Jeremías 1:1-19
1 Kaykuna kashanku Hilquiaspa wawan Jeremiaspa* parlasqasnin. Hilquiasqa Anatotmanta+ ujnin sacerdote* karqa. Anatotqa Benjamín aylloj* jallpʼasninpi kasharqa.
2 Jehová Diosqa Jeremiasman parlamorqa Amonpa+ wawan Josías+ 13 watastaña Judapi rey kashajtin.
3 Diosqa Jeremiasman parlamullarqataj Josiaspa wawan Jehoiaquim+ Judapi rey kashajtin. Diosqa Jeremiaswan parlarqa Josiaspa ujnin wawan Sedequías+ 11 watasta Judapi kamachiyta juntʼanankama, Jerusalenpi tiyakojkuna phishqa kaj killapi presos apasqa kanankukama.+
4 Jehová Diosqa parlamuwaspa niwarqa:
5 “Niraj mamaykej wijsanpi ruwashasojtiy ñapis rejserqaykiña.*+
Niraj nacekushajtiyki ñapis ajllakorqaykiña.*+
Qanta churarqayki nacionespa profetan* kanaykipaj”, nispa.
6 Noqatajrí nerqani: “Tukuyta Kamachej Señor Jehová Diosníy.
Noqaqa mana parlayta atinichu.+ Jovencitollaraj kani”,+ nispa.
7 Jehová Diostaj niwarqa:
“Ama niychu ‘jovencitollaraj kani’ nispaqa.
Qanqa rinayki tiyan pikunamanchus kachasqayki chaykunaman,tukuyninkumantaj nimunayki tiyan imastachus noqa kamachisqayki chayta.+
8 Ama paykunata manchachikuychu.+
‘Noqamin qanwan kashani salvasunaypaj’,+ nispa nin Jehová Diosqa”.
9 Chaymanta Jehová Diosqa makinta aysarimuspa simiyta llankhariwarqa.+ Chantá Jehová Diosqa niwarqa: “Noqaqa palabrasniyta simiykiman churani.+
10 Kay pʼunchay kachashayki nacionesman, gobiernosmanpis. Qanta kachashayki tʼiranaykipaj tʼunaranaykipajtaj, tukuchinaykipaj thuñinaykipajtaj, sayarichinaykipaj plantanaykipajtaj”,+ nispa.
11 Jehová Diosqa watejmanta parlamuwaspa tapuwarqa: “Jeremías, ¿imatá rikushanki?”, nispa. Noqataj kuticherqani: “Almendro sachʼaj* ramanta rikushani”, nispa.
12 Jehová Diostaj niwarqa: “Arí, allillanta rikunki. Noqaqa chay almendro sachʼa jina rijchʼarisqa kashani parlasqayta juntʼanaypaj”, nispa.
13 Jehová Diosqa ujtawan parlamuwaspa tapullawarqataj: “¿Imatá rikushanki?”, nispa. Noqataj kuticherqani: “Uj mankata* tʼimpushajta* rikushani. Simenqa norte ladomantapacha sur ladoman* sirisqa* kashan”, nispa.
14 Chantá Jehová Diosqa niwarqa:
“Ñakʼareyqa norte ladomantapacha jichʼakamonqakay nacionpi tiyakojkunaj patankuman.+
15 Jehová Diosqa nin: ‘Norte ladopi gobiernosmanta tukuy ayllusta wajyachishani.+
Paykunaqa jamuspa sapa ujninku churanqanku kamachina tiyanasninkutaJerusalenpa yaykuna punkusninpi.+
Paykunaqa sayaykonqanku Jerusalenta muyuykun chay tukuy perqaspa contranpi,jinallataj Judajpa tukuy llajtasninpa contranpipis.+
16 Chay jina sajra imasta ruwasqankurayku imastachus paykunaj contrankuta apachimunayta willasaj.
Paykunaqa saqerpariwaspa+waj diosesman ofrendasta qʼoshñichinku,+makisninkuwan ruwasqallankutataj yupaychanku’,+ nispa.
17 Wakichikuy ruwanaykita juntʼanaykipaj.
Qanqa sayarispa imatachus kamachisusqayta tukuyninta willamunayki tiyan.
Ama paykunata manchachikuychu,+ama noqa kikiy paykunaj ñaupaqenkupi qanta manchachisunaypaj.
18 Noqaqa sumaj perqasniyoj llajtata jina sayachiyki,fierro pilarta jina, cobre perqasta jinataj sayachiyki kay nacionpa contranta,+Judamanta reyespa contranta, jinallataj kuraj kamachejkunasninpa contrantapis,sacerdotespa contranta, jinallataj tukuy runaspa contrantapis.+
19 Paykunaqa seguro qanwan maqanakonqanku,pero mana atipasonqankuchu.
‘Noqamin qanwan kashani+ salvasunaypaj’ nispa nin Jehová Diosqa”.
Sutʼinchaykunasnin
^ Uj aylloqa uj familiamanta miraj ashkha familias kanku.
^ Jeremías suteqa ichapis niyta munan Jehová jatunchan.
^ Chayri “ajllarqaykiña”.
^ Chayri “tʼaqakorqaykiña”.
^ Hebreo parlaypeqa nin, “Rijchʼarisqaj”.
^ Chayri “Jatun simiyoj mankata”.
^ Hebreo parlaypeqa nin, “phukushasqankuta”. Chaywanqa nishan mankaj uranpi ninata phukuspa astawan laurachishasqankuta.
^ Chayri “pata ladomantapacha ura ladoman”.
^ Siriy: waj lugarespi ninku winkuy.
