IA DUWEN ma emen kihong uhk kisakis kaselel ehu. Ia pahn ahmw pepehm?— Ke pahn ndahte ‘kalahngan’ oh mwurin mwo manokehla aramas me kihong uhk kisakiso? De ke pahn tamataman ih oh dahme e wiahiong uhk?—

Siohwa Koht ketikihong kitail kisakis kaselel ehu. E ketin kadarodo sapwellime Ohlo nin sampah pwehn mehkin kitailla. Ke ese dahme kahrehda Sises anahnehki mehkin kitailla?— Met ire kesempwal ehu me kitail anahne wehwehki.

Nin duwen me kitail sukuhlki nan Irelaud 23, Adam dipada ni eh kauwehla sapwellimen Koht kosonned. Oh kitail eri sohsohki dihp sang Adam me wia semen aramas koaros. Eri dahme ke leme me kitail anahne.— Ni karasaras, kitail anahne emen sahm me unsek me pahn kolokol eh unsek erein eh mour pohn sampah. Ihs me ke leme pahn kak wia sahm menet ong kitail?— Sises kak ketin wia met.

Siohwa ketin kadarodo Sises nin sampah pwehn kak wiahla samatail a solahr pahn Adam. Paipel mahsanih: “‘Tepin aramas, Adam, wiawihda oh wiahla aramas mour men’; a Adam en keieun dihen mwuhro wiahla Ngenen Komour.” Ihs me wia tepin Adamo?— Ih me Koht ketin wiahda sang nan pwelen sampah. Ihs me keriaun Adamo?— Sises. Paipel kin kasalehda duwen met ni eh mahsanih: “Tepin aramas, iei Adam, wiawihda sang ni pwehl, a keriemen en Adam [Sises] ketidihdo sang nanleng.”​—1 Korint 15:45, 47; Senesis 2:7.

Pwehki Koht eh ketin kasauada mouren Sises sang nanleng oh ketikihong nan kapehden Mery, Sises sohte ketin sohsohki dihp sang rehn Adam. Ihme kahrehda Sises ketin wia aramas unsek men. (Luk 1: 30-35) Ihme kahrehda tohnleng men pil padahkihong silepen sihpw ko ni ahnsou me Sises ketin ipwidi: “Pwongpwong wet Sounkomouro ipwidiongkumwailehr.” (Luk 2:11) Ahpw pwe en wiahla atail Sounkomour, dahme kisin seri Sises anahne wia mahs?— E anahne kekeirda oh wiahla ohl emen duwehte Adam. Eri Sises kak wiahla ‘keriaun Adam.’

Sises me wia atail Sounkomour pahn pil wiahla “Sahm Poatopoat” ong kitail. Ih met me Paipel kin kahdaneki ih. (Aiseia 9:6, 7) Ohl unsek Sises kak ketin wiahla samatail a kaidehn Adam me soh unsekla ni eh dipada. Kitail kak pilada ‘keriaun Adam’ en wia samatail. Ahpw Sises ketin wia sapwellimen Siohwa Koht Ohl.

Ni atail pahn sukuhlki duwen Sises, kitail kak wiahkihla ih atail Sounkomour. Ke taman dahme kitail anahne saledeksang?— Ei, sang dihp oh mehla me kitail sohsohki sang rehn Adam. Mour unsek me Sises tounmeteikihla ong kitail ni eh wiahlahr ohl men kin adaneki tomw. Siohwa ketikihda tomwo pwe kitail en kak ale mahkpen dipatail kan.​—Madiu 20:28; Rom 5:8; 6:23.

Kitail sohte men manokehla dahme Koht oh sapwellime Ohl ketin wiahiong kitail, kaidehn?— Sises ketin kasalehiong sapwellime tohnpadahk ko ahl ehu me pahn kak sewesei kitail en tamataman dahme e ketin wiahdahr. Kita pahn koasoiapene duwen met.

Song medewehla me ke mi nan pere ehu powe nan ihmw ehu nan Serusalem. E nipwongdiehr. Sises oh  sapwellime wahnpoaron ko mwomwohdpene ni tehpel ehu. Mie uduk en sihmpwul me kerengda pohn kisiniei, pilawa oh wain pohn tehpelo. Re wia mwenge ehu me kesempwal. Ke ese dahme kahrehda?—

Mwenge wet kin katamaniong irail dahme Siohwa ketin wiahiong mehn Israel ko sounpar tohto samwalahro ni ahnsou me sapwellime aramas ako kin wia lidu kei nan Isip. Ni ahnsowo, Siohwa mahsanihong sapwellime aramas ako: ‘Kemehla emen sihmpwul ong ehuehu peneinei, oh iriski ntao ni uhr en wenihmw kan nan temwen imwamwail akan.’ Ih eri pil mahsanih: ‘Pedolong nan imwamwail kan oh kang uduk en sihmpwulo.’

