Jehová Diosqa Edén sutiyoj lugarpi uj huertata ruwarqa. Chay huertapitaj ashkha sachʼas, tʼikas, animales ima karqa. Chantá Diosqa Adán sutiyoj runata jallpʼamanta ruwarqa, senqanmantaj kausay samayta phukuykorqa. Chay runataj kausayta qallarerqa. Chaymantataj Diosqa payman nerqa huertata qhawananta, animalesmantaj sutita churananta.

Jehová Diosqa Adanman nerqa: “Tukuynin sachʼasmanta mikhullanki. Ujnillanmanta amapuni mikhunkichu, mikhunkichus chayqa wañunki”, nispa. Chaytataj Adán kasukunanpuni karqa.

Aswan qhepamantaj, Jehová Dios nerqa: “Uj yanapajta ruwapusaj”, nispa. Chayrayku Adanta sinchʼita puñurparichiytawan, ujnin wajtanninmanta uj warmita ruwaporqa. Chay warmitaj Eva sutikorqa. Ajinamanta paykuna ñaupaj kaj familia karqanku. Adanqa warminta rikuspa  manchayta kusikuspa nerqa: “Kay warmita wajtanniymanta Jehová Dios ruwapuwan. Manaña sapitaychu kasaj”, nispa.

Jehová Diosqa Adanman, Evamanwan nerqa: “Ashkha wawasniyoj kaychej, jallpʼamantaj juntʼaychej”, nispa. Diosqa munarqa wawasninkuwan kusisqa kanankuta, kay jallpʼatataj uj paraisoman tukuchinankuta. Jallpʼanchejqa Edén huerta jina may kʼachitu kanan karqa. Jinapis mana ajinachu karqa. Chaytataj qhepan capitulopi yachakusunchej.