NAN irelaud riau en mwoweo, aramas depe me iasada?— Meh limmen. Seri depe?— Silimen. Oh kapahmeno iei mwahnakapw emen. Dahme met kin kasalehda?—

E kin kasalehda me Koht kin ketin poakohng seri kan oh me pwulopwul kan. Ahpw e pahn pil ketin kaiasada me tohto teikan. Ia duwe, Koht pahn ketin kaiasada irail kante me kin wia me mwahu?— Mwein ih me kitail kin medewe. Ahpw aramas tohto saikinte sukuhlki dahme mehlel duwen Siohwa Koht oh sapwellime Ohlo. Kahrehda irail kin wia dahme sapwung pwehki irail kin sukuhlki soahng kan me sapwung. Ke leme Koht pahn ketin kaiasada soangen aramas duwehte met?—

Paipel mahsanih: “E pahn mie kaiasada ong me pwung kan oh me sapwung kan.” (Wiewia 24:15, NW) Dahme kahrehda irail me sapwung kan de me sohte kin wia dahme pwung pahn iaskihda?— Met pwehki irail saikinte ale ahnsou mwahu en sukuhlki duwen Siohwa oh dahme e kupwurki aramas en wia.

 Iahd me aramas pahn iasada?— Medewe ahnsou me Lasarus mehla oh Sises ketin inoukihong rie lih Marda: “Riomw ohlo pahn pwurehng mourda.” Marda eri sapeng: “I patohwan ese me e pahn pwurehng mourda ni rahnen neko.” (Sohn 11:23, 24) Ia wehwehn Marda eh nda me Lasarus pahn mourda “ni rahnen neko”?—

Marda rongehr Sises eh ketin inoukihdi: “Koaros me mihmi nan sousou kan pahn rong kapitie, oh re pahn pedoisang nan arail sousou kan.” (Sohn 5:28, 29) Eri, “rahnen neko” iei ahnsou me koaros me Koht kin ketin tamataman pahn iasada. Rahnen nek wet kaidehn awa 24. E pahn reireiki pahr kid. Paipel mahsanih me ni rahno, Koht ‘pahn ketin kadeikada sampah pwon.’ Irail akan me pahn iasada pahn iang kisehn irail akan me e pahn ketin kadeik.​—Wiewia 17:31; 2 Piter 3:8.

Medewehla uwen kaperen en rahno! Erein pahr kido, aramas rar kei me melahr pahn iasadahng mour. Sises ketin kahdaneki wasa me irail pahn iasada ie, Paradais. Kita pahn kilang ia wasa Paradais pahn mi ie oh ia pahn mwomwe.

Mpen awa siluh mwohn Sises eh pwoula nin tuhke pwoat, e ketin padahkihong emen ohl me langalang limwah duwen Paradais. Ohlo pahn kamakamala pwehki soahng suwed kan me e wiahda. Ahpw ni ohl menet eh kilikilang oh rongorong dahme aramas ako kin ndahki Sises, e tepida kamehlele ih. Ohlo eri nda: “Komw ketin tamataman  ie ni omwi pahn ket nan sapwellimomwi wehi.” Sises ketin sapeng mahsanih: “I ndaiong uhk ni mehlel rahnwet, Ke pahn iang ie mi nan Paradais.”​—Luk 23:42, 43, NW.

Ia wehwehn sapwellimen Sises mahsen pwukat? Ia wasa Paradais mi ie?— Medewe mahs. Ia wasa Paradais mi ie nin tapio?— Tamataman me Koht ketikihong tepin aramas Adam oh eh pwoud paradais ehu pwe ira en kousoan loale nin sampah wet. E adaneki mwetuwel en Ihden. Mie mahn akan nan mwetuwel wet oh re sohte kin lidere meteikan. Oh mie tuhke tohto me wah kan me inenen iou. Pil mie lapalahn pillap pwoat wasao. Wasa kaselel ehu met!​—Senesis 2:8-10.

