1, 2. Peidek dah me ke anahne pein idek rehmw mwurin omw mweisangehr kaudok likamw? Dahme kahrehda ke leme met kesempwal?

 IA DUWEN ma ke diarada me mie emen me waido oh kesehdiong pwoisin nan pihl me ke kin nim oh met pihlo kakete kemeiukala? Dahme ke pahn wia? E sansal me ke pahn mwadangete rapahki pihl sang ehu wasa tohrohr. Ahpw mwurin omw pahn wia met, ke pahn pil pwunpwunodikihte peidek wet, ‘Pwoisino sou milahr nan paliwereiet?’

² Met pil kin pid kaudok likamw. Paipel kin padahngki me soangen kaudok wet kin saminkilahr padahk likamw akan oh wiewia samin kan. (2 Korint 6:17) Iei me kahrehda e kesempwal ken pedoisang nan “Papilon Lapalap” me iei minimin en kaudok likamw koaros en sampah. (Kaudiahl 18:2, 4) Ke wiahier met? Ma iei, met inenen mwahu. Ahpw pil miehte soahng kan me anahn sang ihte ken pedoisang de kihieisang edemwen sang nan kaudok likamw. Mwurin mwo, ke anahne pein idek rehmw, ‘Mihmiehte mehkot me pid kaudok likamw rehi?’ Tehk ekei karasepe kan.

3. (a) Dahme Paipel kin mahsanihki duwen doadoahngki sansal kan oh dikedik kan? Dahme kahrehda sapwellimen Koht madamadau ong met pahn apwal ong ekei en pwungki? (b) Dahme ke anahne wiahiong omw dipwisou kan me pidada kaudok likamw?

³ Ekei aramas kin kolokol sansal kan oh dikedik en eni kan oh pei sarawi kan nan imwarail erein sounpar tohto. Ke kin iang wia soahng wet? Ma iei, ele ke pahn pehm me e sapwung en kapakap ong Koht ahpw sohte kilang de doadoahngki soahng pwukat. Ele ke uhdahn ahnlahr doadoahngki dipwisou pwukat. Ahpw Koht me pahn mahsanih ia duwen atail pahn kaudokiong ih, oh Paipel kin padahngki me e sohte kupwurki kitail en doadoahngki soahng pwukat. (Wadek Eksodus 20:4, 5; Melkahka 115:4-8; Aiseia 42:8; 1 Sohn 5:21) Kahrehda ke kak uhki oh tengediong kaudok mehlel ni omw pahn kauwehla omw dipwisou kan me pidada kaudok likamw. Ke uhdahn anahne ahneki sapwellimen Siohwa madamadau me mepwukat wia mehkot me e ketin “kalahdeki.”​—Deuderonomi 27:15.

4. (a) Ia duwen atail ese me sohte katepen pwongih peneinei me melahr akan? (b) Dahme kahrehda Siohwa ketin keinepwihsang sapwellime aramas akan soangen wiepen wunahni koaros?

 ⁴ Pwongih peneinei me melahr akan pil kin rek nan kaudok likamw tohto. Mwohn aramas akan ar esehla padahk mehlel en Paipel, ekei kin kamehlele me aramas melahr akan kin momour nan wasa me aramas sohte kak kilang oh me irail kak sewese de kauwehla aramas akan. Mwein mahs ke kin nantihong en kaperenda omw peneinei me melahr akan. Ahpw ke sukuhlkier nan Irelaud 6 en pwuhk wet me aramas melahr akan sohte kin ahneki pepehm oh sohte kin mihmiseli wasakis. Kahrehda, en song en lokaiahiong irail kin sohte katepe. Ni mehlel, koasoi me dene kohsang rehn kompoakepatail me melahr men kin kohsang rehn ngehn saut akan. Kahrehda Siohwa ketin keinepwihsang mehn Israel akan en koasoi ong aramas melahr akan de iang wia soangen wiepen wunahni teikan.​—Wadek Deuderonomi 18:10-12.

