31 yachachiy

Moisés wawqinwan faraonman rin

MOISÉS Egiptoman kutiytawan, Aarón wawqinman Dios rikuchisqanamanta willarqa. Chantapis paykuna israelitakunaman kay milagrokunata rikuchimurqanku, paykunataq Jehová Moiseswan kasqanta yacharqanku.

Chaymanta Moisés Aaronwan, Faraonman jinata nimurqanku: ‘Israelpa Diosnin Jehovaqa ajinata nin: ‘Llaqtay chʼin pampaman rinanta saqiy, chaypi kimsa pʼunchayta yupaychanawankupaq’, nispa’. Faraontaq kutichirqa: ‘¿Pitaq chay Jehová Diosri? Mana israelitasta riqta saqisaqchu’, nispa.

Faraonqa, Israel llaqta llamkʼaynikuta saqispa Jehovata yupaychayta munasqanrayku phiñakurqa. Chayrayku astawan israelitasta llamkʼachirqa. Israelitasqa chaymanta Moisesta juchacharqanku, Moisestaq mayta llakikurqa. Chayrayku Jehovaqa Moisesta sunquchanapaq nirqa: ‘Faraón kikin, llaqtayta lluqsinanpaq qharqunqa’, nispa.

Moisesqa wawqinwan Faraonman watiqmanta parlamurqanku. Chaypachaqa juk milagrota ruwarqanku. Aaronqa tuqnunta pampaman chuqaptin juk jatun katariman tukurqa. Faraonpa yachayniyuq runasnin tuqnunkuta chuqaptinkutaq, katarillamantaq tukurqanku. Qhawariy, Aaronpa katarinqa chay katarista mikhukapuchkan. Chaywanpis Faraonqa mana israelitasta kachariyta munarqachu.

Chayrayku Jehovaqa Faraonta wanarpachinan karqa. Egiptoman 10 ñakʼariykunata kachamuspa.

Faraonqa mayta ñakʼarispa Moisesta niq: ‘Amaña ñakʼarichiwaykuchu, Israelta lluqsinanta saqisaq’, nispa. Ñakʼariy tukuptinkamataq, manaña israelitakuna ripunankuta saqiqchu. Chunka kutita ñakʼariytawanraq israelitakuna ripunankuta saqirqa.

¿Kay 10 ñakʼariykunata riqsinkichu? Chayta riqsisunchik.

Éxodo 4:27-31; 5:1-23; 6:1-13, 26-30; 7:1-13.