonta may valorniyojpaj qhawarqa. ¿Imaraykú chayta ninchej? Imaraykuchus, runaspa sonqonkupi imachus kasqanqa, parlasqankupi rikukun. Chayrayku Jesús nerqa: “Sonqopi imachus juntʼa kashan, chaymanta simeqa parlan”, nispa (Mat. 12:34). Jesusqa, maypi  kashaspapis Diospa Reinonmanta parlallajpuni. Mateo, Marcos, Lucas, Juan librospeqa pachaj kurajta jina Diospa Reinonta oqharikun, casi tukuynintaj Jesuspa parlasqan. Chantapis payllataj nerqa: “Wajkunamampis Diospa reinonmanta evangeliota willamunallaytaj tiyan, imaraykuchus chaypaj kachamusqa kani”, nispa (Luc. 4:43). Kausarimuytawanpis yachachisqasninman Diospa Reinonmanta parlallarqapuni (Hech. 1:3). Jesusqa, sonqomantapacha Diospa Reinonta jatunpaj qhawarqa, chayrayku chaymanta parlallajpuni.

5-7. 1) ¿Imaynamantá yachanchej Jehová Reinonta may valorniyojpaj qhawasqanta? Sutʼinchariy. 2) ¿Imaynatá noqanchejpis Diospa Reinonta valorniyojpaj qhawasqanchejta rikuchisunman?

⁵ Jehovapis, Jesús jinallataj Reinonta may valorniyojpaj qhawan. ¿Imaynatá chayta yachanchej? Jehovaqa kʼata Churinta Jallpʼaman kachamorqa. Chayrayku Jesuspa tukuy ima nisqan, yachachisqanpis Jehovamanta jamorqa (Juan 7:16; 12:49, 50). Chantapis Diosqa, Mateo, Marcos, Lucas, Juan librospi Jesuspa kausayninmanta, imatachus ruwasqanmanta ima qhelqacherqa. ¿Imaraykú chayta yachananchejpuni tiyan?

⁶ Kaypi tʼukuriy: uj costalman papata winayta munaspa, mana tukuynin yaykojtin, ¿imatá ruwawaj? Ichapis jatuchejllata ajllarqospa winaykuwaj. Ajinallatataj Mateo, Marcos, Lucas, Juan ima, mana tukuy imatapunichu Jesusmanta qhelqarqanku. Manaqa imastachus yachayta necesitasqallanchejta (Juan 20:30; 21:25). Astawanpis, espíritu santoj yanapayninwan imaschus yanapanawanchejpaj jina kajllata qhelqarqanku. Chaytaj Jesuspa llankʼayninta, Jehovaj munayninta ima entiendenapaj yanapawanchej (2 Tim. 3:16, 17; 2 Ped. 1:20, 21). Jesusqa, Diospa Reinonmanta yachacherqa, chaytaj Mateo, Marcos, Lucas, Juan librospi kashan. Chayrayku nisunman Jehovapis, Reinonta valorniyojpaj qhawasqanta. Arí, Jehovaqa, Reinonmanta allinta yachakunanchejta munan.

⁷ Tapurikuna: “¿Valorniyojpajchu Diospa Reinonta qhawani?”, nispa. Jina kajtenqa, Diospa Reinonmanta Jesús yachachisqanta astawan yachakuyta munasun. Nisunman imaraykuchus chay Reinomanta yachakunapuni kasqanta, imaynatachus, maykʼajtajchus jamunantapis.

8. ¿Imaynatá Jesús, Diospa Reinonmanta yachanapuni kasqanta rikucherqa?

⁸ Padrenuestro nisqa mañakuyta ukhuncharina. Jesusqa entiendenapaj jinalla, Diospa Reinon imastapunichus ruwananta sutʼincharqa. Chaytaj yachanapuni kasqanta reparanapaj yanapawanchej. Chay mañakuypeqa qanchis imasta mañakorqa. Kinsaqa, Jehová imatachus ruwayta munasqanmanta, nisunman Diospa sutin jatunchasqa kananmanta,  Reinon jamunanmanta, janaj pachapi jinallataj kay pachapipis munaynin ruwasqa kananmanta ima (Mateo 6:9, 10 leey). Jehovaqa, Reinonnejta sutinta jatunchanqa, munaynintataj juntʼanqa.

