1, 2. ¿Pikunatataj Diosninchej amigosninpaj qhawarqa?

¹ AMIGOSTAQA ruwakunchej sumajta apanakunchej chay runaswan, kʼacha runaswan, chantapis mayta munakunchej chay runaswan.

² Jehová Diospis, wakin runasta amigosninpaj qhawan. Unay tiempopi ujnin amigonqa Abrahán karqa (Isaías 41:8; Santiago 2:23). Diosqa Davidta munakorqa, chayrayku amigonpaj qhawarqa. Paymantataj nerqa: “Davidta sonqoypa munasqanman jina tarini”, nispa (Hechos 13:22).  Jehová Diosqa profeta Danieltapis maytapuni munakorqa (Daniel 9:23).

3. ¿Imatataj ruwasqanku Abrahán, David, Danielpis Jehová Diospa amigosnin kanankupaj?

³ ¿Imatataj ruwarqanku Abrahán, David, Danielpis Jehová Diospa amigosnin kanankupaj? Diosqa Abrahanman nerqa: “Qan imatachá nisusqayta kasuwasqaykirayku”, nispa (Génesis 22:18).  Jehová Diosninchejqa amigosninpaj qhawan, pikunachus payta kʼumuykukoj sonqowan kasukunku, chaykunata. Uj llajta enteropis Diospa amigosnin kayta atillankumantaj. Diosqa Israel llajtata nerqa: “Noqata kasuwaychej. Chantá noqa Diosniykichej kasaj, qankunataj aylluy kankichej”, nispa  (Jeremías 7:23). Noqanchejpis Diospa amigosnin kananchejpajqa, payta kasukunanchej tiyan.

4, 5. ¿Imaynatataj Jehová Diosninchej amigosninta yanapan?

⁴ Diosqa “sumajta qhawamushan tukuy kay pachata, kallpachanampaj tukuy sonqowan payllapi atienekunku, chaykunata” (2 Crónicas 16:9). Diosqa amigosninman kayta nin: “Ñawisneyqa qanllapi kashan, yachachisqayki, yuyaychasqaykitaj mayqen ñantachus rinaykita”, nispa (Salmo 32:8).

⁵ Jinapis may atiyniyoj enemigonchej tiyapuwanchej. Paytaj mana munanchu Diospa amigosnin kananchejtaqa. Chaywanpis mana sapallanchejchu kashanchej. Diosqa yanapawasunpuni (Salmo 55:22 leey). Payqa sumaj amigonta jina qhawawanchej. Chayrayku paytaqa tukuy sonqo yupaychanchej. Ima llakiypi rikukuspapis, paytapuni kasukunchej. Noqanchejpis David jinallataj Diosmanta nisunman: “Pay pañaypi kajtin, mana imapis urmachiwanqachu”, nispa (Salmo 16:8; 63:8).

6. ¿Imastataj Supay runasmanta nin?

⁶ Chunka ujniyoj capitulopi yachakorqanchej jina, Supayqa nerqa Diosqa mana allintachu kamachisqanta. Chantapis nillarqataj Diosqa llulla kasqanta, Adantapis, Evatapis ni imata ruwajta saqesqanta. Mana chayllachu, Job libropeqa  willawanchej Supayqa noqanchejmantapis qhasi manakaj imasta parlasqanta. Supayqa runasmanta nin: “Runasqa mana qhasichu Diosta yupaychanku, nitaj pipis Diosta tukuy sonqo munakunchu”, nispa. Chantapis nillantaj, pi runallatapis Diospa contranta churayta atisqanta.

7, 8. 1) ¿Imayna runataj Job kasqa? 2) ¿Imatataj Supay nisqa Jobmanta?

⁷ Kunanqa Jobmanta yachakunachej. Pay wañupusqanmanta kunankamaqa, casi tawa waranqa watasña pasan. Payqa kʼacha runa karqa. Chayrayku Diosqa Jobmanta nerqa: “Pay jina runaqa jallpʼapi mana kanchu”, nispa.  Jobqa Tatanchej Jehová Diosta manchachikoj, chejnejtaj imatachus Diosninchej chejnisqanta (Job 1:8). Jehová Diosqa Jobta sumaj amigonta jina qhawarqa.

