2 Reyes 15:1-38
15 Israelmanta rey Jeroboán* 27 watastaña kamachishajtin, Judamanta rey Amasiaspa+ wawan Azarías*+ rey jina kamachiyta qallarerqa.+
2 Azariasqa kamachiyta qallarishajtin 16 watasniyoj kasharqa, Jerusalenpitaj 52 watasta kamacherqa. Mamanqa Jecolías sutikorqa, Jerusalén llajtayojtaj karqa.
3 Azariasqa Jehová Diospa qhawayninpi allin imasta ruwarqa, tatan Amasías jina.+
4 Jinapis waj diosesta yupaychanapaj pata lugaresqa kakushallarqapuni,+ runaspis chay pata lugarespi jaywanasta ruphachispa qʼoshñichishallarqankupuni.+
5 Jehová Diosqa rey Azariasta lepra onqoywan+ onqoykucherqa, Azariastaj wañupunankama lepra onqoyniyoj karqa. Payqa waj wasipi sapallan tiyakoj,+ wawan Jotantaj+ reypa wasinmanta* cuentayoj karqa, nacionmanta runastapis juzgasharqa.+
6 Azariaspa tukuy kausayninmanta,+ tukuy ima ruwasqanmantapis qhelqasqa kashan Judajpa reyesninmanta parlaj libropi.
7 Chantá Azariasqa ñaupa tatasnin jina wañupullarqataj,+ pʼamparqankutaj maypichus ñaupa tatasnin pʼampasqa kasharqanku chaypi, Davidpa Llajtanpi. Wawan Jotantaj paypa cuentanmanta rey jina kamachiyta qallarerqa.
8 Judamanta rey Azarías+ 38 watastaña kamachishajtin, Jeroboanpa wawan Zacariasqa+ Israel nacionta kamachiyta qallarerqa. Payqa Samariapi sojta killata kamacherqa.
9 Zacariasqa Jehová Diospa qhawayninpi sajra imasta ruwarqa ñaupa tatasnin jina. Ima juchastachus Nebatpa wawan Jeroboán israelitasta ruwacherqa, chay juchasllatataj paypis ruwarqa.+
10 Chantá Jabespa wawan Salumqa Zacariaspa contranta oqharikorqa, Ibleam+ llajtapitaj wañucherqa.+ Zacariasta wañuchiytawantaj Salumqa rey jina kamachiyta qallarerqa.
11 Zacariaspa tukuy kausayninmantaqa qhelqasqa kashan Israelpa reyesninmanta parlaj libropi.
12 Ajinata juntʼakorqa Jehová Diospa parlasqan, Diosqa Jehuman nerqa: “Mirayniykimanta tawa reyes+ Israelpa kamachina tiyananman tiyaykonqanku”,+ nispa. Chaytaj ajinapuni karqa.
13 Judamanta rey Uzías+ 39 watastaña kamachishajtin, Jabespa wawan Salum rey jina kamachiyta qallarerqa. Salumqa Samariapi uj killata kamacherqa.
14 Chantá Gadij wawan Menahemqa Tirzá+ llajtamanta Samariaman wicharerqa, Samariapitaj Jabespa wawan Salumta+ wañucherqa. Wañuchiytawantaj rey jina kamachiyta qallarerqa.
15 Salumpa tukuy kausayninmanta, reypa contranta oqharikusqanmantapis qhelqasqa kashan Israelpa reyesninmanta parlaj libropi.
16 Chantá Menahemqa Tirzá llajtamanta jamuspa Tifsá llajtata thuñiykorqa, wañuracherqataj chay llajtapi tiyakojkunata, chay llajtaj muyuyninpi tiyakojkunatapis. Menahemqa llajta punkuta mana kichamusqankurayku chay llajtata thuñiykorqa, onqoj warmispa wijsankutapis phatacherqa.
17 Judamanta rey Azarías 39 watastaña kamachishajtin, Gadij wawan Menahemqa Israelta rey jina kamachiyta qallarerqa. Samariapitaj chunka watasta kamacherqa.
18 Menahemqa Jehová Diospa qhawayninpi sajra imasta ruwarqa. Ima juchastachus Nebatpa wawan Jeroboán israelitasta ruwacherqa, chay juchasllatataj paypis tukuy kausayninpi ruwarqa.+
19 Asiriaj reynin Pulqa+ Israel nacionpa contranta jamorqa. Menahemtaj Pulwan yanapachikuyta munarqa tukuy nacionnintinta mandonpi japʼinanpaj, chayrayku Pulman qorqa 34.200 kilos* qolqeta.+
20 Menahemqa Israelpi respetasqa runasmanta, qhapaj runasmantawan cobraspa chay qolqeta tantarqa.+ Menahemqa sapa qharimanta 50 siclos* qolqeta pagarqa Asiriaj reyninman. Asiriaj reynintaj riporqa, manataj Israelpi quedakorqachu.
