1, 2. Peidek dahieu kitail pahn tehkpene oh dahme kahrehda?

KE PWOPWOUD? Ma iei, omw mouren pwopwoud kin kaperen de mie omw kahpwal laud kan nan omw pwopwoud? Kowe oh omw pwoud solahr kin kerenpene? Ke kin dadaurete nan omw pwopwoud mendahki ke solahr perenki? Ma ih duwen met, ele ke kin nsensuwedkihla omw solahr ahneki nsenamwahu nan omw mouren pwopwoud duwehte mahs. Nin duwen Kristian men, ke men omw mouren pwopwoud en kalinganahla Siohwa, Koht me ke poakohng. Ihme kahrehda ke kin pwunodki oh pahtouki amwa irair en ahnsouwet. Ma ih pil duwen met, menlau dehr lemeleme me solahr koapworopwor.

² Mie pwopwoud Kristian kan me kin pweida mwahu ahnsouwet ahpw mahs mie ahnsou me arail mouren pwopwoud kereniong ohla. Irail diarada ia duwen arail pahn kak kakehlaka arail pwopwoud. Ke pil kak kalaudehla omw nsenamwahu nan pwopwoud. Ia duwen omw kak wia met?

3, 4. Dahme kahrehda ohl pwopwoud oh lih pwopwoud pahn kak kerenpene ma re pahn nantihong karanihala Koht? Menlau kihda ehu karasaras.

³ Kowe oh omw pwoud pahn kerenpene ma kumwa kin nantihong karanihala Koht. Dahme kahrehda? Nna  medewehla karasaras wet: Mie nahna ehu. Ohl emen kin kesikesihnen ni palimaun en nahnao oh lih emen kin kesikesihnen ni palimeing. Ira eri tepida doudahla ni koadoken nahnao. Ni ahnsou me ira ahpwtehn tepida doudoudahla, ira kin dohpeseng. Ahpw, ni ara pahn kerendahlahng ni koadoken nahnao, ira pahn kerenpene. Ke kak kilang mehn kasukuhl mwahu nan karasaras wet?

⁴ Amwa kin nantihong papah Siohwa kin rasehng amwa kin nantihong doudahla ni koadoken nahnao. Pwehki kumwa poakohng Siohwa, kumwa kin nannanti en doudahla ni karasaras. Ma kowe oh omw pwoud sohte kin kerenpene ni ahnsouwet, eri ni karasaras, met duwehte omw kin doudoudahla ni palimaun oh omw pwoud kin doudoudahla ni palimeing. Dahme pahn wiawi ni amwa kin doudoudahla? Nin tapio kumwa kin dohpeseng. Ahpw ma kumwa koaros pahn kin nantihong karanihala Koht, duwehte amwa kin doudoudahla ni koadoken nahnao, kumwa uhdahn pahn kerenpene. Ei, omw kin karanihala Koht pahn sewese iuk en karanih omw pwoud. Ahpw ia duwen omw kak wia met?

5. (a) Ia ehu ahl en karanihala Siohwa oh omw pwoud? (b) Ia sapwellimen Siohwa madamadau duwen pwopwoud?

⁵ Ehu ahl kesempwal en “doudoudahla” me kin wehwehki en karanihala Koht oh omw pwoud iei kumwa en kapwaiada kaweid kan en Paipel me pid pwopwoud. (Melkahka 25:4; Aiseia 48:17, 18) Eri, tehk kaweid ehu me wahnpoaron Pohl kihda. E koasoia: “Kumwail koaros uhdahn pahn wauneki kasarawien kapwopwoud.” (Ipru 13:4) Ia wehwehn met? Lepin lokaiahn Krihk me kawehwehdi “wauneki” kin pid mehkot kesempwal. Ei, ih sapwellimen Siohwa madamadau duwen koasoandi en pwopwoud. E kin ketin kesempwalki met.

6. Dahme en Pohl eh kaweid duwen pwopwoud kin kasalehda? Dahme kahrehda e kesempwal en tamataman met?

⁶ Nin duwen sapwellimen Siohwa ladu kan, kumwa esehier me koasoandi en pwopwoud kin uhdahn kesempwal oh sarawi. Siohwa me ketin wiahda koasoandi wet. (Wadek Madiu 19:4-6.) Ahpw, ma kumwa kin ahneki kahpwal en pwopwoud ahnsou wet, en esehte me koasoandi en pwopwoud kin sarawi sohte itar en kamwakid kumwa en kasalehda limpoak oh wahu nanpwungamwa. Eri, dahme pahn kamwakid kumwa en wia met? Tehk kanahieng ia duwen Pohl eh kin koasoia duwen en kasalehda wahu. Pohl sohte ndahte “kapwopwoud kin sarawi,” ahpw e nda, “kumwail koaros uhdahn pahn wauneki kasarawien kapwopwoud.” Pohl sohte kin koasoiahte dahme e kin kilang duwen pwopwoud, ahpw e kin kihda kaweid ehu. Omw kin tamataman met kak kamwakid uhk en pwurehng wauneki omw pwoud. Dahme kahrehda kitail kak ndahki met?