⁸ Supaytajrí nerqa, Jobqa Diosta sirvishasqanta tukuy imata qosqanraykulla. Chayrayku Jehová Diosta nerqa: “Manachu qan payta waqaychanki tukuy imamanta, ayllunta, tukuy imasnin kajtapis? Qan bendecishanki tukuy ima ruwasqasninta; chayrayku payqa tukuy ima kapuyniyoj, manchay qhapajtaj jallpʼa patapi. Kunanqa qhechuy tukuy kapusqanta, rikunkitaj uyaykipi maldecisusqanta”, nispa (Job 1:10, 11).

9. ¿Diosninchej Jobta pruebamanta jarkʼasqachu?

⁹ Supayqa nerqa, Jobqa Diosta mana tukuy sonqochu yupaychashasqanta. Nillarqataj Jobta Diospa contranta churayta atisqanta. Jehová Diostajrí  yacharqa Supayqa qhasillata parlashasqanta. Jinapis saqellarqa Jobta pruebaman churananta. Ajinamanta yachakunanpaj Jobqa munakuspapuni Diosta yupaychasqanta.

10. 1) ¿Imatataj Supay ruwasqa Jobta ñakʼarichinanpaj? 2) Jobrí, ¿Diosta yupaychallasqapunichu?

¹⁰ Supayqa Jobpa uywasninta suwacherqa, wakintataj wañuracherqa, casi tukuy kamachisnintapis wañurachillarqataj. Jobqa ni imayoj qhepakorqa. Mana chayllachu, Supayqa sinchʼi muyoj wayrawan Jobpa chunkantin wawasninta wañuracherqa. “Chay tukuywampis, Jobqa mana juchallikorqachu, nitaj ima sajratapis Tata Diospa contranta parlarqachu”. Manachayqa Diosta yupaychallarqapuni (Job 1:12-19, 22).

11. 1) ¿Imatawantaj Supay ruwasqa Jobta? 2) Jobrí, ¿Diosmanta karunchakusqachu?

¹¹ Supayqa Jobpa tukuy imasninta qhechuspapis, mana contentakorqachu. Astawanpis Diosta nerqa: “Kunanqa cuerponta nanaykuchiy má, chantá rikunki uyaykipi maldecisusqanta”, nispa. Ajinamanta Supayqa Jobta millay onqoywan onqocherqa (Job 2:5, 7). “Chay tukuywampis Jobqa manapuni Diospa contranta parlaspa juchallerqachu”, manachayqa Diosmanta mana karunchakorqachu (Job 2:10).

12. Supay pruebaman churajtinpis, ¿imatataj Job ruwasqa?

¹² Jobqa mana yacharqachu Supay contranpi parlasqanta, nillataj yacharqachu Supay ñakʼarichishasqantapis. Jobqa yuyarqa chay  llakiykunata Dios apachisqanta (Job 6:4; 16:11-14). Chayta yuyaspapis, payqa Diosta yupaychallarqapuni. Chaypi sutʼi yachakorqa, Jobqa tukuy sonqopuni Diosta yupaychasqan.  Supayqa qhasi manakajtapuni Jobpa contranpi parlarqa.

13. ¿Imatataj Job ruwasqa?

¹³ Jobqa mana yacharqachu, cielopi Supay imatachus Diosman nisqanta. Jinapis Diosta kasukullarqapuni. Ajinamanta Jobqa Supay llullapuni kasqanta rikucherqa. Jehová Diostaj Jobta bendicerqa, payta tukuy imapi kasukusqanrayku (Job 42:12-17).

14, 15. ¿Imatataj Supay tukuy runaspa contranta parlasqa?