5. Dahme ke kak wia ma doadoahngki dikedik oh sansal de pwongih omw peneinei melahr kan kin wia kisehn omw kaudok en mahso?

⁵ Ma doadoahngki dikedik oh sansal de pwongih kisehn peneinei me melahr kin wia kisehn omw kaudok mahso, dahme ke kak wia? Wadek oh doudouloale iren Paipel kan me kin kasalehiong uhk sapwellimen Koht madamadau ong soahng pwukat. Kapakapkihong Siohwa rahn koaros duwen omw ineng en uhki oh tengediong kaudok mehlel. Peki sapwellime sawas pwe ken ahnekihda sapwellime madamadau me pid soahng pwukat.​—Aiseia 55:9.

6, 7. (a) Dahme dene Krismas kin kasarawi? Ia duwe, sapwellimen Sises tepin tohnpadahk kan kin iang wia kasarawi wet? (b) Dahme kasarawien ipwidi kin pidada ni mwehin sapwellimen Sises tepin tohnpadahk kan?

⁶ Ahn aramas emen eh kaudok kakete saminkihla kaudok  likamw ong me pid rahn akan me aramas tohto kin kasarawi. Karasepe, tehk duwen Krismas. Dene Krismas iei kasarawien ipwidi en Sises Krais. Kereniong pelien lamalam koaros me dene irail Kristian kin iang kasarawi wet. Ahpw sohte mehn kadehde ehu mie me kasalehda me sapwellimen Sises tepin tohnpadahk kan kin iang kasarawi wet. Ehu pwuhk nda: “Erein sounpar riepwiki mwurin ipwidi en Krais, sohte aramas emen ese, oh aramas malaulau keite me kin men ese iahd me e ketin ipwidi.”​—Sacred Origins of Profound Things.

⁷ Mendahte ma sapwellimen Sises tohnpadahk kan ese uhdahn iahd me e ketin ipwidi, irail sohte pahn kasarawi met. Dahme kahrehda? Pwehki nin duwen ehu dikseneri koasoia, tepin Kristian akan “kin wiahki kasarawi en ipwidi tiahk en irail kan me kin iang pelien lamalam teikan.” (The World Book Encyclopedia) Paipel kasalehda kasarawien ipwidi riaute en kaun riemen me sohte kin kaudokiong Siohwa. (Senesis 40:20; Mark 6:21) Kasarawien ipwidi pil kin wiawi pwehn kawauwih koht likamw akan. Karasepe, ni May 24, mehn Rom kan kin kasarawi ipwidi en arail koht lih Diana. Mandahn rahno, irail kin kasarawi ipwidi en arail koht en ketipin, Apollo. Kahrehda, kasarawien ipwidi kin pidada kaudok likamw, kaidehn padahk en Kristian.

8. Menlau kawehwehda ia duwen kasarawien ipwidi kin pidada tiahk en kihlenwo.

⁸ Pil mie ehu kahrepe me tepin Kristian akan sohte pahn kasarawihki ipwidi en Sises. Sapwellimen Sises tohnpadahk ko kin ese me kasarawi rahnen ipwidi kin pidada tiahk en kihlenwo. Karasepe, mehn Krihk oh Rom en mahs oko kin kamehlele me mie ngehn emen me kin iang mi ni ahnsou me emenemen aramas kin ipwidi oh ngehn menet kin sinsile aramaso erein eh mour. Ehu pwuhk koasoia: “Ngehn menet kin ehuong koht emen me ahneki rahnen ipwidi me duwehte en aramaso.” (The Lore of Birthdays) Siohwa  uhdahn sohte pahn kupwurperenki kasarawi ehu me pahn kapatapene Sises oh tiahk en kihlenwo. (Aiseia 65:11, 12) Eri ia duwen Krismas eh wiahla mehkot me aramas tohto kin kasarawi?

