Ni ahnsou kan me anahn, Sounkadehdehn Siohwa kan kin kihda sawas ong riarail Kristian kan oh pil meteikan. Irail kin wia met sang ni limpoak, oh met wia kilelepen Kristian mehlel.​—Sohn 13:35.

Kileldi pah iei kairekdi en sawas kan me kohda erein sounpwong 12 me imwisekla nanpwungen pahr 2012. Sawas ong kakehlaka nanpwungmwahu rehn Siohwa oh kansenamwahwihala me nsensuwedla kan sohte iang kileldi. Sawas riau pwukat kin ahnsou koaros iangete soangen sawas teikan me kohda. Pwihn me Kin Apwalihala Kahpwal Laud kan (Disaster Relief Committees), me Ohpis en Sounkadehdehn Siohwa kan idihada, kin koasoanehdi pali laud en sawas pwukat. Patehng met, mwomwohdiso kan me kahpwalo wiawi ie pil kin kaukaule iang sawas.

Sapan: Nan March 11, 2011, rerrer en sahpw oh iloak laud wiawi paliepeng en Sapan oh met kahrehda kahpwal laud ong aramas lopw kei. Sounkadehdehn Siohwa kan nan sampah pwon toukihda mwohni, arail koahiek, oh soahng kan me anahn pwehn sewese kamwahwihala kahpwalo. Kilang neitail kisin kasdou me pid sawas me kohda ong rerrer en sahpw nan Sapan.

Brazil: Lapake oh engk en sapw kemehla aramas epwiki kei. Pwehki met, Sounkadehdehn Siohwa kan kadarala wasao ten 42 en mwenge kan me sohte kin mwadang en kiteila, pwoatol en pihl 20,000, ten 10 en likou kan, oh ten 5 en kepwehn kamwakel, iangahki wini oh pil soahng teikan.

Congo (Brazzaville): Ni ahnsou me wasahn nekinek pakudang oh kanengen kesik kan pospeseng, e kauwehla douluhl imwen Sounkadehdehn Siohwa 4, oh imwen Sounkadehde 28 pil ohla. Mwenge oh likou kohwong irail ko me kahpwalo lelohng, oh Sounkadehde kan wasao mweidohng irail pwukat en kousoan rehrail.

Congo (Kinshasa): Wini kohwong irail kan me ahnekihda soumwahu en kolera. Likou kan kohwong irail kan me lelohng kahpwal pwehki lapake me keteu laud kahrehda. Sawas en wini, kisin werentuhke kan ong padok, oh likou tohto kohwong irail kan me kin mi nan wasa me irail me tangasang sapwarail pwehki mahwen de kahpwal laud kin mi ie (refugee camp).

Venezuela: Keteu laud kahrehda lapake oh engk en sapw. Pwihn me kin apwalihala kahpwal laud kan sewesehda Sounkadehde 288 me lelohng kahpwal pwukat. Ihmw kapw me daulih 50 samwa kokouda. Patehng met, re kin sewesehda irail kan me imwarail kan kakete ohkihla uhloal laud sang lehn Lake Valencia.

Philippines: Melimel kin kahrehda lapake kan nan ekei wasa nan sahpwo. Ohpis en Sounkadehdehn Siohwa kan kadarala mwenge oh likou kan ong irail kan me lelohng kahpwalo, oh Sounkadehde kan wasao iang sawas en kamwakel mwurin lapakeo kohdi.

Canada: Mwurin mwasikada laud ehu wiawi nanwel en Alberta, mwomwohdisohn Slave Lake ale sawas en mwohni laud sang Sounkadehde kan nan sahpwo pwehn sewese kamwakelehda wasao. Pwehki uwen mwohnio daulihala dahme anahn, mwomwohdiso wet toukihda laudsang elep en mwohnio pwehn sewese irail kan me lelohng kahpwal laud nan sahpw teikan.

Côte d’Ivoire: Wasahn kousoan, sawas en wini, oh kepwe kan kohwong irail kan me lelohng kahpwal en mahwen mwohn, erein, oh mwurin kahpwal wet wiawi.

Fiji: Pali laud en peneinei Sounkadehde 192 kan lelohng kahpwal pwehki keteu laud me kahrehda lapake laud oh kauwehla arail mwetuwel kan. Mwetuwel ko wia elen wiahda neirail mwohni oh kanarail mwenge. Irail alehdi sawas en mwenge me kohda ong irail.

