1, 2. Dahme kahrehda Pohl sohte pwuriamweikihla lokolok me e lelohng nan Serusalem?

 MWURIN Pohl eh pitsang moromoro nan Serusalem, e pwurehng selidi. Wahnpoaron ngoang menet sohte pwuriamweikihla eh lelohng lokolok nan Serusalem. E rong me e pahn kasik “selidi oh kahpwal kan” nan kahnimw wet. (Wiewia 20:22, 23) Mendahki Pohl sohte ese dahme uhdahn pahn wiawihong ih, e ese me e pahn pousehlahte lelohng lokolok pwehki mwaren Sises.—Wiewia 9:16.

² Pil soukohp Kristian kan kehkehlingkihong Pohl me e pahn selidi oh ‘pengpengla rehn mehn liki kan.’ (Wiewia 21:4, 10, 11) Pokon en mehn Suhs kei ahpwtehn song en kemehla ih, oh mwurinte mwo, e mwomwen me tohn Sanedrino pahn “dapengpeseng” ni ar akahkamaiki duwen dahme Pohl koasoia ko. Wahnpoaron menet wie sensel rehn sounpei en Rom kan oh e pahn pwurehng ale kopwung oh e pahn anahne doare pein ih sang arail kedip kan. (Wiewia 21:31; 23:10) Kahrehda wahnpoaron Pohl uhdahn anahne mehn kangoang!

3. Ia wasa kitail kin alehdi mehn kangoang kan pwe kitail en pousehlahte atail doadoahk en kalohk?

³ Kitail ese me ni imwin rahn akan, “irail koaros me men mourki poadidiong Koht ni arail kin miniminiong Krais Sises pil pahn lelohng kalokolok.” (2 Tim. 3:12) Ekei pak kitail pil kin anahne mehn kangoang kan pwe kitail en pousehlahte wia atail doadoahk en kalohk. Ia uwen atail kin kalahnganki mehn kangoang kan me kin kohda ni ahnsou me konehng, me kitail kin alehdi sang sawasepen Paipel kan oh mihting kan me “ladu lelepek oh loalokong” kin koasoanehdi! (Mad. 24:45) Siohwa ketin kamehlelehiong kitail me sohte imwintihti en rongamwahwo men pahn pweida. Irail pil sohte pahn kauwehla sapwellime ladu kan nin duwen pwihn ehu de pil kauhdi arail doadoahk en kalohk. (Ais. 54:17; Ser. 1:19) Ahpw dahme wiawihong wahnpoaron Pohl? E alehdi mehn kangoang pwehn  pousehlahte kalohk ni unsek mendahki uhwong kan? Ma iei, kangoang dah me e alehdi oh ia duwen eh mwekidki met?

4, 5. Mehn kangoang dah me Pohl alehdi, oh dahme kahrehda e konehng ahnsowo?

⁴ Wahnpoaron Pohl alehdi mehn kangoang me e anahne nipwongo mwurin eh pitsang Sanedrin. Paipel mahsanih: “Kauno ahpw ket limwah oh mahsanih: ‘Eimah! Pwe duwen omw kin kadehdeiedahr ni unsek nan Serusalem, eri ke uhdahn pahn pil kadehde nan Rom.’” (Wiewia 23:11) Mahsen kangoang pwukat sang rehn Sises kahrehiong Pohl en kamehlele me e pahn pitila. E ese me e pahn pitila pwehn kohla Rom oh ahneki ahnsou mwahu en kadehdehda duwen Sises wasao.

⁵ Pohl alehdi mehn kangoang ni ahnsou me konehng. Mandahsang rahno, ohlen Suhs 40 “wiahda koasoandi ehu oh kahukihla me re pahn riahla ma re pahn kang de nim mehkot mwohn arail kemehla Pohl.” Ar “inoukidahr koasoandi” wet kasalehda ia uwen mehn Suhs pwukat ar koasoanehdi teng en kemehla wahnpoarono. Re kamehlele me mie mehkot suwed pahn wiawi ma arail koasoandio sohte pweida. (Wiewia 23:12-15) Kaunen samworo ko oh ohl mah ko kamanala arail koasoandio, me Pohl en kapwurpwurala Sanedrin pwehn mwomwen me re pahn pwurehng kapeidakih. Ahpw erein eh pahn kohkohlahng Sanedrin, re pahn rukihedi pwe ren kemehla.

