1. Dahme kahrehda ohl lapalap en Idiopiao kasalehda me e men papidaisla?

“IET pihlen, dahme kerompwa pwe I en dehr papidaisla?” Peidek wet kohsang rehn ohl lapalap en Idiopia men nan mwehin tepin Kristian kan. Emen Kristian me ede Pilip kadehdehiong ohl menet me Sises iei ih me Mesaia me inoupe mie. Dahme ohlen Idiopia menet sukuhlkihsang nan iren Paipel kan kin lel eh mohngiong oh ih eri mwekidkihda. E kasalehda me e men papidaisla!​—Wiewia 8:26-36.

2. Dahme kahrehda ke anahne medemedewe kanahieng duwen papidais?

² Ma ke sukuhlki mwahu irelaud en mwowe kan rehn Sounkadehdehn Siohwa kan, ele ke kakehr ahneki pepehm en idek, ‘Dahme kerompwa ie sang papidaisla?’ Met ke eseier duwen inou en Paipel me pid duwen mour soutuk nan Paradais. (Luk 23:43; Kaudiahl 21:3, 4) Ke pil sukuhlkiher ia irair en me melahr akan oh pil duwen koapworopwor en kaiasada. (Eklesiasdes 9:5; Sohn 5:28, 29) Mwein ele ke pil kin iangehr patpatehng Sounkadehdehn Siohwa kan nan arail mihting en mwomwohdiso kan oh pein kilangehr ia  duwen arail kin mourki kaudok mehlel. (Sohn 13:35) Me kesempwal sang koaros, ke mwein tepidahr wiahda pein omw nanpwungmwahu rehn Siohwa Koht.

3. (a) Kehkehlik dahieu me Sises ketikihong sapwellime tohnpadahk kan? (b) Ia duwen papidais nan pihl eh kin wiawi?

³ Ia duwen omw kak kasalehda me ke men papah Koht? Sises mahsanihong sapwellime tohnpadahk kan: “Kohwei . . . oh padahkihong tohn wehi kan koaros; pwe re en wiahla nei tohnpadahk: papidaisihirailla.” (Madiu 28:19) Pein Sises ketikihda mehn kahlemeng mwahu ni eh ketin papidaisla nan pihl. Sohn sohte usupihki Sises kisin mwaramwarahk en pihl de wudekihdi kisin pihl kis pohn tapwio. (Madiu 3:16) Lepin lokaia “papidais” kohsang ni lokaiahn Krihk ehu me kin wehwehki “kaduwedi.” Eri, papidais en Kristian kin wehwehki me irail pahn kaduhdi paliwar pwon nan pihl.

4. Dahme papidais nan pihl kin kadehde?

⁴ Papidais nan pihl wia koasoandi me anahn ong aramas koaros me men ahneki nanpwungmwahu rehn Siohwa Koht. Papidais kin kadehdehiong wehipokon duwen  omw ineng en men papah Koht. E kin kasalehda me ke perenki wia kupwuren Siohwa. (Melkahka 40:7, 8) Pwe ken kak papidaisla, ke anahne wia ewen kahk kei.

5. (a) Ia ewen kahk keieu pwe ken kak papidaisla? (b) Dahme kahrehda mihting en Kristian kan kin kesempwal?

⁵ Ke tepidahr wiahda ewen kahk keieu. Ia duwen? Sang ni omw kin sukuhlki duwen Siohwa Koht oh Sises Krais nan omw koasoandi en onop Paipel. (Wadek Sohn 17:3.) Ahpw pil mihmiehte me ke pahn sukuhlki. Kristian akan men ‘audaudkihda kupwuren Koht.’ (Kolose 1:9) Towehda mihting en mwomwohdiso kan en Sounkadehdehn Siohwa kan kin wia sawas laud ong uhk en wia met. E kesempwal en iang towehda soangen mihting pwukat. (Ipru 10:24, 25) Kaukaule towehda mihting pahn sewese iuk en kalaudehla omw wehwehkihla duwen Koht.

6. Ia uwen omw pahn anahne esehla Paipel pwehn kak papidaisla?

⁶ E pwung, ke sohte anahne esehla soahng koaros nan Paipel pwe ken kak papidaisla. Mieier soahng kan me ohl lapalap en Idiopiao esehier duwen Paipel, ahpw e anahne sawas en kak wehwehkihla wasa kei me e saikinte wehwehki. (Wiewia 8:30, 31) Pil duwehte, mie soahng tohto me ke anahne sukuhlki. Ni mehlel, sohte imwin omw pahn sukusukuhlki duwen Koht. (Eklesiasdes 3:11) Ahpw mwohn omw pahn kak papidaisla, ke anahne ese oh pwungki tepin padahk kan en Paipel. (Ipru 5:12) Karasepe, ke anahne ese oh pwungki padahk mehlel duwen irair en me melahr akan oh kesempwalpen mwaren Koht oh sapwellime Wehio.