7. (a) Mehnia kehkehlik en Paipel me kitail kin kapwaiada oh dahme kahrehda? (b) Ia imwilahn atail kin peik?

⁷ Nna medewehla ia duwen omw kin kilangwohng kehkehlik teikan en Paipel me duwehte en wia doadoahk en katohnpadahk de en pokonpene ong kaudok. (Madiu 28:19; Ipru 10:24, 25) Mehlel ekei ahnsou e kin apwal en kapwaiada kehkehlik pwukat. Aramas akan me ke kin tuhwong nan kalohk ele sohte perenki rong, de ke kin uhdahn pwang mwurin omw doadoahk kahrehda e kin apwal en iang towehda mihting en Kristian akan. Ahpw mendahki met, ke kin kaukaule kalohki rongamwahu en Wehio oh kin kaukaule iang towehda mihting kan. Sohte me kak kauhiukidi, pil Sehdan sohte kak! Dahme kahrehda? Pwehki omw limpoak mehlel ong Siohwa kin kamwakid uhk en  peikiong sapwellime kehkehlik kan. (1 Sohn 5:3) Ia imwilahn met? En iang doadoahk en kalohk oh iang towehda mihting kan kin kihong uhk meleilei oh nsenamwahu pwehki omw ese me ke kin kapwaiada kupwuren Koht. Soangen pepehm wet kin uhd kakehlaiukada. (Nehmaia 8:10) Eri, dahme kitail kak sukuhlki sang met?

8, 9. (a) Dahme kak kamwakid kitail en peikiong kehkehlik en wauneki koasoandi en pwopwoud, oh dahme kahrehda? (b) Ire riau dah kan kitail pahn tehkpene?

⁸ Duwehte omw limpoak laud ong Koht eh kin kamwakid uhk en peikiong sapwellime kehkehlik kan en kalohk oh pokonpene mendahki mie omw kahpwal kan, omw limpoak ong Siohwa kak kamwakid uhk en peikiong kaweid  en Paipel en “wauneki kasarawien kapwopwoud” mendahki ma met kin apwal. (Ipru 13:4; Melkahka 18:29; Eklesiasdes 5:4) Patehng met, duwehte omw kin nantihong en iang doadoahk en kalohk oh iang towehda mihting kan kin wahdo kapai tohto sang rehn Koht, Siohwa pahn mwahngih omw kin nantihong en wauneki kasarawien kapwopwoud oh e pahn ketin kapaiukada.​—1 Deselonika 1:3; Ipru 6:10.

⁹ Eri, ia duwen omw kak kawauwih omw pwopwoud? Ke anahne liksang wiewia kan me pahn kauwehla omw pwopwoud. Ke pil anahne wia dahme pahn kakehlaka omw pwopwoud.

10, 11. (a) Soangen wiewia dah kan kin kauwehla wahu nan pwopwoud? (b) Mehnia peidek me ke kak idek rehn omw pwoud?

¹⁰ Emen lih pwopwoud Kristian koasoia: “I kin kapakapkihong Siohwa kehl pwe ien dadaur.” Ia kahrepe? E kawehwehda: “Ei pwoud kin ndaiong ie lokaia kamedek kan. Ele e sohte sansal lipwen soangen kamakam wet, ahpw eh lokaia kamedek kan me duwehte ‘Ke kapwang!’ oh ‘Sohte katepomw!’ kin uhdahn kamedekehla loalei.” Lih menet kasalehda ire ieu me inenen kansensuwed, iei lokaia kamedek kan me kin wiawi nan pwopwoud.

¹¹ Ia uwen eh kansensuwed ma pwopwoud Kristian ehu kin doadoahngki lokaia lemei kan oh kamedekihala laud emenemen! E sansal me sohte wahu nan pwopwoud ehu me kin kalapw doadoahngki lokaia kamedek kan. Ia iren omw mouren pwopwoud duwen met? Ehu ahl en ese duwen met iei en idek rehn omw pwoud, “Dahme ei lokaia kan kin wiahiong uhk?” Ma omw pwoud kin pehm me omw lokaia kin kalapw kansensuwedih, eri ke pahn  anahne kamwahwihala mwomwen omw kin lokaia.​—Kalesia 5:15; wadek Episos 4:31.

