Mehn Israel ko mihmihkiher nan sapwtehno kereniong sounpar 40. Irail kalowedier wehi kehlail tohto. Met re koukousoanier wasa patapat en Mohap palimesehn Pillap Sordan oh e lelehr ahnsou me irail pahn pedolong nan Sapwen Inowo. Nanmwarkien Mohap, Palak, masepwehkada pwehki mehn Israel ko ar pahn kihsang sapweo. Eri, e luke ohl emen me adaneki Palaam en kohdo Mohap oh keriahla mehn Israel ko.

Ahpw Siohwa mahsanihong Palaam: ‘Ke sohte pahn keriahla mehn Israel kan.’ Eri Palaam sohte men kohla Mohap. Nanmwarki Palak luke ih keriapak oh inoukihong ih me e pahn kihong ih soahng koaros me e mwahuki. Palaam pil sohte men kohlahte. Koht eri mahsanihong: ‘Ke kak kohla, ahpw ke pahn koasoiahte dahme I pahn mahsanihong uhk ken koasoia.’

Palaam eri dakehda nah dongkio oh kohkohla palieir en Mohap. E koasoanehdier en keriahla mehn Israel kan, mendahki Siohwa mahsanihong ih en dehr wia. Sapwellimen Siohwa tohnleng men pwarada pohn ahlo pak siluh. Palaam sohte kak kilang tohnlengo ahpw nah dongkio kak kilang. Keieu, dongkio wetsang nanialo oh wetlong nan dihpw ko. Mwuri, dongkio keieng limwahn kehl takaio oh idangehng nehn Palaamo ni kehlo. Mwurin mwo dongkio wendiong nanwerengen ahlo. Ehuehu ahnsou me dongkio kin wia soahng pwukat, Palaam kin wokihki dongkio tuhke pwoat.

Mwurin kesilpak en Palaam eh wokihki dongkio tuhkeo, Siohwa ketin wiahiong dongkio en kak lokaia. Dongkio eri idek rehn Palaam: ‘Dahme kahrehda ke wokwokihkin ie?’ Palaam nda: ‘Ke kahrehiong ie en mwomwen pweipwei. Ma mie nei kedlahs I pahn kemeiukala.’ Dongkio nda: ‘Ke kin dakedake ie erein sounpar tohto. Mie pak ehu I kin wiahiong uhk soahng wet mahso?’

Siohwa eri ketin wiahiong Palaam en kak kilang tohnlengo. Tohnlengo eri mahsanih: ‘Siohwa mahsanihong uhk ken dehr keriahla Israel.’ Palaam nda: ‘I sapwungalahr. I pahn pwurala ni imweo.’ Ahpw tohnlengo  mahsanih: ‘Ke kak kohla Mohap, ahpw ke pahn koasoiahte dahme Siohwa mahsanihong uhk ken koasoia.’

Ia duwe, Palaam sukuhlki mehkot kesempwal sang dahme wiawio? Soh. Mwurin mwo, Palaam pil song en keriahla mehn Israel kan pak siluh, ahpw ehuehu ahnsou me Palaam song en wia met Siohwa kin ketin wiahiong ih en kapaiada irail ahpw kaidehn keriahla irail. Kedekedeo, mehn Israel ko mahweniong Mohap, oh Palaam kamakamala. E seu pahn mwahu ma Palaam rongete Siohwa nin tapio?