6. Ia duwen Pohl eh esehda duwen koasoandi mwersuwedo me e kakete mehkihla? Ia duwen me pwulopwul kan ar kak alasang mehn kahlemeng en nein rien Pohlo?

⁶ Ahpw pwutak me Pohl pahn nainekio rongada duwen pilahn mwersuwedo oh padahkihong Pohl. Pohl uhd ndaiong pwutako en padahkihong kaunen sounpei en Romo Klaudius Lisias. (Wiewia 23:16-22) Siohwa kin uhdahn ketin poakohng me pwulopwul kan me duwehte pwutak me Pohl pahn nainekio, me kin ni eimah tounmeteikihla pein irail pwehn sewese sapwellimen Koht aramas akan oh ni lelepek wia dahme re kak wia pwehn utung doadoahk en Wehio.

7, 8. Dahme Klaudius Lisias wia pwehn doare Pohl?

⁷ Klaudius Lisias wia kaunen sounpei men me kin apwalih ohl 1,000. Ni ahnsou me e rongada duwen koasoandi mwersuwed me wiawihda ong Pohl, e mwadangete ruwese pwihn en sounpei kan, sounkesik ketieu kan oh soundak oahs kan me patpene wiahda ohl 470, ren kohkohlahsang Serusalem nipwongo oh perehsang Pohl  kahpwal kan ni arail pahn kahrelahng ih Sesaria. Ni ar pahn lella mwo, re pahn wahla Pohl rehn Kepina Peliks. a Sesaria wia kahnimw me keieu kesempwal ong Rom nan Sudia, oh mehn Suhs tohto kin kousoan wasao. Ahpw pali laud en tohn kahnimwo wia mehn liki kei. Sesaria kin meleilei oh uhdahn weksang Serusalem me kin pingiping, wasa me aramas akan kin lipilipilki oh uhwong laud pelien lamalam teikan. Sesaria pil wia poasen kaunen sounpei en Rom nan Sudia.

⁸ Lisias idawehn kosonned en Rom oh kadaralahng Peliks kisinlikou ehu me kawehwehda iren kopwungo. Lisias koasoia me ni eh esehda me Pohl wia towe mehlel en Rom, e doarehla Pohl pwe e rongada me mehn Suhs ko “kereniong kemehla” ih. Lisias koasoia me Pohl sohte dipikihda mehkot “me pahn kahrehiong en kamakamala de selidi,” ahpw pwehki pilahn mwersuwed me wiawihda ong Pohl, e kadarala Pohl rehn Peliks pwe kepinao en kak rong sounkedip ko oh eri wia kopwung duwen ireo.—Wiewia 23:25-30.

9. (a) Ia duwen Lisias eh kauwehla en Pohl pwuhng nin duwen towe mehlel en Rom? (b) Dahme kahrehda kitail kakete isaneki atail pwuhng nin duwen towe mehlel en sahpw ehu?

⁹ Ia duwe, soahng koaros me Lisias ntingihedi nan kisinlikowo mehlel? Kaidehn koaros. E mwomwen me e songosong en adamwahula rehn kepinao. Kaidehn e doarehla Pohl pwehki e esehda me Pohl wia towe mehlel en Rom. E pil sohte kasalehda me e wiahda ruwes ehu pwe Pohl en “selkihdi selmete riapwoat” oh mwuhr ren pil kapeidek oh wokih Pohl. (Wiewia 21:30-34; 22:24-29) Kahrehda Lisias kauwehla en Pohl pwuhng nin duwen towe mehlel en Rom. Rahnpwukat, Sehdan kin doadoahngki irail me kin poadidiong arail pelien lamalam likamw kan pwehn kaloke sapwellimen Koht aramas akan, oh re kin song en kihsang atail saledek en kaudokiong Koht. Ahpw duwehte Pohl, sapwellimen Koht aramas akan kin kak kalapw isaneki arail pwuhng nin duwen towe mehlel en sahpw ehu oh poadoandoarkihla kosonned.