12. Ia duwen en emen kaudok eh kak sohla katepe mwohn silangin Koht?

¹² Tamataman me mwomwen omw koasoi nan omw mouren pwopwoud kin pidada omw nanpwungmwahu rehn Siohwa. Paipel mahsanih: “Mie mehmen me kin lemeleme me e poadidi ong pelien atail lamalam? Ma e sohte kin powehdi lowe, eri eh poadidi sohte katepe oh e kin pitih pein ih.” (Seims 1:26) Ke sohte kak nda me mwomwen omw koasoi sohte kin pid omw kaudok. Paipel sohte kin utung soangen madamadau me dene ma emen kin nda me e kin papah Koht eri dahme kin wiawi nan peneinei sohte kesempwal. Menlau dehr pitih pein kowe. Met mehkot me inenen kesempwal. (Wadek 1 Piter 3:7.) Ele ke ahneki soangen koahiek kan oh ke kin poadidi, ahpw ma ke kin kansensuwedihkihala omw pwoud lokaia kamedek kan, eri ke kin kauwehla wahu nan koasoandi en pwopwoud oh omw kaudok ong Koht sohla katepe mwohn silangi.

13. Ia duwen emen eh kak kamedekihala pepehm en eh pwoud?

¹³ Ohl pwopwoud oh lih pwopwoud men pil anahne kanahieng pwehn dehr wia mehkot me pahn kansensuwedih eh pwoud ni ahl me sohte nohn sansal. Nna medewehla karasaras riau pwukat: (1) Nohno kiripw men kin kalapw doadoahngki delepwohn pwehn koasoiong ohl Kristian pwopwoud men nan eh mwomwohdiso pwehn ale sawas, oh ira kin koasoipene ahnsou reirei. (2) Ohl Kristian kiripw men kin doadoahngki ahnsou laud en iang lih Kristian pwopwoud men kohla kalohk wihk koaros. Ira me pwopwoud nan karasaras pwukat ele kin wia mepwukat pwehki kahrepe pwung, ahpw dahme met pahn wiahiong pepehm en ara pwoud ko? Emen lih me lelohng nan soangen irair wet koasoia, “En kilang ei pwoud kin doadoahngki  ahnsou laud pwehn tehk emen sister nan mwomwohdiso kin kamedekih loalei. I kin pehm me I sohte kesempwal duwehte sistero.”

14. (a) Pwukoa dahieu me pid pwopwoud kin sansalda nan Senesis 2:24? (b) Dahme kitail anahne pein idek rehtail?

¹⁴ Kitail kak wehwehki me lih menet oh meteikan me kin mi nan soangen irair wet kin nsensuwedla. Arail pwoud ko sohte kin kapwaiada sapwellimen Koht kaweid wet ong pwopwoud: “Ohl emen pahn kin mweikihsang seme oh ine oh ehukihong eh pwoud.” (Senesis 2:24) Mehlel irail kin wauneki arail pahpa oh nohno, ahpw nan sapwellimen Koht koasoandi, irail pahn keieu kesempwalki arail pwukoa ong arail pwoud. Duwehte met, Kristian akan kin uhdahn poakohng iengerail Kristian teikan, ahpw irail kin keieu kesempwalki arail pwukoa ong arail pwoud. Ihme kahrehda, ma emen Kristian me pwopwoud kin nohn doadoahngki ahnsou laud ong emen Kristian me kaidehn eh pwoud de nohn karanihala ih, met kak kahrehda nsensuwed nan eh mouren pwopwoud. Ia duwe, ih kahrepe wet me kin kahrehda amwa nanpwung suwed? Nna pein idek rehmw, ‘I kin uhdahn kihong ei pwoud ahnsou me e warohng? I kin kasalehiong ei pwoud ei nsenoh oh limpoak me ei pwoud warohng ale?’

15. Nin duwen Madiu 5:28 kin kasalehda, dahme kahrehda Kristian pwopwoud kan en dehr nohn karanihala emen me kaidehn arail pwoud?

¹⁵ Patehng met, Kristian pwopwoud kan me kin nohn karanihala emen me kaidehn arail pwoud kin mihla nan irair keper ehu. E kansensuwed me ekei Kristian pwopwoud kan ahnekihda pepehm sapwung ong irail me re nohn karanihala. (Madiu 5:28) Soangen pepehm pwukat uhd kahrehda wiewia kan me kin uhdahn kauwehla wahu nan pwopwoud. Tehk dahme wahnpoaron Pohl kaweidki me pid ire wet.

