Bibliaqa yachachiwanchej kay jallpʼapi tukuy kausajkunamanta pisi runaslla cieloman rinankuta (Apocalipsis 14:1, 3). Cielopitaj Jesuswan khuska reyestaj sacerdotestaj kanqanku (Lucas 22:28-30; Apocalipsis 5:9, 10). Ashkha runastaj kausarimonqanku kay jallpʼapi uj paraisopi kusisqas kausakunankupaj (Salmo 37:11, 29).

 Bibliaqa mana ninchu alqetus chayri waj animalitos wañupuspa cieloman ripunankuta. Imaraykuchus animalitosqa mana imatapis ruwayta atinkuchu cieloman wajyasqa kanankupaj (Hebreos 3:1). Animalitosqa mana Diosta rejsiyta atinkuchu, nitaj paypi creeyta atinkuchu, nillataj kamachiykunasnintapis kasukuyta atinkuchu (Mateo 19:17; Juan 3:16; 17:3). Chantapis runaslla ruwasqas karqanku wiñaypaj kausakuyta atinankupaj (Génesis 2:16, 17; 3:22, 23).

 Cieloman rinankupaj ajllasqa kajkunaqa ñaupajtaqa kausarimunankuraj tiyan (1 Corintios 15:42). Bibliaqa wakin wañusqas kausarichisqa kasqankumanta parlan (1 Reyes 17:17-24; 2 Reyes 4:32-37; 13:20, 21; Lucas 7:11-15; 8:41, 42, 49-56; Juan 11:38-44; Hechos 9:36-42; 20:7-12). Jinapis chay kutispi runaslla kausarichisqas karqanku, nitaj animalitoschu.

•  ¿Animalitos almayojchu kanku?

•  ¿Alma wañunchu?

•  ¿Animalitos juchallikunkuchu?

•  ¿Ima nintaj Dios animalitosta sufrichiymanta?

 Mana. Bibliaqa yachachin animalitospis runaspis almas kasqanchejta (Números 31:28, sutʼinchaynin). Diosqa ñaupaj runata ruwashajtin nisunman Adanta ruwashajtin, payman mana uj almatachu qorqa, manachayqa “kausay samayta phukuykorqa”, ajinamanta “kausaj almaman tukorqa”, nisunman kausayta qallarerqa (Génesis 2:7, sutʼinchaynin). Almaqa nisunman runapis animalespis ruwasqa kashanku “jallpʼamanta”, ‘kausay samaymantawan’.

 Arí. Bibliaqa yachachin alma wañusqanta (Ezequiel 18:20, sutʼinchaynin). Animalespis runaspis wañupuspa jallpʼaman tukupunku (Eclesiastés 3:19, 20). Chayqa niyta munan wañojkunamanta ni imapis kausashaj qhepakusqanta. a

 Mana. Juchaqa kashan Diospa kamachiykunasninpa contranpi imatapis ruway chayri yuyay. Uj runaqa juchallikun kasukuytachus manachus ajllaspa, jinapis animalitosqa mana ajllayta atinkuchu. Animalitosqa chay pisi kausayninkupi imaynachus ruwasqa kasqankuman jinalla imatapis ruwanku (2 Pedro 2:12). Chantá wañupunku mana juchallikuspapis, chaypitaj kausayninku tukukapun.

 Diosqa mana munanchu animalitosta sufrichinanchejta. Payqa animalitosta runaspa mandonman churarqa, jinapis chayqa mana niyta munanchu maltratanankupaj derechoyoj kasqankuta (Génesis 1:28; Salmo 8:6-8). Diosqa may valorniyojpaj qhawan tukuy animalitosta, hasta pʼisqetustapis (Jonás 4:11; Mateo 10:29). Chayrayku payta yupaychajkunaman kamacherqa sumajta animalitosninkuta cuidanankuta (Éxodo 23:12; Deuteronomio 25:4; Proverbios 12:10).