21 Menahempa+ tukuy kausayninmanta, tukuy ima ruwasqanmantapis qhelqasqa kashan Israelpa reyesninmanta parlaj libropi.
22 Chantá Menahemqa ñaupa tatasnin jina wañuporqa, wawan Pecahiastaj paypa cuentanmanta rey jina kamachiyta qallarerqa.
23 Judamanta rey Azarías 50 watastaña kamachishajtin, Menahempa wawan Pecahiasqa Israel nacionta rey jina kamachiyta qallarerqa, Samariapitaj iskay watata kamacherqa.
24 Pecahiasqa Jehová Diospa qhawayninpi sajra imasta ruwarqa. Ima juchastachus Nebatpa wawan Jeroboán israelitasta ruwacherqa, chay juchasllatataj paypis ruwarqa.+
25 Chantá ujnin soldadon Remaliaspa wawan Pecahqa+ paypa contranta oqharikorqa, Samariapitaj Pecahiasta wañucherqa reypa wasinpa torrenpi, Argobtawan Arietawan khuska.* Pecahwan khuska karqanku Galaadmanta 50 runas. Pecahqa Pecahiasta wañuchiytawan paypa cuentanmanta rey jina kamachiyta qallarerqa.
26 Pecahiaspa tukuy kausayninmanta, tukuy ima ruwasqanmantapis qhelqasqa kashan Israelpa reyesninmanta parlaj libropi.
27 Judapi rey Azarías 52 watastaña kamachishajtin, Remaliaspa wawan Pecahqa+ Israel nacionta rey jina kamachiyta qallarerqa, Samariapitaj 20 watasta kamacherqa.
28 Pecahqa Jehová Diospa qhawayninpi sajra imasta ruwarqa. Ima juchastachus Nebatpa wawan Jeroboán israelitasta ruwacherqa, chay juchasllatataj paypis ruwarqa.+
29 Rey Pécah israelitasta kamachishajtin, Asiria nacionpa reynin Tiglat-Pileserqa+ Israel nacionman yaykumuspa japʼikaporqa Ijón llajtata, Abel-Bet-Maacá+ llajtata, Janóah llajtata, Quedes+ llajtata, Hazor llajtata, Galaad+ jallpʼasta, Galilea jallpʼastawan, nisunman tukuynin Neftalí+ jallpʼasta. Chay lugarespi tiyakojkunatataj presosta Asiriaman apakaporqa.+
30 Chantá Elaj wawan Hoseaqa,+ Remaliaspa wawan Pecahj contranpi oqharikorqa, wañucherqataj. Chantá Hoseaqa paypa cuentanmanta Israel nacionta kamachiyta qallarerqa, Judapi Uziaspa wawan Jotán+ 20 watastaña kamachishajtin.
31 Pecahj tukuy kausayninmanta, tukuy ima ruwasqanmantapis qhelqasqa kashan Israelpa reyesninmanta parlaj libropi.
32 Israel nacionpi Remaliaspa wawan Pécah iskay watataña kamachishajtin, Judamanta rey Uziaspa+ wawan Jotanqa+ rey jina kamachiyta qallarerqa.
33 Jotanqa kamachiyta qallarishajtin 25 watasniyoj karqa, Jerusalenpitaj 16 watasta kamacherqa. Mamanpa sutenqa Jerusá karqa, Jerusaqa Sadocpa wawan karqa.+
34 Jotanqa Jehová Diospa qhawayninpi allin imasta ruwarqa tatan Uzías jina.+
35 Jinapis waj diosesta yupaychanapaj pata lugaresqa kakushallarqapuni, runaspis chay pata lugarespi jaywanasta ruphachispa qʼoshñichishallarqankupuni.+ Jotanqa Jehová Diospa wasinpi pata punkuta ruwarqa.+
36 Jotanpa tukuy kausayninmanta, imatachus ruwasqanmantapis qhelqasqa kashan Judajpa reyesninmanta parlaj libropi.
37 Chay wataspi Jehová Diosqa Siria nacionpa reynin Rezinta kacharqa, Remaliaspa wawan Pecahtawan+ Judá nacionwan maqanakunankupaj.+
38 Chantá Jotanqa ñaupa tatasnin jina wañuporqa, pʼamparqankutaj ñaupa tatasnin pʼampasqa kasharqanku chaypi, ñaupa tatan Davidpa Llajtanpi. Wawan Ajaztaj* paypa cuentanmanta rey jina kamachiyta qallarerqa.
Sutʼinchaykunasnin
^ Jeroboán nispaqa Jeroboán II reymanta parlashan.
^ Azarías suteqa niyta munan Jehová yanapan. Azariastaqa Uzías nillankutaj kay versiculospi: 2 Reyes 15:13; 2 Crónicas 26:1-23; Isaías 6:1; Zacarías 14:5.
^ Chayri “kamachina wasinmanta”.
^ Hebreo parlaypeqa nin, “1.000 talentos”. Uj talentoqa pesarqa 34,2 kilos (1.101 onzas troy). Yanapa B14 nisqata leeriy.
^ Uj sicloqa pesarqa 11,4 gramos (0,367 onzas troy). Yanapa B14 nisqata leeriy.
^ Ichá nillanmantaj “Remaliaspa wawan Pecahqa Argobwan Ariewan khuska Pecahiaspa contranta oqharikorqanku Samariapitaj wañucherqanku, reypa wasinpa torrenpi”.