10. Soangen kedip kehlail dah me lelohng Pohl?

¹⁰ Nan Sesaria, Pohl wie “sensel nan tehnpesen Erod” oh awiawih sounkedip ko ren kohdo sang Serusalem. (Wiewia 23:35) Mwurin rahn limau, irail ahpw leledo, oh irail pwukat iei Samworo Lapalap  Ananaias, sounsawas en palien kosonnedo Tertulus, oh pwihn en ohl mah kei. Tertulus tepida kapingahki Peliks dahme e wiahda ong mehn Suhs kan, oh e sansal me e songosong adamwahula reh. b Mwuri e ahpw koasoia duwen en Pohl iren kopwungo oh me Pohl wia ‘meninkau men, me kin kahrehda uhwong koperment nanpwungen mehn Suhs koaros nan wasa koaros nin sampah, oh e kin tiengla nan pwihnen mehn Nasaret. E pil song en kasaminehla tehnpas sarawio, kahrehda re koledi.’ Mehn Suhs teikan “iang kedipa ih oh koasoia me mepwukat koaros me mehlel.” (Wiewia 24:5, 6, 9) En kin kahrehda uhwong koperment, tiengla mwowe wiahda pwihn keper ehu, oh kasaminehla tehnpas sarawio kin wia kedip kehlail kei me kak imwikihla aramas en kamakamkihla.

11, 12. Ia duwen Pohl eh pere pein ih sang kedip ko me wiawihong?

¹¹ Pohl eri mweimweiong en koasoi. Ih eri tepida koasoia: “I pahn perenki koasoi pwe I en doare pein ngehi mwohmwi.” E kasalehda ni sansal me kedip ko sohte mehlel. Wahnpoarono sohte kasaminehla tehnpas sarawio, e pil sohte kahrehda uhwong koperment. E kasalehda me e sohte mihmihki Serusalem erein “sounpar tohto” oh e pwurodo pwehn wahdo “mwohni mehn sewese” Kristian akan me semwehmwehla pwehki lehk lapalap oh kalokolok. Pohl koasoia ni ngidingid me mwohn e pedolong nan tehnpas sarawio, e “mwakelekeldahr ong kaudok” oh me e kin nantihong “kolokol nsenmwakelekel mwohn Koht oh aramas akan.”—Wiewia 24:10-13, 16-18.

¹² Pohl eri wehkada me e kin kaudokiong Koht en seme mehn mahs ako “nin duwen ahl me re kahdaneki pwihnen mehn Nasaret.” Ahpw e koasoia ni ngidingid me e kin kamehlele “soahng koaros me kileldier nan Kosonnedo oh ntingdier rehn Soukohp ako.” Oh duwehte eh sounkedip ko, e kin kamehlele me mie koapworopwor en “kaiasada ong me pwung kan oh me sapwung kan.” Pohl eri peki rehn sounkedip ko ren kasalehda mehn kadehde ong arail kedip ko, oh koasoia: “Mweidohng ohl pwukat me mi wasaht ren pein ndahda sapwung dah me I wiahda ni ei mi mwohn Sanedrin, ihte me I wia ni ei kesikesihnen nanpwungarail, I ngihl laudida nda: ‘I pakadeikadahr mwohmwail rahnwet pwehki kaiasadahn me melahr akan!’”—Wiewia 24:14, 15, 20, 21.

13-15. Dahme kahrehda Pohl wia mehn kahlemeng mwahu ong kitail ni atail pahn koasoi mwohn lapalap kan?

 ¹³ Pohl wiahda mehn kahlemeng mwahu ong kitail en alasang ma mie pak kitail wisikla mwohn lapalap akan pwehki atail kaudok oh karaun likamw kan me kitail alehdi me dene kitail kin wiahda mehn kepingiping kan, uhwong koperment, de wia kisehn pwihn keper ehu. Pohl sohte kapinga kepinao pwehn kenikenla duwehte dahme Tertulus wia. Pohl kolokol eh meleilei oh kasalehda wahu. E koasoi ni kamantik, ni sansal oh ni mehlel. E nda me “mehn Suhs ekei sang wehin Eisia” me song en kedipahki ih me dene e kasaminehla tehnpas sarawio, sohte iang mi wasao, oh kosonned mweidohng en kak pein koasoiong irail oh rong arail kedip ko.—Wiewia 24:18, 19.