7. Dahme onop en Paipel pahn wiahiong uhk?

⁷ Ahpw loalokong kelehpw sohte itar, pwe “sohte me kak kenikenla pahn kupwur en Koht ma sohte eh pwoson.” (Ipru 11:6) Paipel mahsanihong kitail me ni ahnsou  me ekei aramas akan nan kahnimw en Korint en mahs rongedahr padahk en Kristian, irail “ahpw pil pwosonla oh papidaisla.” (Wiewia 18:8) Ni soangen ahlohte, wia onop en Paipel pahn kin kalaudehla omw pwoson me met iei Mahsen en Koht. Onop en Paipel pahn kin sewesei iuk en pwosonla sapwellimen Koht inou kan oh pil pwosonla me sapwellimen Sises meirong kak wahdo komour.​—Sosua 23:14; Wiewia 4:12; 2 Timoty 3:16, 17.

8. Dahme pahn kamwakid uhk ken men ehukihong meteikan dahme ke sukuhlkiher?

⁸ Ni omw pwoson e wie kekeirda nan omw mohngiong, ke pahn diarada me e pahn apwal en dehr padahkihong meteikan dahme ke sukuhlkiher. (Seremaia 20:9) Ke pahn uhdahn men koasoiaiong meteikan duwen Koht oh sapwellime koasoandi kan.​—Wadek 2 Korint 4:13.

9, 10. (a) Ihs me ke kakehr tepihada ehukihong padahk mehlel en Paipel? (b) Dahme ke anahne wia ma ke men iang koasoandi en kalohk me Sounkadehdehn Siohwa kan kin wia?

⁹ Ele ke pahn tepida ehukihong meteikan padahk mehlel en Paipel ni omw pahn kin koasoi ni ahl kadek ong kisehmw akan, kompoakepahmw akan, mehn mpomw akan, oh iengomw tohndoadoahk kan. Mwuri, ke pahn men iang koasoandi en kalohk me Sounkadehdehn Siohwa kan kin wia. Ni ahnsou wet, ke kak koasoiaiong Sounkadehdehn Siohwa me kin onop Paipel rehmw me ke men iangehr wia doadoahk en kalohk. Ma e mwomwen me ke kakehr iang wia doadoahk en kalohk, koasoandi pahn wiawihda pwe kumwa en tuhkihong elder riemen nan mwomwohdiso.

¹⁰ Met pahn mweidohng uhk ken kak pil esehla ekei elder kan me kin apwahpwalih sapwellimen Koht sihpw  akan. (Wiewia 20:28; 1 Piter 5:2, 3) Ma elder pwukat kilang me ke wehwehki oh kamehlele tepin padahk kan en Paipel, oh kin idawehn sapwellimen Koht koasoandi kan nan omw mour, oh uhdahn men wiahla emen Sounkadehdehn Siohwa, ira ahpw pahn kehsehkin uhk me ke kak iang kalohk nin duwen emen sounkalohk me saikinte papidais.

11. Soangen wekidekla dah kan me ele ekei pahn anahne wiahda mwohn arail pahn kak iang kalohk?

¹¹ Ahpw elder pwukat pahn kakete diarada me ke anahne wiahda mahs soangen wekidekla kan nan omw mour mwohn omw pahn kak iang wia kalohk. Met pahn kakete pidada uhdihsang soangen wiewia kei me aramas teikan sohte ese me ke kin wiewia. Kahrehda, mwohn omw pahn idek ma ke kak iang wia sounkalohk emen me saikinte papidais, ke anahne kin sohla wia dihp laud kan, me duwehte tiahk samin me pid wia nsenen pwopwoud, kamam sakau, oh doadoahngki mehn kasahliel kan.—Wadek 1 Korint 6:9, 10; Kalesia 5:19-21.

