2 Reyes 7:1-20
7 Eliseotaj nerqa: “Jehová Diospa nisqanta uyariychej. Jehová Diosqa nin: ‘Qʼaya kay horasta jina Samaria punkupi tawa kilos* sumaj ñutʼu jakʼoqa uj siclo* valenqa, pusaj kilos* cebadapis* uj siclo valenqa’, nispa”.+
2 Reypa atienekusqan capitannintaj cheqa Diospa* kamachinta nerqa: “Jehová Dios cielo punkusta kichaykamunman chaypis, nipuni chay nisqaykeqa juntʼakunmanchu”,+ nispa. Eliseotaj nerqa: “Kikin ñawisniykiwan chayta rikunki,+ nitaj mikhunkichu”,+ nispa.
3 Llajta punku chaynejpitaj tawa runas lepra onqoyniyoj karqanku.+ Paykunataj ninakorqanku: “¿Ima nispataj kaypi wañuyta suyakushanchej?
4 Llajtapeqa chay jina yarqhay kashan,+ yaykusun chayqa, chaypi wañusun. Tiyasqalla kaypi kasun chaypis wañullasuntaj. Jaku rina sirio soldadospa campamentonkuman.* Mana wañuchiwasun chayqa, kausasunraj, wañuchiwasun chaytaj wañusun ari”, nispa.
5 Chantá laqhayaykuytaña sayariytawan sirio soldadospa campamentonkuman rerqanku. Chayashajtinkutaj ni pipis chay campamentopi karqachu.
6 Jehová Diosqa sirio soldadosman uyarichisqa guerraman jamoj carretasta, caballosta, may chhika soldadostawan.+ Chayta uyarispa sirio soldadosqa ninakusqanku: “Israelpa reynenqa hititaspa reyesninkuta, Egiptoj reyesnintapis minkʼakun noqanchejwan maqanakunankupaj”, nispa.
7 Chay ratopachataj laqhayaykushajtin sayariytawan ayqesqanku, saqerpasqankutaj toldosninkuta,* caballosninkuta, burrosninkuta, tukuynin campamentota pachitanta. Ajinata paykunaqa ayqekusqanku mana wañuyta munaspa.
8 Chay lepra onqoyniyoj runasqa campamentoman chayaytawan ujnin toldoman yaykorqanku, chaypitaj mikhorqanku, ujyarqankutaj. Chay toldomantataj apakaporqanku qolqe metalta, qorita, ropastawan, pakaykamorqankutaj. Chantá kutimuspa waj toldomanñataj yaykorqanku, chaymantapis tukuy imasta orqhospa pakaykamullarqankutaj.
9 Chantá paykunapura ninakorqanku: “Kaytaqa mana allintachu ruwashanchej. Jaku kay sumaj willayta willamuna. Sutʼiyanantaraj suyaspa mana willamusunchu chayqa, imasmanchus churakusunchej. Kunitan rispa reypa wasinman kay willayta chayachina”, nispa.
10 Rispataj llajta punkoj guardiasninta wajyarqanku, willarqankutaj: “Siriospa campamentonkuman yaykorqayku, nitaj pipis chaypi kasqachu, chʼinpacha kashasqa. Caballoslla, burroslla watasqa kashanku, toldosninkupis pachitan kakushan”, nispa.
11 Punkuta qhawaj guardiastaj chay ratopacha chayta willamorqanku reypa wasinpi kajkunaman.
12 Reytaj tutapacha sayarispa kamachisninta nerqa: “Willarisqaykichej imatachus sirios ruwashawasqanchejta: Paykunaqa yachanku yarqhasqa kashasqanchejta,+ chayrayku campamentonkuta saqerpaspa maypichus pakaykakamunku, paykunaqa nishawanchejchari: ‘Israelitasqa llajtankumanta llojsimonqanku, noqanchejtaj kausashajta paykunata japʼisunchej, llajtankumantaj yaykuykusunchej’,+ nispa”.
13 Reypa ujnin kamachintaj nerqa: “Kay llajtapi puchoj caballosmanta phishqa caballospi uj mashkha runas llojsichunku. Chay runasqa jawaman llojsispapis kay llajtallapi israelitaswan khuska quedakuspapis igual wañonqanku, imaynatachus chay waj israelitas wañunkuña kikinta. Ama jina kaspa, paykunata kachajta saqellawayku ari llojsispa qhawamunankupaj”, nispa.
14 Chay runastaj caballosniyoj iskay carretasta wakichikorqanku rinankupaj. Reytaj paykunata kacharqa siriospa campamentonkuman kay jinata nispa: “Riychej qhawarqamuychej”, nispa.
15 Chay runastaj siriospa lastronkuta qhaterqanku Jordankama. Ñanpeqa tukuy imas wijchʼurayashasqa, ropaspis kaypi jaqaypi wijchʼurayashasqa. Chay imastaqa sirios tʼakarakusqanku manchariywan ayqekushaspa. Chay runastaj kutimuspa reyman willarqanku chay rikusqankuta.
16 Runastaj llajtamanta llojsimuspa sirio soldadospa campamentonkumanta tukuy imata apakaporqanku. Ajinamanta tawa kilos* sumaj ñutʼu jakʼoqa uj siclo valerqa, pusaj kilos* cebadapis uj siclo valerqa, Jehová Dios nisqanman jina.+
17 Reyqa chay atienekusqan capitanta churasqa llajta punkuta qhawananpaj. Chay llajta punkupi kashajtintaj runasqa manchayta llojsimuspa payta saruspa wañurpacherqanku, cheqa Diospa kamachin imatachus reyman nisqanman jina.
18 Cheqa Diospa kamachin imatachus reyman nisqanqa juntʼakorqa, pay nerqa: “Qʼaya kay horasta Samaria llajta punkupi pusaj kilos* cebadaqa uj siclo valenqa, tawa kilos* sumaj ñutʼu jakʼutaj uj siclo valenqa”, nispa.+
19 Capitantaj cheqa Diospa kamachinta nerqa: “Jehová Dios cielo punkusta kichaykamunman chaypis, nipuni chay nisqaykeqa juntʼakunmanchu”, nispa. Eliseotaj chay capitanta nerqa: “Qanqa kikin ñawisniykiwan chayta rikunki, nitaj mikhunkichu”, nispa.
20 Chaypis juntʼakullarqataj. Runasqa chay capitanta llajta punkupi saruspa wañurpacherqanku.
Sutʼinchaykunasnin
^ Hebreo parlaypeqa nin, “uj sea”. Yanapa B14 nisqata leeriy.
^ Uj sicloqa pesarqa 11,4 gramos (0,367 onzas troy). Yanapa B14 nisqata leeriy.
^ Hebreo parlaypeqa nin, “iskay seas”.
^ Cebada: waj lugarespi ninku grano.
^ Glosariopi cheqa Dios nisqata leeriy.
^ Campamentoqa ashkha toldo wasis.
^ Chayri “carpasninkuta”.
^ Hebreo parlaypeqa nin, “uj sea”.
^ Hebreo parlaypeqa nin, “iskay seas”.
^ Hebreo parlaypeqa nin, “iskay seas”.
^ Hebreo parlaypeqa nin, “uj sea”.