¹⁴ Ahpw kesempwal sang met, Pohl sohte masak koasoia dahme e kin kamehlele. Ni eimah, wahnpoarono koasoia me e kin kamehlele duwen kaiasada, ire ehu me kahredahr kahpwal laud ni ahnsou me e koasoiong Sanedrino. (Wiewia 23:6-10) Ni eh kin pere pein ih, Pohl kasansalehda koapworopwor en kaiasada. Dahme kahrehda? Pwehki Pohl kin kadehdehda duwen Sises oh me e ketin iasadahr, mehkot me sounuhwong ko sohte kin kamehlele. (Wiewia 26:6-8, 22, 23) Ni mehlel, kahrepe me keieu kahrehda Pohl en ale kopwung iei pwehki e kin kamehlele duwen kaiasada, ahpw mehlel kaiasadahn Sises.

 ¹⁵ Duwehte Pohl, kitail kak kalohk ni eimah oh kak alehdi kehl sang dahme Sises ketin padahkihong sapwellimen tohnpadahk ko, ni eh mahsanih: “Aramas koaros pahn kailongkin kumwail pwehki mwarei. Ahpw mehmen me pahn dadaurete lel ni imwi pahn komourla.” Eri ia duwe, kitail pahn pwunodki dahme kitail pahn koasoia? Soh pwe Sises ketin inoukihda mahsanih: “Ni arail pahn pangkumwailla, kumwail dehr pwunodki dahme kumwail pahn nda; ahpw dahme pahn kohieng kumwail ni awao, ihme kumwail pahn nda, pwe kaidehn kumwail me pahn koasoi, ahpw sapwellimen Koht manaman.”—Mark 13:9-13.

16, 17. (a) Dahme Peliks nda oh wia erein en Pohl kopwungo? (b) Dahme ele kahrehda Peliks masepwehkada, ahpw dahme kahrehda e pousehlahte tuhwong Pohl?

¹⁶ Met kaidehn ehdin Kepina Peliks eh rong duwen dahme Kristian akan kin kamehlele. Pwe ireo mahsanih: “Peliks me wehwehki ire mehlel kan duwen Ahl pwoatet [lepin lokaia wet kin dokedoke tepin Kristian ko] ahpw kasaula arail kopwungo oh nda: ‘Ni ahnsou me Lisias, kaunen karis en sounpeio pahn kohdihdo, I ahpw pahn koasoanehdi ire pwukat me pid kumwail.’ Oh e ruwese kaunen sounpeio me ohlo en wie sensel ahpw en pil ahneki ekis saledek, oh en mweimweiong ienge ko ren apwalihala eh anahn akan.”—Wiewia 24:22, 23.

¹⁷ Rahn kei mwuri, Peliks iangahki eh pwoudo, lihen Suhso Drusila, ahpw ekerodo Pohl oh “rongorong eh koasoia duwen pwoson Krais Sises.” (Wiewia 24:24) Ahpw ni Pohl eh koasoia duwen “tiahk pwung oh kaunda pein ih oh kadeik me pahn kohdo, Peliks ahpw masepwehkada,” mwein pwehki kadeikpen loale kadeikada ih ong soahng suwed kan me e wiadahr. Ih eri kadarala Pohl oh nda: “Ke kakehr mwesel ahnsou wet, ahpw ni ei pahn ahneki ahnsou mwahu, I pahn pwurehng eker uhk.” Mwurin mwo Peliks kin tuhwong Pohl pak tohto, kaidehn pwehki e men esehla dahme mehlel, ahpw pwehki e kasikasik me Pohl en kihong ih mwohni.—Wiewia 24:25, 26.

