11 yachachiy

Ñawpa kaq kʼuychi

NOÉ familianwan arcamanta lluqsiytawan, ¿imatataq ruwarqanku? Paykunaqa Diosman juk regalota jaywarqanku. ¿Kay ura dibujitupi jaywachkasqankuta rikunkichu? Kayta ruwarqanku salvakusqankumanta Diosta pachis ninapaq.

¿Jehová kay regalowan kusikurqachu? Ari, Diosninchik mayta kusikurqa. Chayrayku Diosqa, mana jaykʼaq juktawan runata yakuwan chinkachisaqchu, nispa nirqa.

Jallpʼa chʼakiptinqa, Noé familiawan arcamanta lluqsispa musuq kawsayta qallarirqanku. Diosninchikqa paykunata tʼinkachkaspa nirqa: ‘Miraychik, achkhayaychiktaq, kay pachamantaq juntʼaychik’, nisqa.

Ichapis, runaqa Jatun Paramanta uyarispa, ‘juktawan jinata Diosninchik chinkachiwasunchik’, nispa mancharikunkuman karqa. Chayrayku Dios nirqa, ‘manaña juktawan yakuwan Jallpʼata pʼampasaqchu’ nispa. Mana jaykʼaq chayta qunqananpaq, runaman juk señalta qurqa. ¿Ima señaltataq qurqa? Juk kʼuychita churarqa.

Parasqantawan Inti lluqsimuptin kʼuychiqa rikhurimun. Kʼuychiqa kʼachitu coloresniyuq, ¿ichayri? ¿Maykʼaqllapis kay pata dibujitupijina juk kʼuychita rikunkichu?

Diosninchik nirqa: ‘Manaña runasta, nitaq animalestapis juktawan yakuwan chinkachisaqchu. Kʼuychita churani phuyupi. Kʼuychi phuyupi rikhuriptin, chay pacha yuyarisaq juk tratota qamkunawan ruwasqayta, jinallataq animaleswanpis’, nispa.

Chayrayku kʼuychita rikuspa, ¿imatataq yuyarinayki tiyan? Mana jaykʼaq Dios runata Jatun Parawan juktawan tukuchinanta yuyarinayki tiyan.

Génesis 8:18-22; 9:9-17.