9. Ia duwen December 25 wiahla rahn me aramas kin kasarawi ipwidi en Sises?

⁹ Sounpar epwiki kei mwurin Sises eh ketin momour nin sampah me aramas akan tepida wia katamanpen eh ipwidi nan December 25. Ahpw met kaidehn iei rahn me Sises ketin ipwidi. a Eri dahme kahrehda re pilada December 25? Ekei aramas akan me mwuhr kose me irail Kristian “men rahno en inenehte rahn en kasarawi me mehn Rom akan me kisehn pelien lamalam teikan ‘ong ipwidi en ketipin.’” (The New Encyclopædia Britannica) Ahnsoun kopou ni ketipin eh sohte nohn kehlail, mehn Rom akan kin wia kasarawi kan pwe en kapwurehdo ketipin me kin kihda karakar oh marain sang eh seiloak reirei kan. Re kin nda me December 25 iei rahno me ketipin kin tepida pwurodo. Pwehn wekidala irail akan me kaidehn Kristian, kaun en lamalam akan alehda kasarawi wet oh wiahkihla tiahk en “Kristian” ehu. b

10. Dahme kahrehda mie ekei me sohte kin iang kasarawi Krismas mahso?

¹⁰ Ahnsou reirei aramas kin wehwehki me Krismas tepisang pelien lamalam me kaidehn Kristian. Pwehki kasarawi wet sohte tepisang nan Paipel, mahso Krismas kin keinapwidi nan England oh ekei kousoan kan nan Amerika nan pahr 1,600 samwa. Ahnsowo, ma aramas emen pahn mihmi nan imwe oh sohte kohla nan eh wasahn doadoahk ni rahnen Krismas, e pahn pwain kalokepe. Ahpw mwurihdohsang  mwo, aramas tohto pil pwurehng wia tiahk en mahs wet oh ekei wiepe kapw pil kapatapatong. Krismas pil pwurehngehr wia rahnen kasarawi lap ehu, oh kin wiawi nan sahpw tohto ahnsou wet. Pwehki Krismas eh pidada kaudok likamw, irail oko me kin men kaperenda Koht sohte kin iang wia met oh pil kasarawien rahn teikan me tepisang kaudok likamw kan. c

11. Ia kahrepen ahn ekei ar kin iang wia rahnen kasarawi kan? Ahpw dahme kitail pahn keieu kesempwalki?

¹¹ Ekei aramas pwungki me kasarawien rahn akan me duwehte Krismas tepisang kaudok likamw ahpw re pehm me e sohte sapwung en iang kasarawi pwukat. Ni mehlel, pali laud en aramas sohte kin medemedewe duwen kaudok likamw ni arail kin iang kasarawi rahn pwukat. Pil soangen rahn duwehte met kin kihong peneinei kan ahnsou mwahu en mihpene oh pwurehng kapehse. Ih pil duwen omw pepehm en met? Ma iei, eri mwein limpoak en peneinei, ah kaidehn poakepen kaudok likamw, me kahrehda utung kaudok mehlel kin mwomwen apwal. Ahpw taman me Siohwa me ketikihda koasoandi en peneinei oh e ketin kupwurki ken ahneki nanpwungmwahu rehn kisehmw kan. (Episos 3:14, 15) Ahpw ke kak kakehlakahda nanpwungmwahu wet ni ahl akan me Koht ketin kupwurki. Me pid dahme kitail pahn keieu kesempwalki, wahnpoaron Pohl ntingihdi: “Kumwail kin song rapahki dahme Kaun-o kin ketin kupwurperenki.”​—Episos 5:10.

12. Menlau karasahda dahme kahrehda kitail anahne soikeweisang kitail tiahk en sahpw kan de kasarawi kan me tepidohsang mehkot samin.

