“Jehová Diospa makinman saqey tukuy ruwanasniykita, tukuy ima wakichikusqaykitaj allin llojsenqa” (Proverbios 16:3, Diospa Palabran).

 “Ruwasqasniykitaqa Señorpa makinman saqey, imatachus ruwanaykipaj wakichisqasniykitaj ruwakonqanku” (Proverbios 16:3, Qheshwa Biblia).

 Kay versiculopi Diosta yupaychajkunata nin Diospi confiajtinku, yuyaychaykunasninman jinataj ruwajtinku, tukuy ima wakichisqanku allin llojsinanta.

 “Jehová Diospa makinman saqey tukuy ruwanasniykita”. Jehová Diospa a kamachisnenqa manaraj imatapis ruwashaspa kʼumuykukoj sonqowan Diospa yuyaychaykunasninta maskʼanku (Santiago 1:5). Chaytaj may sumajpuni, imaraykuchus mana yachanchejchu kausayninchejpi imaspipunichus rikukunanchejta, llakiykunapis mana yuyasqallamanta chayamuwasunman (Eclesiastés 9:11; Santiago 4:13-15). Chantapis imatachus ruwayta munasqanchejta mana allinta yuyaychakuspalla ruwarpasunman. Chayrayku ashkhasqa tukuy ruwanasninkuta, imatachus ruwayta munasqankutapis Diospa makinman saqepunku. Chaytataj ruwanku Jehovamanta yanapata mañakuspa, munayninman jinataj ruwaspa, nisunman Bibliaj nisqanman jina (Proverbios 3:5, 6; 2 Timoteo 3:16, 17).

 “Ruwasqasniykitaqa Señorpa b makinman saqey” nisqa palabrasqa, hebreo parlaypi niyta munan “ruwanasniykita Señorman japʼichiy”. Chaymanta parlaspataj uj libropi nin: “Chay palabrasqa tʼukurichiwanchej uj llasa qʼepiyoj runapi, chay runataj llasa qʼepinta aswan kallpayoj runaman jaywapusqanpi, nisunman Diosman jaywapusqanpi. Dios jinataj mana pipis kallpayoj kanchu”, nispa. Llampʼu sonqoyoj kanki, Jehovapitaj atienekunki chayqa, ama iskayrayaychu Jehová yanapasunanmanta, sayachisunanmantataj (Salmo 37:5; 55:22).

 “Tukuy ruwanasniykita” nispaqa, mana nishanchu runaspa tukuy ruwasqasninkutapuni Dios allinpaj qhawasqanta chayri bendecisqanta. Imatachus ruwayta munasqanchej allin llojsinanpajqa nisunman Jehová bendecinawanchejpajqa, imatapis munayninman jina, kamachiykunasninman jinataj ruwananchej tiyan (Salmo 127:1; 1 Juan 5:14). Jinapis Jehová Diosqa mana kasukojkunata mana bendecinchu. “Sajra runaspa wakichikusqankutataj mana allinman chayachin” (Salmo 146:9). Chaywanpis kamachiykunasninta tukuy sonqo kasukojkunataqa, nisunman palabranman jina ruwajkunataqa yanapan (Salmo 37:23).

 “Tukuy ima wakichikusqaykitaj allin llojsenqa”. Kay parte waj Bibliaspi nin: ruwasaj nisqaykitaj “sayachisqa kanqa” chayri “juntʼakonqa”, nispa. Hebreo qhelqasqaspi nisunman Ñaupa Testamentopi “sayachisqa” palabraqa oqharikun imata sayarichinapajpis cimientota churanamanta parlanapaj. Oqharikullantaj Diospa ruwasqasnin sumaj sayachisqa kasqanmanta parlanapaj (Proverbios 3:19; Jeremías 10:12). Ajinallatataj Diosqa piskunatachus allinpaj qhawan chaykunata sumajta sayachin, imatachus ruwasaj nisqankupi allin rinanpaj. Chaytataj ruwan mana manchachikunankupaj, kusisqataj kausakunankupaj yanapaspa, necesitasqanku imastapis qospa (Salmo 20:4; Proverbios 12:3).

 Kay versiculotaqa rey Salomón escriberqa, payqa casi tukuynin Proverbios librota escriberqa. Diosninchej yachayta qosqanraykutaj may chhika proverbios nisqa sumaj yachachiykunasta escriberqa (1 Reyes 4:29, 32; 10:23, 24).

 Salomonqa Proverbios 16 capituloj qallariyninpi Jehovata may yachayniyoj kasqanmanta jatunchan, reparachiwanchejtaj Diosqa jatunchakojkunata millachikusqanta (Proverbios 16:1-5). Qhepan versiculospitaj kayta sumajta reparachiwanchej: Uj runaqa llampʼu sonqo kajtillan, Jehovaj munayninman jinataj ruwajtillan sumaj yachayniyojman tukunman, kausayninpitaj allin rinman. Chaymanta ashkha kutista Proverbios libropi parlan (Proverbios 16:3, 6-8, 18-23). Mana Proverbios librollapichu chaymanta parlan, manachayqa Bibliamanta waj partespipis chaymanta parlallantaj (Salmo 1:1-3; Isaías 26:3; Jeremías 17:7, 8; 1 Juan 3:22).

 Proverbios libro imasmantachus parlashasqanta yachanaykipaj kay videota qhawariy.