¹⁴ Kunanpis Supayqa nishallanpuni, Diosmanqa mana tukuy sonqochu qayllaykusqanchejta. Supayqa nerqa: “Kawsayninrayku runaqa imatapis qonampaj jinalla”, nispa (Job 2:4). Chay nisqanpi sutʼita reparanchej Supayqa mana Jobllamantachu parlasqanta, manachayqa tukuy runasmanta parlasqanta. Job wañupusqanmanta aswan unayninmanpis, Supayqa Diospa contranpi sajrata parlallarqapuni, jinallataj kamachisninpa contrantapis. Chayrayku Jehová Diosqa niwanchej: ‘Yachayniyoj kay wawáy, kusichiwankitaj. Ajinamanta allinta kutichisaj pichus ñakʼarichiwayta munajta’, nispa (Proverbios 27:11).

¹⁵ Jehová Diosta tukuy imapi kasukusunchej chayqa, payqa sumaj amigonta jina qhawawasunchej. Chantapis Supay llulla kasqanta rikuchisunchej.  Diosman qayllaykunapajqa ñaupa kausayninchejta saqenanchej tiyan. Chayta ruwaspaqa mana pantasunchu. Chantapis sinchʼita sayananchej tiyan. Satanasqa nin, llakiypi rikukuspaqa Diosmanta karunchakunanchejta. Payqa imaymana trampasta churawanchej urmachinawanchejpaj.

16. ¿Ima trampastataj Supay churanman urmachinawanchejpaj?

¹⁶ Supayqa tukuy imaymana trampasta churan urmachinawanchejpaj. “Supayqa, phiña león jina qhaparirispa” muyuykachashawanchej, mayqennillanchejtapis oqoykunawanchejpaj (1 Pedro 5:8). Ichá familianchejpis, rejsisqasninchejpis niwasunman manaña Bibliata estudiananchejta. Chantapis ichá mana munanqankuchu Biblia yachachisqanman jina kausakunanchejta. Ajinapi rikukuspaqa ichapis yuyasunman, paykunataqa Supay contranchejpi churasqanta (Juan 15:19, 20). * Chantapis Supayqa “kʼacha angelman tukuyta yachan”. Payqa Diosta mana kasukunanchejpaj, imaymana engañoswan pantachiyta munawanchej (2 Corintios 11:14). Supayqa waj jinamanta urmachiyta munallawanchejtaj.  Payqa yuyachiyta munawanchej, mana Diosta yupaychananchejpaj jinachu kasqanchejta (Proverbios 24:10).

17. ¿Diosta kasukunachu tiyan?

¹⁷ Jehová Diosninchejta kasukuspaqa, Satanás llulla kasqanta rikuchisunchej. ¿Imataj yanapawasunchej Diosninchejta kasukunapaj? Bibliaqa niwanchej: “Munakuychej Señorniykichej Tata Diosta tukuy sonqoykichejwan, tukuy almaykichejwan, tukuy kallpaykichejwantaj”, nispa (Deuteronomio 6:5). Jehová Diostaqa munakusqanchejrayku kasukunchej. Payta astawan munakuspaqa, astawan kasukuyta munasunchej. Apóstol Juanqa nerqa: “Diosta munakoyqa kamachisqasninta juntʼaymin, kamachisqasninta juntʼaytaj atina jinalla”, nispa (1 Juan 5: 3).

18, 19. 1) Kay urapi cuadroman jina, ¿imastataj Diosninchej chejnikoj kasqa? 2) Diospa kamachiykunasnin, ¿mana juntʼayta atinapaj jinachu?

 ¹⁸ Kay urapi kashan chay  pintasqa cuadropi, willarishan imastachus Diosninchej chejnikusqanta. Ichapis yuyasunman, chay imasta ruwayqa mana jatun juchachu kasqanta.  Jinapis Bibliata leerispaqa, allintataj tʼukurispaqa, reparasunchej Diospa nisqanta kasukuypuni aswan allin kasqanta. Chantapis ichá reparasunchej, ñaupa kausayninchejta saqenanchej kasqanta. Chayta ruwajtinchejqa Diosqa sumaj amigonta jina qhawawasunchej, allinta kausakusunchej, kusiytataj tarisunchej (Isaías 48:17, 18). Ñaupa kausayninchejta saqey mana atinapaj jina kajtinpis, atikunpuni.