16. Kaweid dahieu me pid pwopwoud me Pohl kihda?

¹⁶ Mwurinte Pohl kaweidki en “wauneki kasarawien kapwopwoud,” e kapatahiong: “Kumwail ohl pwopwoud oh lih pwopwoud kan, kumwail uhdahn pahn kin loalopwoatpene. Koht pahn ketin kadeikada me kin mouren kamwahl oh me kin mouren nenek.” (Ipru 13:4) Nsenen pwopwoud anahne wiawihte nanpwungen koasoandi en pwopwoud ehu. Ihme kahrehda Kristian akan kin kapwaiada kaweid wet: “Rapahki omw peren rehn serepein me ke pwoudiki.”—Lepin Padahk 5:18.

17. (a) Dahme kahrehda Kristian akan en dehr ahneki madamadau en sampah me pid kamwahl? (b) Ia duwen atail kak kahlemengih Sohp?

¹⁷ Irail me kin wia nsenen pwopwoud rehn emen me kaidehn arail pwoud kin kasalehda arail mwamwahliki sapwellimen Koht kosonned kan. Mehlel, aramas tohto solahr kin suwedki tiahk en kamwahl. Ahpw sohte lipilipil dahme aramas teikan kin ndahki kamwahl, met sohte pahn kamwakid en Kristian akan ar madamadau. Irail kin wehwehki me kaidehn aramas ahpw “Koht pahn ketin kadeikada me kin mouren kamwahl oh me kin mouren nenek.” (Ipru 10:31; 12:29) Ihme kahrehda Kristian mehlel kan kin kapwaiada sapwellimen Koht koasoandi me pid duwen ire wet. (Wadek Rom 12:9.) Tamanda dahme Sohp koasoia: “I wiadahr inou lapalap ehu: I en dehr kin kangkakil serepein men ni ineng suwed.” (Sohp 31:1) Pwehn dehr tepida wia mehkot me kak kahrehiong irail en wiahda kamwahl, Kristian mehlel kan kin kanahieng pwe ren dehr kilang oh inengihada emen me kaidehn arail pwoud.​—Menlau kilang oaralap “Dahme Paipel Mahsanih Duwen Mweipeseng oh Tohrohrpeseng en Pwopwoud.”

18. (a) Ia duwen Siohwa eh kin ketin kilangwohng tiahk en kamwahl? (b) Ia duwen kamwahl oh pwongih dikedik ara kin duwepenehte?

 ¹⁸ Ia duwen Siohwa eh kin ketin kilangwohng kamwahl? Kosonned en Moses kin sewese kitail en wehwehki sapwellimen Siohwa pepehm me pid ire wet. Nan Israel en mahs, kamwahl oh pwongih dikedik kan kin wia dihp laud kei  me kin imwikihla emen en kamakamala. (Lipai 20:2, 10) Eri, ke kak kilang ia duwen kamwahl oh pwongih dikedik kan ara duwepenehte? Mehn Israel men me kin pwongih dikedik kin kauwehla eh inou rehn Siohwa. Duwehte met, mehn Israel men me wiahda kamwahl kin kauwehla eh inou ong eh pwoud. Ira koaros kauwehla ara lelepek. (Eksodus 19:5, 6; Deuderonomi 5:9; wadek Malakai 2:14.) Ihme kahrehda ira koaros wiahda dihp laud mwohn silangin Siohwa Koht me lelepek oh likilik.​—Melkahka 33:4.

19. Dahme kak sewese emen en koasoanehdi teng en dehr wiahda kamwahl, oh dahme kahrehda?

¹⁹ Mehlel, Kristian akan sohte mi pahn kosonned en Moses. Ahpw, ma Kristian akan kin tamanda me kamwahl kin wia dihp laud ehu nan Israel en mahs, met pahn kak sewese irail en koasoanehdi teng en dehr wia met. Dahme kahrehda? Medewehla duwen met: Ke pahn pedolong nan ihmw sarawi ehu oh kelepwikihdi oh kapakap mwohn dikedik ehu? Ke pahn mwadangete nda, ‘Soh douluhl!’ Ahpw ia duwe, ke pahn wia met ma emen pahn kasongekin uhk mwohni laud? Ke pil pahn nda, ‘Sohte kak!’ Ei, en medewehda en salelepek ong Siohwa sang ni pwongih dikedik kan kin wia mehkot kasaut ong Kristian mehlel emen. Duwehte met, Kristian akan anahne kasautki madamadau en salelepek ong arail Koht Siohwa oh pil arail pwoud kan ni arail pahn wiahda kamwahl, sohte lipilipil dahme pahn kasonge irail. (Melkahka 51:1, 4; Kolose 3:5) Kitail sohte men wiahda mehkot me pahn kaperenda Sehdan oh pahn mwamwahliki Siohwa oh koasoandi sarawi en pwopwoud.