9, 10. 1) ¿Imaynatá Diospa Reinon jamonqa? 2) ¿Imataj astawan juntʼakunanta munanki?

⁹ ¿Imaynatá Diospa Reinon jamonqa? “Reinoyki jamuchun” nispaqa, Diospa Reinon Jallpʼata kamachinallantaña mañakushanchej. Chay Reinoqa Jallpʼantinta kamachenqa, kay sajra pachata, gobiernostapis chinkachenqa, cheqan kausayllataj kanqa (Dan. 2:44; 2 Ped. 3:13). Chaymantataj Diospa Reinonqa, Jallpʼantinta uj paraisoman tukuchenqa (Luc. 23:43). Diospa yuyayninpi kajkunaqa, kausarimonqanku, familiaresninkuwantaj tinkukaponqanku (Juan 5:28, 29). Jehovaj kamachiykunasninta kasukojkunaqa, mana juchayoj runasman tukonqanku, wiñaypajtaj kausakonqanku (Apo. 21:3-5). Chaymantataj janaj pachapi jinallataj Jallpʼapipis Diospa munaynin ruwasqa kanqa. Chaykuna juntʼakunantataj mayta suyashanchej, ¿icharí? Arí, Diospa Reinon jamunanta mañakuspaqa, Diospa nisqasnin juntʼakunanta mañakushanchej.

¹⁰ Kay pacha gobiernosqa kamachishallankupuni, kay sajra pachapis kashallanpuni. Chaytaj rikuchin, “Reinoyki jamuchun” nispa Diosmanta mañakusqanchej niraj juntʼakusqanta. Chaywanpis, Diospa Reinonqa sayachisqaña. Chaytataj qhepan yachaqanapi yachakusun. Chaypajqa Jesús nisqanman jina, maykʼajchus sayachisqa kananta, maykʼajtajchus chay Reino jamunanta qhawarina.

11. ¿Imatataj Jesús, Diospa Reinon sayachisqa kananmanta sutʼincharqa?

¹¹ Jesuspa wakin yachachisqasnenqa, Diospa Reinon tiemponkupi sayachisqa kananta suyakorqanku. Jesustaj mana jinachu kasqanta sutʼincharqa (Hech. 1:6). Jesús, imatachus iskay rijchʼanachinasninpi nisqanta qhawarina, ujninmantaqa 31 watapi parlarqa, ujninmantataj 33 watapi.

12. ¿Imaynatá trigomanta, cizaña qhoramanta rijchʼanachina, Diospa Reinon mana ñaupa cristianospa tiemponkupichu sayachisqa kasqanta rikuchin?

¹² Trigomanta, cizaña qhoramanta rijchʼanachina. (Mateo 13:24-30 leey.) Jesusqa 31 wata chaynejpi, chay rijchʼanachinamanta parlaytawan, yachachisqasninman chayta sutʼincharqa (Mat. 13:36-43). Chay rijchʼanachina imachus niyta munasqanmanta wakinta qhawarina. Apóstoles wañupusqankutawan, Kuraj Supayqa tarpunan karqa cizaña qhorata (llulla cristianos) trigo chaupipi (“reinoj wawasnin”, nisunman ajllasqa cristianos). Trigowan cizaña qhorawanqa cosecha tiempokama khuska wiñananku karqa. Chaytaj niyta munan “kay pachaj tukukuynin”. Cosecha tiempo qallarejtintaj, cizaña qhorata tantakunan karqa, chantataj trigota. Jesuspa rijchʼanachinanqa rikuchin, Diospa Reinon mana ñaupa cristianospa tiemponkupichu sayachisqa kasqanta,  manachayqa wiñayta tukusqankutawanraj. Arí, 1914 watapi trigowan cizaña qhorawan wiñayta tukorqanku, cosecha tiempotaj qallarerqa.

