WADEK doaropwehn rohng kan. Kilang TV, de rong redio. Rohng kan me pid kauwehla kosonned kan, mahwen, oh pil wiewiahn loallap akan uhdahn rekla! Nna song medewehla omw kahpwal akan. Mwein ele soumwahu de pil mehlahn kompoakepahmw men kin wadohng uhk kapahtou laud. Ele omw pepehm kin duwehte ahn Sohp pepehm me koasoia me eh kahpwal oh pahtou kan “toutou sang pihk en nansed.”​—Sohp 6:2, 3.

Pein idek rehmw:

• Met iei sapwellimen Koht koasoandi ong ie oh pil ong aramas koaruhsie?

• Ia wasa I kak diar sawaspen ei kahpwal akan?

• Mie koapworopwor me kitail pahn kak diar meleilei pohn sampah ehu rahn?

Paipel kihda pasapeng mwahu kan ong peidek pwukat.

“E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.”​—Kaudiahl 21:4

“Me nehtuk kan pahn mwusikekda oh kahkahlek.”​—Aiseia 35:6

“Me maskun kan pahn pehdpeseng.”​—Aiseia 35:5

 “Irail koaros me mihmi nan sousou kan pahn . . . pedoisang nan arail sousou kan.”​—Sohn 5:28, 29

“Sohte emen me kin kousoan nan sahpwo pahn kaulimkihla eh soumwahu.”​—Aiseia 33:24

“Reken wahn pilawa en kin wiewiawihte nan wehiet; wahnsahpw en kin kipehdi dohl akan.”​—Melkahka 72:16

Ke dehr mwadangete lemehiong me ire kan me sansalehr mwowe sohte kak pweida. Koht ketin inoukidahr me e pahn ketin kapwaiada mepwukat ong kitail, oh Paipel kawehwehda ia duwen eh pahn ketin wia met.

Ahpw Paipel pil kin kihda soangen sawas teikan. E kin kihda ire kan me kak sewese iuk en ahneki mour nsenamwahu pil ahnsou wet. Nna medemedewe mahs duwen omw kapwunod oh kahpwal kan. Ele omw kahpwal kan kin pidada kahpwal en mwohni, de kahpwal nan peneinei, de soumwahu, de mehlahn aramas emen me ke kin inenen poakohng. Paipel kak sewese iuk en powehdi kahpwal akan nan rahn wet. Oh e pil kak wahdo kamweit ni eh pahn sapengala soangen peidek pwukat:

• Dahme kahrehda kitail kin lelohng lokolok kan?

• Ia duwen atail pahn kak powehdi kapwunod kan nan mour en ahnsou wet?

• Ia duwen atail kak kalaudehla nsenamwahu en atail peneinei?

• Dahme pahn wiawihong kitail ni ahnsou me kitail pahn mehla?

• Ia duwe, kitail pahn kak pwurehng tuhwong kompoakepatail me melahr akan?

• Dahme kitail esehki me Koht pahn uhdahn ketin kapwaiada sapwellime inou kan me pid ahnsou kohkohdo?

 E sansal me ke men diarada dahme Paipel kin padahngki pwehki ke iang wadewadek pwuhk wet. Pwuhk wet pahn sewese iuk en wia met. Tehk me nempehn parakrap kan kin pahrekiong nempehn peidek kan. Aramas rar kei kin onop Paipel rehn Sounkadehdehn Siohwa kan ni arail kin doadoahngki peidek oh pasapeng kan. Se koapworopworki me ke pil pahn perenki soangen wiepe wet. En esehla dahme Paipel uhdahn padahngki kin inenen kansenamwahu oh kaperen. Sapwellimen Koht kapai en ketin ieiang uhk ni omw pahn wia met!