Israelpi yarqhay kashajtin, Jehová Diosqa Eliasman nerqa: “Sarepta llajtaman ripuy, chaypitaj uj viuda mikhunata qosonqa”, nispa. Eliasqa llajta punkupi uj wajcha viudata llantʼata pallashajta rikorqa. Paymantataj uj vaso yakuta mañakorqa. Apamunanpaj rishajtintaj, nerqa: “Ama jina kaspa uj parti tʼantitatawan aparinpuway”, nispa. Chay viudatajrí nerqa: “Mana tʼantay kanchu. Uj chhika jakʼullay tiyapuwan, uj chhika aceitepiwan, noqapaj, wawaypajwan tʼantata ruwanaypaj”, nispa. Eliastaj nerqa: “Jehová Diosqa nin tʼantata ruwapuwajtiyki jakʼuykipis, aceiteykipis mana tukukunanta ujtawan paramunankama”, nispa.

Viudataj Eliaspaj tʼantata ruwaj rerqa. Kinsa wata kurajta mana parashajtin, chay viudawan wawanwanqa Jehová Dios nisqanman jina mikhunayoj karqanku. Imaraykuchus jakʼupis aceitepis mana tukukorqachu.

 Aswan qhepamantaj chay viudaj wawanqa onqoykuspa wañuporqa. Chay viudataj Eliaspa yanapanta mañakorqa. Eliastaj wawata marqʼariykukuspa altos wasipi camanman siriykucherqa. Chantá orakorqa: “Jehová Diosníy, kay wawata kausarichillay ari”, nispa. Chantá viudaj wawitanqa samayta qallarerqa, kausarerqataj. Chaytaj tʼukunapaj karqa. Imajtinchus chay kutikamaqa mana pipis kausarichisqachu karqa. Chantapis chay viudawan wawanwanqa mana israelitaschu karqanku.

Chantá Eliasqa viudaman nerqa: “Wawayki kausakushan”, nispa. Viudaqa wawanta rikuspa mayta kusikorqa, Eliasmantaj nerqa: “Kunanqa yachani Diospa kamachinpuni kasqaykita, Jehová Dios qannejta parlasqanpis cheqanpuni”, nispa.