Arí. Diosqa munan, payta yupaychanapaj wajkunawan khuska tantakunanchejta. Chayrayku Biblia nin: “Ujkuna ujkunawan purajmanta qhawarinakunachej, ajinamanta astawan munakuy kananpaj, allin ruwaykunatataj ruwananchejpaj. Amataj tantakuykunaman riyta saqenachu”, nispa (Hebreos 10:24, 25).

 Jesuspis nerqa: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:35). Chaywanqa nisharqa, yachachisqasnin paykunapura tantakunankuta. Imaraykuchus ajinata tantakuspaqa, munakuyninkuta rikuchiyta atinkuman karqa. Chayrayku Jesuspa yachachisqasnenqa, Diosta yupaychanankupaj congregacionespi ujchasqa karqanku, sapa kutitaj tantakoj kanku (1 Corintios 16:19). Ajinamanta tukuyninku mundontinpi uj familia jinalla karqanku (1 Pedro 2:17).

Uj religionniyoj kaspapis, Bibliaj nisqanman jina kausakuna tiyan

 Bibliaqa Diosta yupaychanapaj tantakunapuni kasqanta nin. Jinapis ni maypi ninchu, uj religión salvanawanchejta. Diosta kusichinapajqa, Bibliamanta yachakusqanchejman jina kausakunanchej tiyan. Chayrayku Biblia nin: “Tata Diosninchejpa qhawayninpi mana chʼichiyoj llimphu yupaychayqa kay jina: wajcha wawasta, viudasta llakiyninkupi yanapay, kay mundowantaj mana chʼichichakuy”, nispa (Santiago 1:27).