12. Dahme kahrehda koluhla anahne wiawi?

¹² Ewen kahk teikan pil anahne wiawi mwohn omw pahn kak papidaisla. Wahnpoaron Piter koasoia: “Kumwail koluhla oh wiliakapwala oh wekiong Koht pwe en ketin kamwakeleweisang kumwail dipamwail kan.” (Wiewia 3:19) Koluhla iei en ahneki pepehm mehlel en pahtoukihla mehkot me ke wiahda me sapwung. E sansal me koluhla anahne wiawi ma aramas emen kin mourki mour samin mahso, ahpw e pil kesempwal mendahte ma aramaso kin mourki mour mwakelekel. Dahme kahrehda? Pwehki aramas koaros dipan oh anahne sapwellimen Koht mahk. (Rom 3:23; 5:12) Mwohn omw onop Paipel, ke saikinte ese kupwuren Koht. Kahrehda ke sohte kak  mourki kupwure ni unsek pwehki ke saikinte ese. Ihme kahrehda, koluhla anahne wiawi.

13. Dahkot wiliakapwala?

¹³ Mwurin koluhla, aramas emen anahne ‘wiliakapwala.’ Ke anahne wia laudsang ihte ken nsensuwedkihla omw mour en mahs. Ke anahne soikala omw mour en mahso oh koasoanehdi nan kapehdomw me ke pahn uhd wia dahme pwung sangehr met kohla. Koluhla oh wiliakapwala wia ewen kahk kei me ke anahne wia mwohn omw pahn papidaisla.

14. Ia ewen kahk kesempwal me ke anahne wia mwohn omw pahn papidaisla?

¹⁴ Pil mie ehu ewen kahk kesempwal me ke pahn wia mwohn omw pahn papidaisla. Ke anahne inoukihda omw mour ong Siohwa Koht.

15, 16. Ia wehwehn inoukihong Koht omw mour? Dahme kin kamwakid aramas emen en wia met?

¹⁵ Ni ahnsou me ke kapakap ngidingid oh inoukihong Siohwa Koht omw mour, ke kin inoukihda me ke pahn kihong ih omw lelepek unsek sangehr met oh kohkohlahte. (Deuderonomi 6:15) Dahme kin kamwakid aramas emen en men wiahki met? Karasepe, ia duwen ma ohl emen tepida kapehseiong emen lih me e men pwoudiki. Ni eh pahn lalaudla eh ese liho oh kilang me liho ahneki irair kaselel kan, eri eh men karanih liho pahn laudla. Mwurin ahnsou kis, e pahn peki reh ira en pwopwoud. Mehlel, pwopwoud pahn kahrehiong ohlo en ahnekihda pwukoa tohto. Ahpw limpoak me pahn kamwakid ih en wia ewen kahk kesempwal wet.

¹⁶ Ni omw pahn esehla oh poakohngala Siohwa, ke pahn men wia soahng koaros pwehn papah oh kaudokiong ih. Mehmen me men idawehnwei sapwellimen Koht  ohlo, Sises Krais, anahne “tounmeteikihla pein ih.” (Mark 8:34) Kitail kin tounmeteikihla pein kitail sang ni atail kin sohte mweidohng pein atail ineng kan oh mehn akadei kan en kauwehla atail kasalehda peik unsek ong Koht. Mwohn omw pahn kak papidaisla, omw kin wia kupwuren Siohwa Koht pahn anahne wia mehkot me keieu kesempwal nan omw mour.​—Wadek 1 Piter 4:2.

17. Dahme kahrehda ekei aramas kin pweieksang inoukihong Koht arail mour?

¹⁷ Ekei aramas kin pweieksang inoukihong Siohwa arail mour pwehki irail ekis perki wiahda soangen ewen kahk kesempwal wet. Irail ele masak pwukoahki arail inou ong Koht nin duwen Kristian. Pwehki arail perki sapwungala oh kansensuwedihala Siohwa, irail medemedewe me e pahn mwahu ma re sohte pahn inoukihong ih arail mour.

18. Dahme kak kamwakid uhk ken inoukihong Siohwa omw mour?

¹⁸ Ni omw limpoakohng Siohwa pahn kekeirda, ke pahn men inoukihong ih omw mour oh wia uwen omw kak koaros pwehn kapwaiada omw inowo. (Eklesiasdes 5:4) Mwurin omw wiadahr omw inowo, ke uhdahn pahn men ‘momour nin duwen me Siohwa kin ketin kupwurki, oh pil wiewia dahme e kin ketin kupwurperenki.’ (Kolose 1:10) Pwehki omw limpoakohng Koht, ke sohte pahn pehm me e nohn apwal en kapwaiada kupwure. Ke pahn pwungki wahnpoaron Sohn me ntingihedi: “Pwe iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.”​—1 Sohn 5:3.

