Medewehla me met wiawi: Karen mi ni party ehu oh e sohte lel minit eisek e rongada ngihl ehu sang mwuri me e ese.

Karen sohpeila kilangada kompoakepaho Jessica me kolokol pwoatol en pihru rioapwoat me ahpwtehn kedda. Jessica kapahla ehu pwoatolo mwohn mesen Karen oh nda, “Ke sohte nohn pwulopwul pwehn ahneki ekis peren e?”

Karen men nda soh, ahpw Jessica kompoakepah. Oh Karen sohte men kompoakepaho en leme me e kasangat. Pil ehu, Jessica iei emen serepein mwahu. Kahrehda ma e iang niminim, mweinte nim sakau sohte nohn suwed. Karen pein medemedewe, ‘Ihte pihru ehu, e sohte duwehte ale wini en kasahliel kan.’

Ma kowe me lelohng soahng me wiawihong Kareno, dahme ke pahn wia?

Pwehn wiahda pilipil loalokong nan soangen irair wet, ke anahne ese soangen aramas dahmen kowe. En ese soangen aramas dahmen kowe, kin wehwehki soahng kan me ke kesempwalki oh kamehlele. Ni ahmw wehwehkihier met, e pahn kamwakid uhk en kakehr pein kaunuhkada a kaidehn mweidohng meteikan en kaunuhkada.—1 Korint 9:26, 27.

Ia duwen ahmw pahn kak kakairada soangen kehl wet? Ehu ahl mwahu en tepida wia met iei en sapengala peidek kan me pahn pwarada mwurin met.

En ese ahmw koahiek oh ahmw irair mwahu kan kak kakehlaka ahmw likilik.

KARASARAS NAN PAIPEL: Wahnpoaron Pohl ntingihedi: “Ele I me soakoahiek nin lokaia, ahpw kaidehn I soaloalokong.” (2 Korint 11:6) Sang ni Pohl eh kin pisetik oh tamataman audepen Paipel kan, e kak kesihnenda teng ni ahnsou me meteikan kin uhwong ih. E sohte kin mweidohng arail koasoi kansensuwed kan ong ih en kaluwetehla eh likilik.—2 Korint 10:10; 11:5.

KASAWIH PEIN KOWE: Ntingihdi pah soangen koahiek me ke ahneki de mehkot me ke kaiahnda esehla.

Eri kawehwehda soangen irair dahieu me sansal rehmw. (Karasepe, ke kin nsenoh? kadek? meteikan kin likih iuk? ahnsou koaros mwadang?)

Duwehte sein pwon pahn luwetala ma ehu ring ko kin luwet, dahme ke kesempwalki oh kamehlele kak mwadangete suwedla ma ke mweidohng ahmw luwet kan en kaunda ahmw mour.

KARASARAS NAN PAIPEL: Pohl kin ese eh luwet kan. E ntingihedi: “Nan kapehdi kin perenkihda kosonned en Koht. Ahpw I kin kilang ehu soangen koasoandi tohrohr me kin wia eh doadoahk ni paliwereiet—ehu soangen koasoandi me kin uhwong kosonnedo me mohngiongi kin pwungki. Koasoandi tohrohr wet kahrehiong ei selidi pahn kosonned en dihp.”—Rom 7:22, 23.

KASAWIH PEIN KOWE: Soangen luwet dah me ke anahne ese kaunda?

Ke pahn doulong nan taxi ehu oh padahkihong me tangahki sidohsao en pidipidakihte wasa ehu lao nekla kahs en sidohsao? Met mwekid pweipwei ehu, oh pil kesehla mwahl mwohni!

Ia iren mehn kasukuhl? Mehn akadei kan kin kihong uhk mehkot ken akadeiong nan ahmw mour. Mie wasa ke pahn kohla oh koasoandi ong mwomwen ahmw pahn lella mwo.

KARASARAS NAN PAIPEL: Pohl ntingihedi: “Ihme I sohte kin tang, pweiengki.” (1 Korint 9:26) Pohl sohte kin mweidohng soahng sohte lipilipil en kin kamwakamwakid eh mour, ahpw e kin wiahda mehn akadei kan.—Pilipai 3:12-14.

KASAWIH PEIN KOWE: Ntingihdi pah soahng siluh me ke men akadeiong oh alehdi nan pahr me pahn wad.

Ma sohte mehkot me ke kamehlele eri ke pahn sehse dahme ke pahn wia. Ke pahn duwehte chameleon me kin wekidala poh kan pwehn duwehla ienge kan, met wia kilel sansal ehu duwen ahmw kin sehse soangen aramas dahmen kowe.

Weksang met, ma ahmw wiewia kan kin poahsoankihda soahng kan me ke kamehlele, eri ke kolokolete ahmw kin ese soangen aramas dahmen kowe, mendahki dahme meteikan kin wia.

KARASARAS NAN PAIPEL: Ele ni ahnsou me e pwulopwulte, soukohp Daniel “lemedahr” nan eh mohngiong en idawehn sapwellimen Koht kosonned kan, mendahki e dohsang eh peneinei. (Daniel 1:8) Ni eh wia met, e kin kolokolete eh kin ese soangen aramas dahmen ih. Daniel kin mour pahrekiong soahng kan me e kamehlele.

KASAWIH PEIN KOWE: Soahng dah kan me ke kin kamehlele? Karasepe: Ke kin kamehlele me mie Koht? Ma ei, dahme kahrehda? Ia mehn kadehde me kamehlelehiong uhk me e ketin mie?

Ke kamehlele me sapwellimen Koht kaweid en tiahk mwahu kan kin wia kamwahu ong uhk? Ma ei, dahme kahrehda?

Ni kaimwisekala, mehnia me ke men duwehte, tehn tuhke pwoat me pwupwudi oh kisinieng kin ipirseli mwahl de tuhke pwoat me poadada teng oh melimel laud sohte kak kauwehla? Kakehlailihala ahmw ese soangen aramas dahmen kowe oh ke pahn duwehla tuhkeo. Oh met pahn seweseiuk en sapengala peideko, Ihs Ngehi?