Israelpi yarqhay kashajtin, Noemiqa qosanwan iskaynin wawasninwan Moabman riporqa. Chantá qosan wañuporqa, wawasnintaj moabitaswan casarakorqanku. Ujnin ñojchʼantaj Rut karqa, ujnintaj Orfa. Chantá wawasninpis wañupullarqankutaj.

Noemiqa Israelpi manaña yarqhay kasqanta yachaspa Moabmanta ñojchʼasninwan riporqa. Ñanpitaj ñojchʼasninta nerqa: “Sumaj warmis, sumaj ñojchʼastaj kankichej. Munayman watejmanta casarakunaykichejta. Kutipuychej ari wasiykichejman”, nispa. Rutwan Orfawantaj nerqanku: “Mana ripuykumanchu. ¿Imaynatá sapayki rinkiri?”, nispa. Noemí kutin kutita kutipunankuta nisqanrayku, Orfa kutiporqa, Ruttaj mana. Chantá Noemí Rutta nerqa: “Orfaqa llajtanman, dioskunanmantaj kutipun. Qanpis paywan kutipullaytaj, kutipuy mamaykej wasinman”, nispa. Ruttaj nerqa: “Mana sapaykita saqerpasqaykichu. Llajtaykeqa llajtay kanqa, Diosniykipis Diosniy kanqa”, nispa. Noemiqa chayta uyarispa maytachá kusikorqa.

Rutwan Noemiwanqa Israelman chayarqanku cebada cosecha tiempopi. Chantá Rutqa Boazpa chajrasninman cebada umasta pallakoj rerqa. Boazqa Rahabpa wawan karqa. Payqa yacharqa Rut moabita kasqanta, Noemita mayta munakusqanta, payta qhawajtaj quedakusqanta. Chayrayku payqa trabajadoresninman nerqa cebada tʼakasqankuta saqenallankuta Rut pallakunanpaj.

 Chay chʼisi Noemiqa Rutta taporqa: “¿Maypitaj cebadata pallakamorqanki?”, nispa. Ruttaj nerqa: “Boazpa chajranpi”, nispa. Noemitaj nerqa: “Boazqa qosaypa familiarnin. Chajrasninpi pallakullaypuni, paypaj llankʼanku chay sipaskunawan. Chaypeqa allillanta kanki”, nispa.

Rutqa Boazpa chajrasninpi pallakorqa cosecha pasanankama. Boazqa rikorqa Rut kʼacha kasqanta, sumajtataj llankʼasqanta. Chay tiempopeqa uj qhari mana wawayoj wañupojtin, ujnin familiarnin warminwan casarakuyta atej. Chayrayku Boazqa Rutwan casarakuspa wawayoj karqa. Wawanpa sutintaj Obed karqa, Obedtaj rey Davidpa awelon karqa. Noemij amigasnenqa mayta kusikuspa nerqanku: “Jehová Dios Rutta qosorqa. Paytaj munakusunki. Kunantaj uj allchhita qosunki. Jehová Diosqa jatunchasqa kachun”, nispa.