46 yachachiy

Jericop pirqasnin

¿IMARAYKUTAQ Jericop pirqasnin thuñikuchkanku? Juk bombapis patanman urmaykuchkanmanjina. Chaywanpis chay tiempopiqa mana bombas kaqchu, nitaq ima cañonespis. ¡Kaypis Jehovap ruwasqan! Qhawarina imaynachus kay karqa.

Jehová Josueta nirqa: ‘Qam maqanakunapaq wakichisqa runakunawan, suqta pʼunchayta llaqtata sapa pʼunchay juk kutita muyuykunkichik tratomanta arcata apaspa. Qanchis sacerdotestaq pututusninkuta waqachispa ñawpaqinta rinanku tiyan’, nispa.

‘Qanchis kaq pʼunchaypitaq qanchis kutita llaqtata muyurinkichik. Chaymanta sacerdotes unayta pututusninkuta waqachichunku, tukuy kallpankuwantaq qhaparichunku. ¡Chayllapi llaqtap pirqasninqa jukllata thuñikunqanku!’, nispa.

Josué llaqtawan Jehová nisqanta ruwarqanku. Paykunaqa chʼinlla muyurqanku, pututuslla, purisqankulla uyarikuq. Jericopi tiyakuqkuna maytacha mancharikurqanku. ¿Chay puka waskhata warkhusqata rikunkichu? ¿Piqpa chay wasi? Rahabpata, payqa watiqaqkuna nisqankumanjina ruwarqa. Tukuy ayllunwan wasi ukhupi suyachkanku.

Qanchis pʼunchaypi, qanchis kutita Jericó llaqtata muyuytawan, pututusta waqachinku, maqanakuqkunataq sinchita qhaparinku, chayllapi pirqasqa thuñirpakunku. Josuetaq nirqa: ‘Tukuy runata wañuchiychik, llaqtata tukuy imasnintawan ruphachiychik, qurita, qullqita bronceta, fierrota ima, ama ruphachiychikchu, chaykunaqa Diosta yupaychana wasinpaq kanan tiyan’, nispa.

Josué 2 watiqaqkunaman nirqa: ‘Rahabta tukuy aylluntawan urqhumuychik’, nispa. Paykunaqa watiqaqkuna nisqankumanjina salvakurqanku.

Josué 6:1-25.