2 Corintios 6:1-18
6 Noqaykoqa Dioswan khuska llankʼashayku.+ Chayrayku qankunata mañakuyku, Diospa jatun khuyakuyninta ama qhasipaj japʼinaykichejta.+
2 Imaraykuchus payqa nin: “Khuyakuna tiempopi uyarerqayki, salvakuna pʼunchaypitaj yanaparqayki”,+ nispa. Kunanmin khuyakuyta tarina tiempoqa. Kunanmin salvakuna pʼunchayqa.
3 Mana pitapis pantachiykuchu, Diospaj llankʼasqayku ama pisipaj qhawasqa kananpaj.+
4 Astawanpis Diospa kamachisnin kasqaykuta tukuy ima ruwasqaykupi rikuchiyku:+ mayta aguantasqaykupi, ñakʼarisqaykupi, pisichikusqaykupi, llakiykunapi,+
5 jasutʼisqataj presochasqataj kasqaykupi,+ chʼajwas chaupipi sinchʼita trabajasqaykupi, mana puñusqas, mana mikhusqas kasqaykupi,+
6 llimphu kausayniyoj kasqaykupi, yachaypi, pacienciakuypi,+ kʼacha kaypi,+ espíritu santowan pusachikusqaykupi, tukuy sonqo munakuypi,+
7 cheqata parlasqaykupi, Diospa atiyninwan yanapachikusqaykupi,+ jinallataj paña makiykupi,* lloqʼe makiykupipis* cheqa kajpa armasninta japʼisqaykupi.+
8 Wakin kuteqa jatunchasqa kayku, wakin kutitaj pisipaj qhawasqa kayku. Runasqa allin kajtataj, sajra kajtataj noqaykupaj parlanku. Noqaykoqa chʼaukiyajkuna jina* qhawasqa kaspapis, cheqatapuni parlayku.
9 Mana rejsisqa kaspapis, sumaj rejsisqas kayku. Wañoj jinaña* kashaspapis, kausashaykuraj.+ Runas jasutʼiwajtiykupis, mana wañuykuchu.+
10 Llakisqas jina kaspapis kusisqapuni kashayku. Wajchas jina kaspapis, ashkhasta qhapajyachiyku. Mana imayoj jina kaspapis, tukuy imayoj kayku.+
11 Corintomanta hermanosníy, qankunaman sutʼita parlamushayku, sonqoykutapis qankunapaj jatunta kichariyku.
12 Noqaykoj sonqoykoqa qankunapaj mana wisqʼasqachu.+ Qankunaj sonqoykichejrí noqaykupaj wisqʼasqa kashan.
13 Chayrayku wawasniyman jina niykichej: Qankunapis noqayku jina ruwaychej, sonqoykichejta jatunta kichariychej.+
14 Ama uj yugollapi ujchakuychejchu* mana creejkunawanqa.+ ¿Imapitaj kikin kasqa cheqan kajwan sajra kajwanri?*+ Chayri, ¿imapitaj kikin kasqa kʼanchaywan laqhawanri?+
15 Cristowan Satanaswan,* ¿uj yuyaylla kayta atinkumanchu?+ Chayri, ¿imapitaj kikin kasqa creej runawan mana creej runawanri?+
16 Diospa templonpeqa santos mana kayta atinkumanchu.+ Noqanchejtaj kausaj Diospa templon kanchej.+ Imaraykuchus pay nerqa: “Paykuna ukhupi tiyakusaj,+ paykunaj chaupinkupitaj purisaj. Noqa Diosninku kasaj, paykunataj llajtay kanqanku”,+ nispa.
17 Jehová* Diosqa nillarqataj: “Chayrayku paykuna ukhumanta llojsimuychej, tʼaqakuychejtaj. Amaña chʼichipaj qhawasqa imasta llankhaychejchu”,+ “noqataj japʼikapusqaykichej”.+
18 “‘Noqaqa qankunaj tataykichej kasaj,+ qankunataj qhari wawasniy, warmi wawasniytaj kankichej’,+ nispa nin Tukuy Atiyniyoj Jehová* Dios”.
Sutʼinchaykunasnin
^ Ichapis maqanakunapaj.
^ Ichapis jarkʼakunapaj.
^ Chayri “engañajkuna jina”.
^ Chayri “Wañuchisqa kanaykupaj jinaña”.
^ Chayri “Ama ujchakuychejchu”. Griego parlaypeqa chʼulla chʼulla yuntamanta parlashan.
^ Griego parlaypeqa nin, “leyta pʼakiywanri”. Leyta pʼakiy nispaqa Diospa leyninta pisipaj qhawaymanta parlashan.
^ Griego parlaypeqa nin, “Belialwan”. Belial suteqa hebreo parlaypi niyta munan mana imapaj valej.