19. Dahme kahrehda ke sohte anahne perki inoukihong Koht omw mour?

¹⁹ Ke sohte anahne wia aramas unsek men pwe ken kak inoukihong Koht omw mour. Siohwa mwahngih omw  soh itar kan oh e sohte ketin kasik ken wia daulih dahme ke kak wia. (Melkahka 103:14) E kupwurki ken kin pweida oh e pahn ketin utung oh seweseiuk. (Wadek Aiseia 41:10.) Ke kak kamehlele me ma ke kin likih Siohwa ni omw mohngiong unsek, e “pahn ketin kasalehiong uhk ahl me pwung.”​—Lepin Padahk 3:5, 6.

20. Dahme kahrehda inou ong Siohwa anahne sansal ong meteikan?

²⁰ Omw pahn medemedewe duwen soahng kan me kitail ahpwtehn koasoiapene pahn kak sewese iuk ken  inoukihong Siohwa omw mour nan kapakap. Irail akan koaros me kin uhdahn poakohng Koht anahne wia ‘arail kadehde’ me kin ‘tepisang ewerail’ mwohn wehipokon. (Rom 10:10) Ia duwen omw pahn wia met?

21, 22. Ia duwen omw pahn kak “kadehde” omw pwoson ong wehipokon?

²¹ Kehsehki soun koasoanehdi pwihn en elder kan en omw mwomwohdiso me ke men papidaisla. E pahn koasoanehdi pwe ekei elder kan en kousapahlih rehmw  peidek kan me kin pidada tepin padahk kan en Paipel. Ma elder pwukat pwungki me ke konehngehr papidaisla, re pahn padahkihong uhk me ke pahn kakehr papidaisla ni ahnsou me koasoandi en papidais pahn wiawi. * Padahk ehu me kin pid wehwehn papidais pahn wiawi ni ahnsoun papidaiso. Aramas me wia padahko pahn luke irail akan koaros me pahn papidaisla en sapeng peidek mengei riau pwe irail en “kadehde” ong wehipokon duwen arail pwoson.

²² Papidais me pahn kadehdehiong wehipokon me kowe aramas emen me inoukihongehr Koht omw mour oh ahnsou wet wialahr emen Sounkadehdehn Siohwa. Irail akan me pahn papidaisla kin duhdi douluhl pahn pihl pwehn kadehdehiong wehipokon me irail inoukihongehr Siohwa arail mour.

23. Ia wehwehn papidaisla ni mwaren Sahm oh sapwellime Ohl, oh sapwellimen manaman?

²³ Sises mahsanih me sapwellime tohnpadahk kan pahn kin papidaisla “ni mwaren Sahm oh Sapwellime oh [“sapwellimen Koht manaman,” NW].” (Madiu 28:19) Met kin wehwehki me emen me pahn papidaisla kin pohnese sapwellimen Siohwa Koht oh Sises Krais pwuhng en kaunda. (Melkahka 83:18; Madiu 28:18) E pil kin pohnese ia duwen Siohwa eh kin ketin doadoahngki sapwellime manaman.​—Kalesia 5:22, 23; 2 Piter 1:21.

24, 25. (a) Dahme papidais kin karasaraskihong? (b) Mehnia peidek me anahne pasapengla?

²⁴ Papidais kaidehkin ihte en duhdi pahn pihl. Met wia kilelepen mehkot inenen kesempwal. Duhdiong pahn pihlo kin rasehng me ke melahr sang omw mour en mahso.  Pwarada sang pahn pihlo kin rasehng me ahnsouwet ke mouradahng wia kupwuren Koht. Pil tamataman me ke inoukidahr omw mour ong Siohwa Koht, ah kaidehn ong palien doadoahk ehu, pil kaidehn ong mwekid ehu, pil kaidehn ong aramas teikan, de pil kaidehn pwihn ehu. Ke pahn tepida kompoakepahnki Koht oh uhdahn karanihala ih ni ahnsou me ke wiahda inou oh papidaisla.​—Melkahka 25:14.

²⁵ En papidaisla sohte wehwehki me ke komourlahr. Wahnpoaron Pohl ntingihedi: “Kumwail nantihong doadoahk ni lemmwin oh poadidi pwe kumwail en kaunsekala komourpamwail.” (Pilipai 2:12) Papidais wia tepin kahk ong komourala. Ahpw peideko iei, Ia duwen omw kak dadaurete ni limpoak en Koht? Kaimwiseklahn irelaud en pwuhk wet pahn kihda pasapeng.