18. Dahme kahrehda Pohl koasoiaiong Peliks oh eh pwoudo duwen “tiahk pwung oh kaunda pein ih oh kadeik me pahn kohdo”?

¹⁸ Dahme Pohl koasoiaiong Peliks oh eh pwoudo duwen “tiahk pwung oh kaunda pein ih oh kadeik me pahn kohdo”? Tamataman me ira men ese dahme anahn ong emen en “pwoson Krais Sises.” Pwehki Pohl kin ese ara kin tiahk samin, lemei oh wiewia sapahrek, e kasalehda dahme Koht ketin kupwurki sang irail koaros me men wiahla sapwellimen Sises tohnpadahk. Dahme Pohl koasoia kasalehda wekpeseng laud nanpwungen sapwellimen Koht koasoandi  kan ong dahme pwung oh dahme Peliks oh eh pwoudo kin wiewia. Met sewese ira en wehwehki me Koht pahn ketin kadeikada aramas koaros ong dahme re kin medewe, nda oh wia, oh sapwellimen Koht kadeik ong ira kin kesempwal sang kadeik me Peliks pahn wiahiong Pohl. Ihme kahrehda Peliks eh “masepwehkada”!

19, 20. (a) Dahme kitail anahne wia ma irail me kitail kalohk ong mwomwen men rong ahpw ni mehlel irail kin raparapahkihte pein kamwahuparail? (b) Ia duwen atail ese me Peliks kaidehn uhdahn kompoakepahn Pohl?

¹⁹ Mwein kitail pahn diarada soangen aramas me duwehte Peliks nan atail doadoahk en kalohk. Nin tapio re pahn mwomwen me re men sukuhlki duwen padahk mehlel, ahpw ni mehlelo irail kin raparapahki pein kamwahuparail. Kitail anahne kanahieng ni atail pahn song sewese soangen aramas pwukat. Ahpw duwehte Pohl, kitail kak ni wahu padahkihong irail dahme irail anahne wia pwe ren kaperenda Koht. Mwein padahk mehlel sang nan Paipel kak kamwakid irail en wiahda wekidekla kan. Ahpw ma e sansalehr me irail sohte men uhdihsang arail wiewia suwed kan, kitail sohte pahn idingkihong irail en wiahda wekidekla kan. Ahpw kitail en rapahki irail akan me uhdahn men esehla padahk mehlel.

²⁰ Me pid duwen Peliks, audepen eh mohngiong sansalda nan mahsen pwukat: “Ni sounpar riau eh dower powe, Porsius Pestus uhd wiliandi Peliks; a pwehki Peliks kin men kenikenla rehn mehn Suhs akan, e kihdihte Pohl nan imweteng.” (Wiewia 24:27) Peliks kaidehn uhdahn kompoakepahn Pohl. Peliks kin ese me irail me kin idawehn “Ahlo” sohte kin songosong en uhwong koperment de pil songosong en kahrehiong meteikan ren wia met. (Wiewia 19:23) E pil ese me Pohl sohte kauwehla kosonned en Rom. Ahpw Peliks kihdihte wahnpoarono nan imweteng pwehn “kenikenla rehn mehn Suhs akan.”

21. Dahme wiawihong Pohl mwurin Porsius Pestus wiahla kepina, oh dahme kakete kakehlahda Pohl?

²¹ Nin duwen eh sansal nan kaimwiseklahn iretikitik en Wiewia 24, Pohl wie senselte ni ahnsou me Porsius Pestus wiahla kepina mwurin Peliks. Oh pak tohto, Pohl anahne pwarala rehn soangsoangen lapalap akan pwehn koasoiong irail. Ni mehlel, wahnpoaron eimah menet “wisiklahng mwohn nanmwarki kan oh kepina kan.” (Luk 21:12) Nin duwen me kitail pahn kilang, mwuhr e pahn wia kadehde ong nanmwarkien Rom, kaun me keieu lapalap ni ahnsowo. Erein nan ahnsou ko pwon, en Pohl pwoson sohte luwetala. Kitail uhdahn kamehlele me Pohl kin pousehlahte ale kehl sang sapwellimen Sises mahseno: “Eimah!”