 ¹⁹ Diospa kamachiykunasnenqa juntʼayta atinapaj jinalla (Deuteronomio 30:11-14). Imaynatachus sumaj amigonchej allinta rejsiwanchej, ajinallatataj Diospis sumajta rejsiwanchej. Chantapis yachan imastachus ruwayta atisqanchejta, imastatajchus mana atisqanchejtapis (Salmo 103:14). Apóstol Pabloqa nerqa: “Diostajrí nisqasninta juntʼanpuni. Paytaj mana saqenqachu, mana sayay atinata juchaman tanqasqa kanaykichejtaqa. Astawanqa juchaman tanqasqa kashajtiykichej, Diosllataj yanapasonqachej lluspʼinaykichejpaj, sinchʼita sayanaykichejpajtaj”, nispa (1 Corintios 10:13). Diosninchejqa kallpata qowasunchej allin kajta ruwananchejpaj. Paymin ‘may sumaj atiyninta’ qowasunchej, ima llakiypi kajtinchejpis aguantayta atinanchejpaj (2 Corintios 4:7). Apóstol Pabloqa llakiypi kashajtin Diospa yanapayninta japʼerqa, nerqataj: “Tukuy imapaj kallpayoj kani, Dios atiyta qowasqanrayku”, nispa (Filipenses 4:13).

20. ¿Imayna runastaj kananchej kasqa Diosninchej sumaj amigonta jina qhawanawanchejpaj?

²⁰ Jehová Diosninchej sumaj amigonta jina qhawanawanchejpajqa, imastachus pay chejnikusqanta chejnikunanchej tiyan (Romanos 12:9). Chantapis imastachus Diosninchej munakun, chayta munakunallanchejtaj tiyan. Bibliaqa niwanchej imayna runachus kananchejta, Diosninchej sumaj  amigonta jina qhawanawanchejpaj (Salmo 15:1-5 leey). Kausayninchejpeqa kay imas sutʼi rikukunan tiyan: “Munakuyniyoj kay, kusikuyniyoj kay, sonqo tiyaykusqa kay, pacienciayoj kay, kʼacha sonqoyoj kay, kʼacha kay, creeyniyoj kay, llampʼu sonqoyoj kay, munayninchejwan mana atipachikoj kay ima” (Gálatas 5:22, 23).

21. ¿Imatataj ruwananchej kasqa Dios jina kananchejpaj?

²¹ Diosninchej jina kananchejpajqa, imatachus pay munakusqanta yachananchej tiyan. Chayta yachanapajqa Bibliata sapa día leenanchej tiyan, estudiananchejtaj tiyan (Isaías 30:20, 21). Ajinamanta Diosta astawan munakusunchej. Astawan munakuspataj, imatachus kamachiwasqanchejta juntʼayta atillasunchej.

22. Diosta kasukojtinchej, ¿imatataj pay qowasunchej?

²² Ñaupa kausayninchejta saqeyqa, thanta ropanchejta orqhokuspa mosoj ropata churakuy jina. Bibliaqa niwanchej: “Ñaupa kausayniykichejta, ñaupa ruwasqasniykichejtapis saqeychej. Diospa qosqan mosoj kausaywantaj pʼachallikuychej”, nispa (Colosenses 3:9, 10). Chayta ruwayqa mana atikullanchu. Jinapis Diosta kasukusunchej chayqa, payqa ‘jatun tʼinkata’ chayri premiota qowasunchej (Salmo 19:11). Jehová Diostapuni kasukuna, ajinamanta sutʼita rikuchisunchej Supayqa llulla kasqanta. Diosninchejtaqa munakusqanchejrayku yupaychananchej tiyan, manataj imata japʼiyta munasqanchejraykuchu. Chayta ruwajtillanchej, Diosqa sumaj amigonta jina qhawawasunchej.