¹² Mwein ke ahneki pepehm me wasa me kasarawien rahn akan tepisang ie kaidehn ih kahrepen kasarawi pwukat kin  wiawi nan rahnwet. Ia duwe, e kesempwal ia wasa mehkot tepisang ie? Ei! Karasepe: Ia duwen ma ke diar kirahka ehu me mi nan wasa samin. Ke pahn pwekadahte kang? Uhdahn soh! Kirahkao samin. Duwehte kirahkao, kasarawien rahn akan kin mwomwen mwahu, ahpw re tepisang mehkot samin. Pwe kitail en utung oh tengediong kaudok mehlel, kitail anahne ahneki madamadau me duwehte ahn soukohp Aiseia, me padahkihong tohnkaudok mehlel kan: “Kumwail dehr sair mehkot samin.”​—2 Korint 6:17; Aiseia 52:11.

13. Kahpwal dah kan kak pwarada ni omw pahn pilada ken dehr iang kasarawi rahn akan?

¹³ Kahpwal kan pahn kak pwarada ni ahnsou me ke pahn pilada ken dehr iang kasarawien rahn akan. Karasepe, iengomw tohndoadoahk kan ele sohte pahn wehwehki dahme ke sohte iang towehkihda kasarawien rahn akan nan omw wasahn doadoahk. Ia duwen ma aramas emen kihong uhk omw kisakis en Krismas, dahme ke pahn wia? E pahn sapwung ma ke ale? Ia duwen ma omw pwoud sohte iang omw pwoson? Dahme ke kak wia pwe noumw seri kan en dehr ahneki pepehm me re katihasang mehkot mwahu pwehki re sohte kin iang kasarawi rahn akan?

14, 15. Dahme ke kak wia ma aramas kin rahnmwahu me pid kasarawien rahn ehu? Ia duwen ma emen men kihong uhk kisakis?

¹⁴ Koahiek en madamadau kin anahn pwe ken wehwehki ia duwen  omw pahn apwalihala ehuehu irair pwukat. Ma aramas kin wia rahnmwahu me pid kasarawien rahn ehu, ke kak ndahte “kalahngan.” Ahpw ia duwen ma ke kin kalapw tuhwong de kin iang aramaso doadoahk? Nan soangen irair duwehte met, mwein ke kak ekis kawehwehiong ih. Ahpw ahnsou koaros, en kin kamantik nan omw koasoi. Paipel kaweid kitail ni eh mahsanih: “Amwail koasoi mwohn aramas en katapan oh kansenamwahu oh kumwail uhdahn pahn ese duwen amwail pahn sapeng koaros ni pwung.” (Kolose 4:6) Kanahieng ken dehr mwamwahliki aramas. Ahpw kamantik ni omw kin kawehwe dahme ke pwoson. Kawehwehda mwahu me ke sohte sapwungki kisakispene oh kamadipw ahpw ke mwahuki wia met ni ehu ahnsou tohrohr.

¹⁵ A ia duwen ma aramas emen men kihong uhk omw kisakis? Eri irair me kamwakid aramaso en kihwei kisakiso me pahn koasoanehdi ma ke pahn ale de soh. Aramaso kakete nda: “I ese me ke sohte kin iang kasarawi rahn wet. Ahpw I men kihong uhk met.” Ma ih duwen met, ele ke pahn pilada ken ale kisakiso pwe ke pehm me e sohte pidada kasarawi rahno. Ahpw ma aramas me kihwei kisakiso sohte wehwehki dahme ke kin pwoson, ke kak ndaiong me ke sohte kin iang kasarawi rahno. Met pahn kak seweseiuk en kawehwehda dahme kahrehda ke alehki kisakiso ahpw ke sohte pahn wiahda ehu kisakis ong ih ahnsowo. Ni pali teio, e pahn konehng ken dehr ale kisakiso ma aramaso pilahnehda en kasalehda me ke sohte kin tengediong omw pwoson de en kasalehda me ke pahn kauwehla dahme ke kamehlele pwehki ke noahroke dipwisou.