13. ¿Ima rijchʼanachinawantaj Jesús sutʼincharqa, mana janaj pachaman kutisqantawanpachachu rey churasqa kananta?

¹³ Qolqe mirachiymanta rijchʼanachina. (Lucas 19:11-13 leey.) Jesusqa kay rijchʼanachinamanta 33 watapi Jerusalenman rishaspa parlarqa. Uyarejkunamanta wakenqa, Jerusalenman chayaytawan Diospa Reinonta sayachinanta yuyarqanku. Jesusqa qhepamanraj Diospa Reinon sayachisqa kananta entiendechinanpaj, pay kikinchakorqa “uj qhapaj runa karu llajtaman [rejwan] reymanta churasqa kanampaj”. a Jesuspajqa chay ‘karu llajta’ janaj pacha karqa, maypichus kamachinanpaj Tatan atiyta qonan karqa chay. Jesusqa yacharqa mana kutisqantawanpachachu rey churasqa kananta. Astawanpis suyakunan karqa, Diospa pañanpi rey churasqa kanankama. Ashkha watastataj chaypaj suyakorqa (Sal. 110:1, 2; Mat. 22:43, 44; Heb. 10:12-14).

14. 1) ¿Imaynatataj Jesús tawa apostolesninpa tapuyninkuman kuticherqa? 2) ¿Imatá rikuchiwanchej Jesuspa profecian kutimuyninmanta, Diospa Reinonmantawan juntʼakushasqan?

¹⁴ Jesús niraj wañuchisqa kashajtin, tawa apostolesnin taporqanku: “Ima señaltataj rikuchiwasqayku kutimunaykimanta, kay pachaj tukukuyninmantawan?”, nispa (Mat. 24:3; Mar. 13:3, 4). Jesustaj, Mateo 24, 25 capitulospi tarikoj profeciamanta parlaspa chay tapuyman kuticherqa. Chay profeciapeqa, Cristoj “kutimuynin” tiempopi, imaschus Jallpʼantinpi kananmanta parlashan. Jesuspa kutimuynenqa qallarin Diospa  Reinon kamachiyta qallarishajtin, tukukuntaj Diospa Reinon Jallpʼantinpi kamachishajtin. Jesuspa profeciasnenqa 1914 watamantapacha juntʼakushan. b Chayrayku Jesuspa kutimuynenqa 1914 watapi qallarerqa, Diospa Reinontaj sayachisqa karqa.

15, 16. ¿Pikunamantataj Jesús “kay mita” runas nispa parlasharqa?

¹⁵ Chantá, ¿maykʼajpunitaj Diospa Reinon jamonqa? Jesusqa maykʼajchus kananta mana willarqachu (Mat. 24:36). Chaywanpis tukukuy tiempo qayllitapiña kasqanta rikucherqa. Chantapis nerqa, wakin runas nisunman “kunan tiempo runas [chayri mita runas, NM]” chay profecía juntʼakusqanta rikusqankutawanraj, Diospa Reinon jamunanta (Mateo 24:32-34 leey). ¿Pikunamantataj Jesús parlasharqa? Chayta astawan yachakuna.

¹⁶ “Kunan tiempo runasqa.” ¿Paypi mana creejkunamantachu Jesús parlasharqa? Mana. Jesusqa chay profeciata apostolesninman nerqa, pikunachus “qayllaykuspa, sapallampi taporqanku” chaykunaman (Mat. 24:3). Pisimantawantaj tukuynin apóstoles espíritu santowan ajllasqa kananku karqa. Chantapis, Jesusqa niraj chayta nishaspa, kayta nerqa: “Higo sachʼamanta rijchʼanachinamanta yachaqakuychej: Ramasnin wawayarejtin, laqhesnimpis rikhurirejtin, yachankichej qʼoñi tiempo jamushasqantaña. Ajinallatataj qankunapis kay tukuy imasta rikuspa, yachankichej ñapis Cristoj kutimunan qayllapiña kasqanta”, nispa. Ajllasqa cristianosqa, Cristoj nisqan juntʼakusqanta rikunkuman karqa, imachus niyta munasqantapis entiendenkuman karqa, nisunman “Cristoj kutimunan qayllapiña kasqanta”. Jesuspi mana creejkunataj mana chayta entiendeyta atinkumanchu karqa. Chayrayku Jesusqa, ‘kunan tiempo runasmanta’ chayri mita runasmanta parlaspa, ajllasqa cristianosmanta parlasharqa.

