Armagedonqa uj guerraj sutin. Chay guerrapeqa Dioswan kay jallpʼamanta gobiernoswan maqanakonqanku. Chay gobiernos, paykunata apoyajkunapis, Diosta mana kasukuspa contranpi churakunku (Salmo 2:2). Armagedón guerraqa, tukuy chay gobiernosta chinkachenqa (Daniel 2:44).

 Armagedón palabraqa uj kutillata Bibliapi rikhurin. Chaytaj kashan Apocalipsis 16:16 versiculopi. Apocalipsis libro nisqanman jina, ‘jallpʼantinmanta reyesqa’, “hebreo parlaypi Armagedón nisqa cheqapi” tantasqa kanqanku. Paykunaqa “Tukuy Atiyniyoj Diospa jatun pʼunchayninpi kanqa”, chay guerrapaj tantakonqanku (Apocalipsis 16:14).

 ¿Pikunataj Armagedón guerrapi maqanakonqanku? Cielomanta soldadoswan Diospa enemigosninwan maqanakonqanku. Cielomanta soldadosqa ángeles kanku, Comandantenkutaj Jesucristo (Apocalipsis 19:11-16, 19-21). Diospa enemigosnintaj kanku, Jehová Diosta mana kasukuyta munajkuna, payta pisipaj qhawajkuna ima (Ezequiel 39:7). Armagedón guerrapeqa, Jesuswan angelesninwan atipanqanku.

 ¿Maypitaj Armagedón guerra kanqa? Mundo enteropi kanqa. Chay guerrapi maqanakojkunaqa, mana uj cheqallapichu maqanakonqanku (Jeremías 25:32-34; Ezequiel 39:17-20).

 Armagedón palabraqa, hebreo parlaypi Har Meghiddóhn palabramanta jamun. Chay palabrataj niyta munan, “Meguidó orqo”. Jinapis ni maypi kanchu chay sutiyoj lomaqa. Ñaupa tiempopi, Meguidoqa Israelmanta ujnin llajtan karqa. Chay llajtapitaj, jinallataj qayllanpi kaj Jezreel vallepipis, ashkha guerras karqa. Chaykunamanta wakinpeqa, Jehová Dios llajtanta yanaparqa enemigosninta atipananpaj (Jueces 5:19, 20; 2 Reyes 9:27; 23:29). Chantapis Meguidó llajtaj muyuynenqa juchʼuylla. Jallpʼantinmanta reyeswan, soldadosninkuwantaj, mana chayman yaykunkumanchu. Chayrayku Armagedonqa mana uj lugarchu kashan, manaqa maypachachus tukuy gobiernos, Dioswan maqanakunankupaj sayaykonqanku, chay kashan.

 ¿Imaynataj Armagedón guerra kanqa? Mana yachanchejchu imaynatachus Dios Armagedón guerrapi atiyninta apaykachananta. Ichá enemigosninta chinkachinanpaj, ñaupa tiempopi jinallataj granizota apachimonqa, jallpʼata kharkatichenqa, sinchʼi parasta apachimonqa, ninatawan azufretawan parachimonqa, lliuj lliujkunata chayri onqoykunata apachimonqa (Job 38:22, 23; Ezequiel 38:19, 22; Habacuc 3:10, 11; Zacarías 14:12). Diospa enemigosninmanta wakintajrí, paykunapura wañuchinakonqanku. Jina kajtinpis, paykunaqa Dioswan maqanakushasqankuta yachanqanku (Ezequiel 38:21, 23; Zacarías 14:13).

 Armagedón jamojtin, ¿kay jallpʼanchej chinkanqachu? Mana. Armagedón guerraqa mana mundonchejta chinkachenqachu. Diosqa kay jallpʼata ruwarqa, runas chaypi wiñaypaj kausakunankupaj (Salmo 37:29; 96:10; Eclesiastés 1:4). Chayrayku Armagedonpeqa, mana tukuy runaschu chinkachisqa kanqanku. Imaraykuchus Bibliaqa Diospa “may chhika” kamachisnin Armagedonmanta salvakunankuta nin (Apocalipsis 7:9, 14; Salmo 37:34).

 Chanta, ¿manachu Biblia yachachin kay “mundo” Armagedonpi chinkachisqa kananta? Mana. Bibliaqa “mundo” nispa, sajra runasmanta wakin kutis parlan (1 Juan 2:15-17). Chayrayku Armagedón “mundota” tukuchenqa nispaqa, sajra runas chinkachisqa kanankumanta parlashan (Mateo 24:3, Qheshwa Biblia).

 ¿Maykʼajtaj Armagedón guerra kanqa? Armagedón guerraqa “manchay ñakʼariy” tiempo pasayta qallarenqa. Ima diachus chay kananmantataj Jesús nerqa: “Chay pʼunchaymanta, chay horamantawanqa mana pipis yachanchu, ni cielopi kaj angelespis ni noqapis, chaytaqa Tatallay yachan”, nispa (Mateo 24:21, 36). Jinapis Biblia willawanchej, Armagedonqa Jesuspa kutimunan tiempopi kananta. Chay tiempotaj 1914 watapi qallarerqa (Mateo 24:37-39).