16. Ia duwen omw pahn kak koasoi ni kamantik ong soahng kan me pid kasarawien rahn akan?

¹⁶ Ia duwen ma tohn omw peneinei kan sohte iang omw pwoson? Eri, ken kin kamantik. Ke sohte anahne akamaiki  soangen tiahk oh kataman koaros me kisehmw kan pilada ren kasarawi. Wauneki arail pwuhng ong arail madamadau kan, duwehte omw men irail en wauneki omw pwuhng kan. (Wadek Madiu 7:12.) Soikala wiewia soh lipilipil kan me pahn wiahiong uhk ken iang pidada kasarawien rahno. Ahpw pil ahneki madamadau toupahrek ong wiewia kan me sohte uhdahn pidada kasarawi. Ahpw mehlel, ke pahn anahne ahnsou koaros kin mwekid ni ahl ehu me sohte pahn kauwehla omw nsenmwakelekel.​—Wadek 1 Timoty 1:18, 19.

17. Ia duwen omw kak sewese noumw seri kan en dehr ahneki pepehm me re kin katihasang mehkot mwahu pwehki ar kin kilang me meteikan kin kasarawi rahn akan?

¹⁷ Dahme ke kak wia pwe noumw seri kan en dehr ahneki pepehm me re kin katihasang mehkot mwahu pwehki amwail sohte kin iang kasarawi rahn akan me uhwong Paipel? E kesempwal dahme ke kin wia nan erein pahro. Ekei pahpa oh nohno kin koasoanehdi ahnsou kan pwehn kisikise neirail seri kan. Ehu kisakis me keieu kaselel me ke kak kihong noumw seri kan iei omw ahnsou oh omw kin kasalehda nsenohkin irail.

18. Ia duwen towehda mihting en Kristian kan eh kak seweseiuk en uhki oh tengediong kaudok mehlel?

¹⁸ Pwe ken kaperenda Koht, ke anahne soikeweisang uhk kaudok likamw oh uhki oh tengediong kaudok mehlel. Dahme uhki oh tengediong kaudok mehlel kin pidada? Paipel mahsanih: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, pwe duwen amwail ese Rahnen Kaun-o kerendohr.” (Ipru 10:24, 25) Mihting en Kristian akan kin wia ahnsou kaperen kei pwehn kaudokiong Koht ni ahl me e ketin  kupwurki. (Melkahka 22:22; 122:1) Kristian lelepek kan kin “sawaspene” ni ahnsoun mihting pwukat.​—Rom 1:12.

19. Dahme kahrehda e kesempwal ken koasoiaiong meteikan duwen mehkan me ke sukuhlkihsang nan Paipel?

¹⁹ Pil ehu ahl en uhki oh tengediong kaudok mehlel iei en koasoiaiong meteikan duwen dahme ke sukuhlkihsang omw onopki Paipel rehn Sounkadehdehn Siohwa kan. Aramas tohto kin inenen pahtoulahr oh mihlahr nan apwal pwehki suwed me kin wiewiawi nan sampah rahn wet. Mwein ele ke ese ekei aramas akan me ahneki soangen pepehm wet. Ke sou koasoiaiong irail duwen omw koapworopwor ong ahnsou kohkohdo me kohsang nan Paipel? Mwein miehte omw ineng en iang pidada tiahk kan de kasarawi kan me pid kaudok likamw. Ahpw ni omw pahn kin werekiong Kristian mehlel akan oh koasoiaiong meteikan padahk mehlel kaselel kan me ke sukuhlkihsang nan Paipel, ke pahn diarada me soangen ineng pwukat pahn ekisekis sohrala. Ke uhdahn pahn nsenamwahu oh ale kapai tohto ma ke pahn uhki oh tengediong kaudok mehlel.​—Malakai 3:10.