Ohl emen me sohte kak alu kin wie mwomwohd oh pekipekseli rehn aramas rahn koaros ni ewen kelen tehnpas sarawio. Mwurin souwas ehu, e kilangada Piter oh Sohn kohkohlongala nan tehnpas sarawio. Ih eri ndaiong ira: ‘Kumwa menlau kihong ie mehkot.’ Piter eri ndaiong: ‘Mie mehkot me mwahusang mwohni me I kak kihong uhk. Ni mwaren Sises, uhda kowe alu!’ Piter eri sewese ohl en kesihnenda, oh ohlo tepida alialuseli! Pokono uhdahn perenkihda manaman wet kahrehda aramas tohto pwosonla.

Ahpw samworo ko oh Sadusi ko lingeringerda. Irail koledi wahnpoaron ko, wahla ira nan mwoalen kopwung, oh kapeidakih ira: ‘Ihs me kihong kumwa manaman en kamwahwihala ohl menet?’ Piter eri nda: ‘Se alehdi manaman sang rehn Sises Krais, me kumwail kemelahro.’ Kaunen pelien lamalam ako ahpw werkihda: ‘Kumwa dehr koasoia duwen Sises!’ Ahpw wahnpoaron ko nda: ‘Se uhdahn pahn koasoia duwen ih. Se sohte pahn uhdi.’

Ni ahnsou me Piter oh Sohn kasaledekla, ira kohla rehn tohnpadahk teiko oh ndaiong irail dahme wiawihero. Irail eri kohpene oh kapakap, peki rehn Siohwa: ‘Komw menlau sewese kiht sen eimah pwe sen kak doulahte wiewia sapwellimomwi doadoahk.’ Siohwa eri ketikihong irail sapwellime manaman, oh irail pousehlahte kalokalohk oh kamwakamwahwihala me soumwahu kan. Aramas tohto wie pwosopwosonla. Sadusi ko uhdahn luwakada kahrehda irail salihedi wahnpoaron ko oh keseirailong nan imweteng. Ahpw nipwongo, Siohwa ketin kadarala emen tohnleng pwehn ritingada wenihmwen imwetengo oh ndaiong wahnpoaron ko: ‘Pwurala ni tehnpas sarawio, oh padahk wasao.’

Mandahn rahno, Sanedrino, mwoalen kopwung en kaunen pelien lamalam ako, alehdi rohng wet: ‘Imwetengo sohte ritida, ahpw ohl me kumwail salihedi ko solahr mie! Irail mihmi nan tehnpas sarawio, padapadahk ong aramas akan!’ Wahnpoaron ko pil pwurehng selidi oh wisiklahng rehn Sanedrino. Samworo lapalapo ahpw nda:  ‘Se kehkehlingkihong kumwail en dehr koasoia duwen Sises!’ Ahpw Piter sapengki: “Se uhdahn pahn peikiong Koht, a kaidehn aramas.”

Kaunen pelien lamalam ako uhdahn lingeringerda me kahrehda ar men kemehla wahnpoaron ko. Ahpw emen Parisi me adaneki Kameliel uhda oh nda: ‘Kumwail kanahieng! Pwe Koht kakete ieiang ohl pwukat. Kumwail uhdahn men pelianda Koht?’ Irail eri pwungki eh kaweido. Mwurin arail wokihki wahnpoaron ko tuhke kei, irail pil pwurehng ndaiong irail ren dehr kalohk, oh kadarirailla. Ahpw met sohte kauhdi wahnpoaron ko. Irail pousehlahte ni eimah kalokalohki rongamwahwo nan tehnpas sarawio oh sang ni ihmw lel ihmw.