Ghana: Irail kan me lelohng kahpwal en lapake nan palimesehn sahpwo alehdi sawas en mwenge, kisin werentuhke kan, oh wasahn kousoan.

Wehin Amerika: Nan sahpw siluh, elipilip laud kan (tornadoes) kauwehla ihmw 66 me Sounkadehde kan kin kousoan loale oh pil ihmw 12 en Sounkadehde kan ohla douluhl. Mendahki pali laud en irail naineki insurans ong imwarail kan, sawas en mwohni kohda pwehn sewesehla kahpwal ko.

Argentina: Mwomwohdisohn Sounkadehdehn Siohwa kan sewese irail kan ni palieir en sahpwo me imwarail kan ohkihla pehs en pwolkeno.

Mozambique: Mwenge kohwong aramas daulih 1,000 me lelohng kahpwal en sohte keteu ahnsou werei.

Nigeria: Sawas en mwohni kohwong Sounkadehde 24 me ohla pwehki wararail buso aksident. Sawas pil kohwong me tohto ni paliepeng en sahpwo me sohla imwarail pwehki uhpenehn pelien lamalam kan.

Benin: Wini, likou, tehi en amwise, pihl mwakelekel, oh wasahn kousoan kohwong irail kan me lelohng kahpwal en lapake laud.

Dominican Republic: Mwurin melimel laud me adaneki Irene, mwomwohdisohn wasao sewese kamwahwihala ihmw kan oh pil sawaskihda kepwe kan.

Ethiopia: Kahpwal en sohte keteu ahnsou werei wiawi wasa riau oh lapake laud wiawi pil ehu wasa, sawas en mwohni kohda pwehn apwalihala anahn en irail ko me lelohng kahpwal pwukat.

Kenya: Sawas en mwohni kohwong irail kan me lelohng kahpwal en sohte keteu ahnsou werei.

Malawi: Sawas kohwong irail kan me mihmi nan wasa me irail me kin tangasang sapwarail pwehki mahwen de kahpwal laud kin mi ie (refugee camp) nan Dzaleka.

Nepal: Engk en sapw kauwehla laud imwen Sounkadehde men. Ihmw ehu kokouda ong ih pwehn kousoan loale erein ahnsou kis, oh sawas kohwong ih sang mwomwohdiso ehu wasao.

Papua New Guinea: Aramas akan isikada ihmw waluh me Sounkadehde kan kin kousoan loale. Koasoandi wiawihda pwehn pwurehng kauwada ihmw pwukat.

Romania: Lapake laud kauwehla ekei imwen Sounkadehde kan. Sawas kohda pwehn pwurehng kauwada imwarail ko.

Mali: Mwohni kohwong ekei me sohte itar kanarail mwenge pwehki arail mwetuwel kan sohte pweida mwahu pwehki sohte itar keteu ahnsou werei. Mwohni wet kohsang Senegal, sahpw ehu me karanih irail.

Sierra Leone: Toahkte kan me wia Sounkadehde kei sang France sewese Sounkadehdehn Siohwa kan me mihmi wasa kan me kahpwal en mahwen wiawi.

Thailand: Lapake laud kauwehla ekei wasa. Pwihn me kin apwalihala kahpwal laud kan kamwahwihala oh kamwakelehda ihmw 100 oh Wasahn Kaudok 6.

Czech Republic: Mwurin lapake laud kauwehla ekei ihmw kan nan Czech Republic, Sounkadehde kan sang Slovakia, me karanih wasao, iang sawas apwalihala kahpwal laud wet.

Sri Lanka: Pali laud en sawas ong apwalihala kahpwal en iloak laud me wiawi wasaht nekla.

Sudan: Mwenge, likou, suht, oh plastik laud de komi kan ong mehn pereper pekederla rehn Sounkadehdehn Siohwa kan me anahne kohkohsang imwarail kan pwehki mahwen nan sahpwo.

Tanzania: Erein lapake laud, ahn peneinei 14 kepwe kan sohla mie. Mwomwohdiso kan wasao sawaskihda likou oh kepwehn ihmw. Ehu ihmw pwurehng kokouda.

Zimbabwe: Pwehki sohte keteu ahnsou werei, duhpek wiawi ehu wasa nan sahpwo. Mwenge oh mwohni kohwong irail kan me lelohng kahpwal wet.

Burundi: Sawas ong apwalihala kahpwal kan, iangahki sawas en palien wini, kohwong irail kan me tangasang sapwarail pwehki mahwen de kahpwal laud kin mi ie.