Moisespa Leyninpi aswan kuraj kamachiykunaqa, Jehová Diosta, runa masinchejtawan munakuy. Jehovaqa niña Moisespa Leyninta juntʼananchejta kamachiwanchejchu. Jinapis payqa chay iskay kamachiykunata kasukunanchejta munan (Mt 22:37-39). Chanta, ¿jinallamantachu Diosta, runa masinchejtawan munakusun? Mana. Chay munakuytaqa sonqonchejpi wiñachina tiyan. Chaypajtaj Bibliata sapa día leena tiyan. Leesqanchejpi tʼukurispaqa, Jehová Diosninchejta astawan rejsisun, reparasuntaj “may kʼacha kasqanta” (Sl 27:4). Ajinamanta payta astawan munakusun, pay jinataj yuyayta qallarisun. Chayqa kamachiwasqanchejta kasukunapaj tanqawasun, wajkunatataj tukuy sonqo munakusun (Jn 13:34, 35; 1Jn 5:3). Bibliata leerispa miskʼirichikunapajqa, kay kinsa yuyaychaykuna yanapawasunman.

• Yuyayninchejwan yanapachikuna. Bibliata leeshaspaqa, chaypipis kashasunman jina yuyana. Leeshasqanchejpi imaschus kashasqanta qhawarina, chʼajwaysitusta uyarina, qʼapaysitustapis muskhirina. Pikunamantachus leeshanchej chaykuna, imaynachus kashasqankupi piensarina.

• Waj jinasmanta leerina. Bibliataqa jatunmanta leerisunman chayri grabasqata uyarispa Biblianchejpi qhatisunman. Bibliata kantumanta kantu leenamantaqa, chaypi parlakusqan runasmanta leerisunman chayri imamantachus yachayta munasqanchejman jina leerisunman. Jesuspa kausayninmanta leerishaspataj, Bibliata estudianapaj yanapa folletoj 4, 16 rakʼiyninwan yanapachikusunman. Sapa diapaj ajllasqa texto, Bibliapi mayqen capitulomantachus orqhosqa kasqanta leerisunman. Chayri ima tiempopichus Bibliaj librosnin qhelqakusqanman jina leesunman.

• Entiendeyta munaspa leerina. Bibliamanta ashkha capitulosta rato leenamantaqa, aswan allin uj capitulollata sumajta entiendenanchej, chaypi tʼukurinanchej ima. Leeshanchej chay capituloj ñaupaj versiculosninpi, qhepan versiculosninpiwan piensarina. Imasmantachus parlashasqanta ukhuncharina. Bibliata estudianapaj yanapa folletopi kaj mapaswan, Bibliaj glosarionwan ima yanapachikuna. Imallatapis mana entiendespaqa, chayta astawan ukhuncharina. Atikojtenqa, mashkha unaytachus Bibliata leenchej, chay tiempollatataj leesqanchejpi tʼukurina.