20. Dahme kin wiawi nan ekei mouren pwopwoud kan? Menlau kihda ehu karasaras.

²⁰ Likin liksang wiewia kan me pahn kamwamwahlihala  koasoandi en pwopwoud, dahme ke pil kak wia pwehn pwurehng kakehlailihala omw wauneki omw pwoud? Pwehn sapengala met, medewehla koasoandi en pwopwoud nin duwen ihmw ehu. Oh medewe duwen lokaia kadek kan, wiewia kadek kan, oh wiewia teikan me kin kasalehda wahu me ira kin wia nanpwungara duwehte kapwat en nan ihmw ehu. Ma ke kin pehm me kumwa kin kerenpene, omw mouren pwopwoud kin duwehte ihmw ehu me kin kapwatkihda soahng kan me kahrehda en kansenamwahu oh lingan. Ahpw ma amwa kerenpene kin tikitikla, amwa mouren pwopwoud solahr pahn nsenamwahu oh pahn duwehla ihmw ehu me sohte kapwat. Pwehki omw men peikiong sapwellimen Koht kehkehlik en “wauneki kasarawien kapwopwoud,” ke pahn men kamwahwihala irair wet. E konehng en onehda sapahl oh kamwahwihala mehkot me kesempwal oh wahu. Ia duwen omw kak wia met? Mahsen en Koht mahsanih: “Ihmw kan kin kokouda pohn poahsoan me poahsoanki kupwurokong oh dehdehki. Wasa me loalokong kin mi ie, pere kan kin audaudkihda dipwisou kesempwal oh lingan.” (Lepin Padahk 24:3, 4) Medewehla ia duwen mahsen pwukat ar kak doadoahk nan pwopwoud.

21. Ia duwen atail kak ekisekis kakehlailihala atail mouren pwopwoud? (Pil menlau kilang koakon “ Ia Duwen Ei Kak Kamwahwihala Ei Mouren Pwopwoud?”)

²¹ Nanpwungen “dipwisou  kesempwal oh lingan” me kin kapwatahda peneinei nsenamwahu ehu iei soangen irair kan me duwehte limpoak mehlel, lemmwiki Koht, oh pwoson kehlail. (Lepin Padahk 15:16, 17; 1 Piter 1:7) Irair pwukat kin wiahda pwopwoud kehlail ehu. Ahpw ke tehk ia duwen pere kan nan iren Paipel en Lepin Padahk ar kin audaudki dipwisou kesempwal kan? Pwehki “loalokong” kin mi wasao. Ei, ma aramas pahn doadoahngki, loalokong me kohsang nan Paipel kin ahneki manaman me kak wekidala arail madamadau oh kamwakid irail en pwurehng kalaudehla arail limpoak nanpwungarail. (Rom 12:2; Pilipai 1:9) Ihme kahrehda ma kowe oh omw pwoud pahn mwohdpene oh ehukihpene iren Paipel ehu me duwehte iren rahn, de ire kan me poahsoankihda Paipel nan Kahn Iroir de sawaspen Paipel teikan me pid mouren pwopwoud, met pahn duwehte amwa kin tehk kapwat lingan ehu pwehn kapwatahda imwomwa. Ma limpoak ong Siohwa kin kamwakid uhk en doadoahngki kaweid kan me pid mouren pwopwoud me ke ahpwtehn sukuhlki, met duwehte omw kin wahdohng kapwat lingan nan “pere kan.” Met pahn sewese omw pwopwoud en pwurehng ahneki nsenamwahu.

22. Soangen nsenamwahu dahieu me kitail kak ahneki ma kitail kin nantihong kapwaiada atail pwukoa pwehn kakehlailihala atail pwopwoud?

²² Ke pahn anahne ahnsou laud oh doadoahk laud pwehn kapwurehdo ehuehu mehn kapwat kan. Ahpw ma ke kin nantihong kapwaiada omw pwukoa, ke pahn ahneki nsenamwahu sang ni omw ese me ke kin peikiong kehkehlik en Paipel wet: “Kumwail wahupene nanpwungamwail.” (Rom 12:10; Melkahka 147:11) Oh me keieu kesempwal, omw nantihong kawauwihala omw mouren pwopwoud pahn sewese iuk en dadaurete ni limpoak en Koht.