Eri ni atail kin wadek duwen ohl suwed menet eh pahn mi nan Paradais, kitail pahn medewehla ahnsou me sampah wet pahn wiahla wasa kaselel ehu en kousoan ie. Ia duwe, Sises pahn iang ohl suwedo ket nan Paradais nin sampah?— Soh. Ke ese ia kahrepen Sises eh sohte pahn ketiket pohn sampah?—

Met pwehki Sises pahn ket nanleng oh e pahn kaunda Paradais nin sampah nin duwen nanmwarki men. Sises pahn ketiket rehn ohlo ni karasaras pwehki e pahn ketin kaiasada ohlo sang mehla oh e pil pahn ketikihong eh anahn akan. Ahpw dahme kahrehda Sises pahn ketin mweidohng ohl suwed menet en momour nan Paradais?— Kita pahn kilang ia pasapengpen met.

 Ia duwen, ohlo ese kupwuren Koht akan mwohn eh koasoiong Sises?— Soh e sehse. E kin wia soahng suwed akan pwehki e sehse dahme mehlel duwen Koht. Nan Paradais, e pahn sukuhlki kupwuren Koht akan. Mwurin mwo, e pahn ahneki ahnsou mwahu en kadehde me e uhdahn poakohng Koht sang ni eh pahn kapwaiada kupwuren Koht.

Ia duwe, koaros me pahn iasada pahn mour nan Paradais nin sampah?— Soh, kaidehn koaros. Ke ese ia kahrepe?— Pwehki ekei pahn iasada pwehn iang Sises mour nanleng. Irail pahn iang Sises kaunda paradais nin sampah nin duwen nanmwarki kei. Kita pahn kilang dahme kahrehda kitail esehki met.

Pwohng me manda Sises pwoula, e ketin padahkihong sapwellime wahnpoaron ko: ‘Pere tohto mie nan tehnpesen Semei nanleng, I pahn kohla oh kaunopadahng kumwail deumwail.’ Sises eri ketin inoukihong irail: ‘I pahn pwurodo oh kahreikumwaildohng ie, pwe kumwail en mi wasa me I kin mi ie.’​—Sohn 14:2, 3.

 Ia wasa me Sises ketila ie mwurin eh ketin iasada?— E ketidahla nanleng pwehn patopato rehn Semeo. (Sohn 17:4, 5) Eri, Sises ketin inoukihong sapwellime wahnpoaron ko oh tohnpadahk teikan me e pahn ketin kaiasirailda pwe irail en kak iang ih mi nanleng. Dahme irail pahn wia wasao rehn Sises?— Paipel mahsanih me sapwellime tohnpadahk ko me pahn iang “iasada keieu,” pahn mour nanleng oh kaunda sampah nin duwen nanmwarki kei “erein pahr kido.”​—Kaudiahl 5:10; 20:6; 2 Timoty 2:12.

Meh depe pahn iang “iasada keieu” oh iang Sises kakaun nin duwen nanmwarki kei?— Sises ketin padahkihong sapwellime tohnpadahk ko: “Kumwail kisin pwihn sihpw, kumwail dehr perki mehkot. Pwe Samamwail kupwurperenkidahr en ketikihong kumwail sapwellime wehi.” (Luk 12:32) E kileldier uwen tohtohn “kisin pwihn sihpw” wet me pahn iasada pwehn iang Sises nan sapwellime Wehi nanleng. Paipel kasalehda me “aramas lopw pahnen pahkid” me pahn iasada sang sampah.​—Kaudiahl 14:1, 3.

Meh depe pahn mour nan Paradais nin sampah?— Paipel sohte kasalehda. Ahpw Koht ketin padahkihong Adam oh Ihp ni ara mi nan mwetuwel en Ihden ira en naineki seri oh kadirehla sampah. Ira sohte kapwaiada met. Ahpw Koht pahn ketin wiahiong sampah wet en direkihla aramas mwahu kan, pwehki met iei kupwure.​—Senesis 1:28; Aiseia 45:18; 55:11.

Nna medewehla ia uwen kaselel en mour nan Paradais! Sampah pwon pahn wiahla wasa kaselel ehu. E pahn direkihla menpihr kan, mahn akan, oh lingankihla soangsoangen tuhke kan oh wahnrohs koaros. Sohte me pahn medek pwehki eh soumwahu oh sohte me pahn mehla. Koaros pahn wiahla kompoakepahn emenemen. Ma kitail men mour kohkohlahte nan Paradais, met iei ahnsoun kaunopada.