Diosqa, tukuy sonqo munayninman jina mañakojtinchej uyariwanchej. Chantapis Bibliaqa ashkhas runasmanta willawanchej, paykunataj yanapata necesitashajtinku Diosmanta mañakorqanku. Paykunamanta yachakoyqa Diosmanta mañakunapaj yanapawasunchej, ñaupaj kutirayku chayta ruwajtinchejpis.

•   “Señor Tata Diosníy, yanapaway; khuyakuyniykiman jina salvaway” (Salmo 109:26).

•   “Noqarí, llakisqa kashani, wajchataj. Tata Dios, usqhayta jamuy yanapawaj” (Salmo 69:6).

 Kay salmosta qhelqajqa, Diospi creeynin sinchʼi kasqanta nisunman. Mana sinchʼi creeyniyoj kajtinchejpis, Diosqa uyariwasunman tukuy sonqo paymanta mañakojtinchej. Biblia niwanchej Diosqa “llakisqa sonqoyojkunata, umphuyasqa sonqoyojkunatawan” uyarisqanta (Salmo 34:18, Qheshwa Biblia).

 Ichapis wakin kuti yuyasunman Diosqa noqanchejmanta may karupi kasqanta, nitaj llakiykunasninchejmanta interesakusqanta. Chaywanpis, Biblia nin: “Aswan patapipis Tata Diosqa kachun, llampʼu sonqosta qhawamumpuni, may kasqankuta yuyakoj runastatajrí karullamanta rejsimun”, nispa (Salmo 138:6). Astawanpis Jesusqa discipulosninman nerqa: “Ajinallatataj, umaykichejpi chujchasniykichejpis tukuyninku yupasqa kashanku”, nispa (Mateo 10:30). Sichus Dios umanchejpi chujchanchej mashkhachus kasqanta yachan chayqa, ¿manachu imachus phutichiwasqanchejta willakojtinchej astawanraj uyariwasunman? (1 Pedro 5:7).