Israelitas chʼin pampapi kashajtinku, Coré, Datán, Abiram, waj 250 runaspiwan Moisespa, Aaronpa contranpi oqharikorqanku. Paykuna nerqanku: “Kaykamalla kamachiwasqayku. ¿Imaraykutaj qanpuni kamachiwaykuri? ¿Imajtintaj Aaronpuni kuraj kaj sacerdoteri? Jehová Diosqa tukuyninchejwan kashan, nitaj qankunallawanchu”, nispa. Jehová Diostaj chayta mana allinpajchu qhawarqa, contranpi kashasqankutataj nerqa.

Chantá Moisesqa Coreman, runasninmanwan nerqa: “Qʼaya Diosta yupaychana toldoman brasa apaykachanasta, inciensowan juntʼata apamuychej. Diostaj niwasun pitachus ajllasqanta”, nispa.

Qʼayantintaj, Corewan 250 runasninwan Diosta yupaychana toldoman Moiseswan tinkoj rerqanku. Chaypitaj sacerdotespis kankuman jina inciensota qʼosñiriricherqanku. Jehová Diostaj Moisesman, Aaronmanwan nerqa paykunamanta karunchakunankuta.

Datanwan, Abiranwan, familiasninkuwanqa mana Diosta yupaychana toldoman rerqankuchu. Chayrayku israelitasman  Dios nerqa: “Karunchakuychej Corejpa, Datanpa, Abirampa toldo wasisninkumanta”, nispa. Israelitastaj karunchakorqankupacha. Datanwan, Abiramwan, familiasninkuwanqa toldo wasisninku punkupi qhepakorqanku. Jallpʼataj kicharikuspa paykunata oqoykorqa. Diosta yupaychana toldopitaj cielomanta nina uraykamuspa Coreta, 250 runasnintawan ruphaykorqa.

Chantá Jehová Diosqa Moisesman nerqa: “Sapa ayllumanta kurajkunaj tojnunkuman sutinkuta churay. Leví ayllumanta kaj tojnumanqa Aaronpa sutinta churay. Chaykunatataj Diosta yupaychana toldoman apay. Chaypitaj ajllasqay runaj tojnunta tʼikarichisaj”, nispa.

Qʼayantintaj Moisesqa yupaychana toldomanta tojnusta orqhomuspa kurajkunaman rikucherqa. Aaronpa tojnuntaj tʼikarisharqa, almendrasniyojtaj karqa. Ajinamanta Jehová Diosqa rikucherqa Aaronta kuraj kaj sacerdote kananpaj ajllasqanta.