 Mehn Israel ako wia met. Nipwongohte, sapwellimen Koht tohnleng men kotehla Isip. Tohnlengo kemehla mesenih kan nan pali laud en ihmw ako. Ahpw ni tohnlengo eh kilang ntahn sihmpwulo ni uren wenihmw ako, e kin daulih ihmw ako. Sohte seri me mehla nan ihmw ako. Parao, nanmwarki en Isip masakada dahme sapwellimen Siohwa tohnlengo wiadahr. Eri Parao ndaiong mehn Israel ako: ‘Kumwail pitipit kohkohweisang Isip!’ Irail eri kihpene arail dipwisou ko pohn kamel ko oh dongki ko oh mweselda.

Siohwa sohte kupwurki sapwellime aramas ako en manokehla duwen eh ketin kapitirailla. Ih eri mahsanih: ‘Pak ehu nan pahr ehu, kumwail pahn kin kang mwenge pwukat me kumwail kang pwongpwong wet.’ Irail kin kahdaneki mwenge kesempwal wet Pahsohpa. Lepin lokaia wet Pahsohpa kohsang lepin lokaia ehu me wehwehki “daulih.” Pwongo, sapwellimen Koht tohnlengo kin “daulih” ihmw akan me kilelkihdi nta.​—Eksodus 12:1-13, 24-27, 31.

Sises oh sapwellime tohnpadahk ko kin medemedewe duwen met ni arail ketin kangkang mwengehn Pahsohpa wet. Mwurin mwo, Sises ketin wiahda mehkot me inenen kesempwal. Ahpw mwohn eh ketin wia met, e mahsanihong wahnpoaron salelepeko, Sudas en kohkohla. Sises ahpw ketikihda ehu luhwen lopwon en pilawa ko oh kapakap, pilitikihpeseng oh ketikihong sapwellime tohnpadahk ko. Ih eri mahsanih: “Kumwail iang ale oh tungoale.” Ih eri pil mahsanih ong irail: ‘Pilawa wet kin wehwehki paliwereiet me I pahn kihda ni ei pahn mehkin kumwailla.’

Mwuri Sises pil ketikihda kepin wain weitahta ehu. Mwurin pil ehu kapakap en kapingkalahngan, e ketikihong irail oh mahsanih: “Kumwail koaros iang tungoale.” Ih eri pil mahsanihong irail: ‘Wain wet kin wehwehki ntahi. Ahnsou keren, I pahn kakerehdi ntahi pwehn kasaledek kumwailla sang dipamwail kan. Kumwail wia met ong ni katamanpei.’​—Madiu 26:26-28; 1 Korint 11:23-26.

 Ke kin tehk me Sises mahsanih me sapwellime tohnpadahk ko anahne wiewia met ong katamanpe?— Irail solahr pahn wia Pahsohpao. Ahpw, pak ehu nan pahr ehu, irail pahn wia mwenge kesempwal wet pwehn kataman Sises oh sapwellime pwoula. Mwenge wet kin adaneki Sak en Soutik en Kauno. Rahnwet kitail kin kalapw nda Kataman. Dahme kahrehda?— Pwehki e kin katamandohng kitail dahme Sises oh Seme Siohwa Koht ketin wiahiong kitail.

Pilawao pahn kahrehda kitail en kin medewe paliweren Sises. E kupwurki meirongkihla paliwaro pwe kitail en kak ahneki mour soutuk. A ia duwen wain weitahtaho?— Mwo pahn katamandohng kitail pweinen ntahn Sises. E kesempwalsang ntahn sihmpwul en Pahsohpa nan Isip. Ke ese dahme kahrehda?— Paipel mahsanih me ntahn Sises kak wahdo mahk ong dipatail kan. Oh ni ahnsou me dipatail kan koaros pahn kohsang, kitail solahr pahn soumwahu, mahla oh mehla. Kitail anahne medemedewe met ni atail kin iang towehda Katamano.

Ia duwe, koaros anahne kang pilawa oh nim wain ni Katamano?— Sises mahsanihong irail ako me iang kang oh nim: ‘Kumwail pahn iang ie nan ei Wehi, oh kumwail pahn iang ie mwohd nan mwoahl akan nanleng.’ (Luk 22:19, 20, 30) Met wehwehki me irail pahn kohdahla nanleng pwehn iang Sises wia nanmwarki kan. Kahrehda ihte irail ako me ahneki koapworopwor en iang Sises kakaun nanleng pahn kang pilawa oh wain.

Ahpw irail ako me sohte kin iang kang pilawa oh nim wain anahne iang Katamano. Ke ese dahme kahrehda?— Pwehki Sises pil ketikihda sapwellime mour ong kitail. Kitail kin kasalehda me kitail sohte manokehla met ni atail kin iang towehda Katamano. Kitail kin tamataman sapwellimen Koht kisakis kaselel wet.