MIE pak me emen ndaiong uhk en wia mehkot me sapwung?— E idingkin uhk ken wia met? De e ndaiong uhk me e kaperen oh e sohte sapwung ma ke wia?— Ma emen wia met ong kitail, e kin kasonge kitail.

Dahme kitail pahn wia ahnsou me kasongosong lelohng kitail? Kitail pahn dukiong oh wia dahme sapwung?— Met sohte pahn kaperenda Siohwa Koht. Ahpw ke ese ihs me pahn perenda?— Iei Sehdan me Tepil.

Sehdan iei imwintihti en Koht oh pil atail imwintihti. Kitail sohte kak kilang ih pwehki ih ngehn emen. Ahpw e kak kilang kitail. Ehu rahno, Sehdan lokaiahiong Sounpadahk Lapalap Sises oh kasonge ih. Kita pahn kilang dahme Sises ketin wia. Eri kita pahn ese dahme pwung kita en wia ahnsou me kita kin lelohng kasongosong.

Sises kin ketin perenki wia kupwuren Koht ahnsou koaros. E ketin kasalehda met sang ni eh papidaisla nan Pillap Sordan. Sehdan kasonge Sises mwurinte e ketin papidaisla. Paipel mahsanih me “nanleng pa ritpeseng” ong Sises. (Madiu 3:16) Met kak wehwehki me ahnsowo Sises ketin tamanda soahng koaros nan eh mour nanleng rehn Koht.

Mwurin Sises ketin papidaisla, e ketila nan sapwtehn pwehn ketin medemedewe duwen soahng kan  me e ketin tamanda. Sises ketin wia met erein rahn pahisek oh pwohng pahisek. Erein ahnsowo Sises sohte ketin tungoale mehkot kahrehda e ketin duhpekla. Iei ahnsowo me Sehdan kasonge Sises.

Tepilo nda: “Ma sapwellimen Kohto komwi, a komw mahsanih pwe takai pwukat en wiahla pilawa.” Ia uwen eh pahn iou ma e kak wiahda pilawa pwukat! Ia duwen, Sises kak ketin wekidala takai pwukat ong pilawa?— Ei, e kak wia met. Dahme kahrehda? Pwehki ih sapwellimen Koht oh e sapwellimanki manaman en wia met.

Ma Tepilo ndaiong uhk en wekidala takai ong pilawa, ke pahn wia met?— Sises ketin duhpekla. E sou pahn mwahu en wia met pak ehute?— Sises mwahngih me e sapwung en doadoahngki sapwellime manaman ni ahl wet. Siohwa ketikihong ih manaman wet pwehn sewese aramas en kohdohng rehn Koht ahpw kaidehn en doadoahngki manaman wet ong pein ih.

Eri, Sises mahsanihong Sehdan dahme ntingdi nan Paipel: ‘Kaidehkin pilawahte me aramas kak mourki, pwe mahsen koaros me kin pwilisang rehn Koht.’ Sises mwahngih me en kaperenda Siohwa kesempwal sang en mwenge.

Ahpw Tepilo pwurehng kasonge Sises. E kahrehla Sises nan Serusalem oh pwilikihdi ni kadoken tehnpas sarawio. Sehdan eri nda: ‘Ma  sapwellimen Kohto komwi, a komw lusdihwei, pwe e ntingdier me sapwellime tohnleng kan pahn kolekinkomwihda pehrail kan, pwe ke dehr dipekelekel ni takai kan.’

Dahme kahrehda Sehdan ndahki met?— E nda met pwehn kasonge Sises en wia mehkot me sohte konehng. Ahpw Sises pil sohte ketin dukiong Sehdan. E mahsanihong Sehdan: ‘E pil ntingdier, “Ke dehr kasongosonge Siohwa, omw Koht.”’ Sises mwahngih me e sapwung en kasonge Siohwa sang ni eh pahn ketin kihong eh mour nan keper.

Ahpw Sehdan pil sohte uhdi. E kahrehla Sises pohn nahna ileile ehu. Ih eri kasalehiong Sises wehi kan koaros de koperment en sampah koaros oh ar lingan. Sehdan eri ndaiong Sises: “Mepwukat koaros I pahn kihong komwi, ma komw pahn poaridi oh pwongih ie.”

Medewehla duwen dahme Tepilo pahn kihong Sises. Mehlel me Sehdan me ahneki wehi pwukat koaros de koperment en aramas koaros?— Sises sohte sapwungki me Sehdan me ahneki mepwukat. Ma kaidehn Sehdan me ahneki mepwukat, Sises pahn ketin kasalehda met. Eri, Sehdan me uhdahn kaunen wehi kan koaros en sampah. Paipel pil kahdaneki ih “kaunen sampah wet.”​—Sohn 12:31.

Dahme ke pahn wia ma Sehdan nda me e pahn kihong uhk mehkot ma ke pahn kaudokiong ih?— Sises mwahngih me e pahn sapwung en kaudokiong Tepilo mehnda ma e pahn kihong ih mehkot. Eri Sises mahsanih: ‘Sehdan, kohkohweisang ie! Pwe e ntingdier me ke pahn pwongih Siohwa, omw Koht, oh ihete me ke pahn papah.’​—Madiu 4:1-10; Luk 4:1-13.

Kitail pil kin lelohng kasongosong kan. Ke ese ia ekei?— Iet ehu karasepe. Ahmw nohno wahdo kirahka. E padahkihong uhk ken dehr kang lao lel mwurin mwenge. Ahpw ke uhdahn men mwengedahr. Met kahrehiong uhk ken men kang kirahkao. Ia duwe, ke pahn  peikiong ahmw nohno?— Sehdan men ken sapeikiong ahmw nohno.

Tamataman duwen Sises. E ketin duhpekla. Ahpw e mwahngih me en kaperenda Koht kesempwalsang mwenge. Ke pahn kasalehda me ke duwehte Sises ma ke pahn peikiong ahmw nohno.

Mwein ekei seri kan pahn ndaiong uhk ken kang pwuh. Mwein re pahn ndaiong uhk me e  kaperen. Ahpw e kak kahrehiong ken soumwahuda oh e pahn kauwehla paliweromw. De emen pahn kihong uhk sika oh idingkin uhk ken simoak. Dahme ke pahn wia?—

Tamataman duwen Sises. Sehdan kasonge Sises en kihong eh mour nan keper ni eh pahn lus sang nan kadoken tehnpaso. Ahpw Sises sohte ketin wia met. Dahme ke pahn wia ma emen iding uhk en wia mehkot keper?— Sises sohte ketin rong Sehdan. Pil duwehte kowe, ke dehr rong emen me song en kahrehiong uhk en wia soahng kan me sapwung.

Ehu rahn mwein mie me pahn ndaiong uhk en pwongih sansal ehu, mehkot me Paipel mahsanih kitail en dehr wia. (Eksodus 20:4, 5) Mwein e wia kisehn kasarawi ehu nan sukuhl. Dahme ke pahn wia?—

E mengei en wia dahme pwung ni ahnsou me koaros iang wia. Ahpw met kak apwal ma meteikan kin song en kahrehiong kitail en wia mehkot sapwung. Irail kak nda me dahme re wiewia sohte uhdahn sapwung. Ahpw peidek me uhdahn kesempwal iei: Ia sapwellimen Koht madamadau? Ih me mwahngih dahme keieu mwahu.

Eri, sohte lipilipil dahme meteikan kin nda, kitail en dehr wia soahng kan me Koht mahsanih me sapwung. Met pahn kahrehiong kitail en kaperenda Koht ahnsou koaros oh kitail sohte pahn kaperenda Tepilo.