17. ¿Ima niyta munan “mita” runas chantá “chay tukuy ima”?

¹⁷ “Kunan tiempo runasqa manaraj wañonqankuchu, chay tukuy ima juntʼakunankama.” ¿Imaynatá Jesuspa nisqan juntʼakonqa? Chayta yachanapajqa, “kay mita runas” chantá “chay tukuy ima” nispa nisqan, imachus niyta munasqanta entiendenanchej tiyan. Bibliapeqa, “mita” runas nispa imaymana watasniyoj runas uj tiempollapi kausasqankumanta parlan. Chay tiempotaj mana ancha unaychu, tukukuyniyojtaj (Éxo. 1:6). Chantá “chay tukuy ima” nispaqa, 1914 watamantapacha “manchay ñakʼariy” tiempokama, imaschus kananta rikuchin. Jesús nisqanman jinataj chaykunaqa, kutimuynin tiempopi rikukunan karqa (Mat. 24:21).

18, 19. ¿Imaynatá Jesús “kay mita” runas nisqanta entiendenanchej tiyan, imatataj chay entiendechiwanchej?

¹⁸ ¿Imaynatataj Jesús “mita” runasmanta parlasqanta entiendenanchej tiyan? Chay mita runasqa, iskay qotu ajllasqa cristianos kanku, uj tiempotataj khuska kausanku. Ñaupaj kaj qotumanta ajllasqa cristianosqa, Jesucristo 1914  watapi Rey jina churasqa kasqanta juntʼakojta rikorqanku. Iskay kaj qotu ajllasqa cristianostaj, ñaupaj kaj qotumanta kajkunawan khuska, uj tiempota kausajkuna kanku. Chayrayku, chay iskay kaj qotumanta wakenqa, ñakʼariy tiempo qallarisqanta rikonqanku. Iskaynin qotustaj “mita runas” kanku imaraykuchus, uj tiempollatapis khuska kausarqanku. c

¹⁹ ¿Imatá entiendenchej? Jesús Rey jina kutimusqanqa, sutʼi rikukun Jallpʼantinpi. Chantapis “mita” runasmanta kaj ajllasqa cristianosqa machitusña kanku, chaywanpis wakenqa manchay ñakʼariy tiempo qallarishajtin kausashanqankuraj. Chaytaj rikuchiwanchej, Diospa Reinon tumpamantawan jamunanta, Jallpʼatataj kamachinanta. Jesusqa “Reinoyki jamuchun” nispa mañakorqa, chayta juntʼakojta rikuytaj may sumajpuni kanqa.

20. 1) ¿Imamantataj kay libropi yachakusunchej? 2) ¿Imatataj qhepan yachaqanapi yachakusunchej?

²⁰ Jehovaqa, janaj pachamantapacha Jesusmanta nerqa: “Payta uyariychej”, nispa. Cheqa cristianosqa, chay kamachiyta kasukunanchejpuni tiyan. Chantapis, Diospa Reinonmanta Jesús nisqanta, yachachisqanta ima mayta yachayta munanchej. Kay libropeqa, Diospa Reinon imastañachus ruwasqanta, imastatajchus aswan qhepaman ruwananta yachakusun. Qhepan yachaqanapeqa, Diospa Reinon janaj pachapi kamachiyta qallarisqantawan, imaschus kasqanta yachakusun.