MIE pwutak de serepein kan me ke ese kin mwomwen kommwad?— Ke kin men iang irail? De ke kin men iang emen me kadek oh men en mie meleilei?— Sounpadahk Lapalapo mahsanih: “Meid pai me kin wiahda popohl, pwe irail pahn adaneki ‘sapwellimen Koht seri kan.’”​—Madiu 5:9, NW.

Ahpw ekei pak meteikan kin kahrehiong kitail en lingeringerda, kaidehn?— Met kin kak kahrehiong kitail en men dupukohng irail. E wiawihong sapwellimen Sises tohnpadahk ko ni arail wie seiseiloak kohla Serusalem. I pahn koasoiaiong uhk dahme wiawi.

Ni arail seiseiloak kohwei, Sises ketin kadarala ekei sapwellime tohnpadahk ko ni ehu kahnimw en Sameria pwe ren diarada wasa me re pahn kommoal ie. Ahpw aramas akan en wasao sohte men ren mi mwo pwehki re ahneki ehu pelien lamalam tohrohr. Oh re sohte kin mwahuki aramas me kin kohla nan kahnimw en Serusalem pwehn kaudok.

 Ma met pahn wiawihong uhk, dahme ke pahn wia? Ke pahn lingeringerda? Ke pahn men dupukohng irail?— Ih me tohnpadahk Seims oh Sohn men wia. Ira ahpw patohwanohng Sises: “Maing, komw ketin kupwurki se en patohwan peki pwe kisiniei en mweredi sang nanleng oh kamwasikeirailla?” Ih kahrepen Sises eh ketin kahdanekin ira Seri kan en Nansapwe! Ahpw Sises ketin padahkihong ira me e sohte pwung en wia met ong meteikan.​—Luk 9:51-56; Mark 3:17.

Mehlel me ekei pak aramas kin kak lemei ong kitail. Seri teikan mwein sohte pahn men kitail en iang irail mwadong. Irail kak nda: “Se sohte men ken iang kiht.” Ma met kin wiawihong kitail, kitail kak nsensuwedkihla, kaidehn? Mwein kitail pahn men dupukohng irail. Ahpw ia duwe, e pwung kitail en wia met?—

Ale noumw Paipelo. Kita kak pahkala nan Lepin Padahk 24:29. Wasaht mahsanih: “Ke dehr nda, ‘I pahn wiahiong dahme e wiahiong ie. I pahn dupukohng mehkoaros me e wiahiong ie!’”

Ke ese ia wehwehn iren Paipel wet?— E kin padahkihong kitail me kitail en dehr dupukohng meteikan. Kitail en dehr lemei ong aramas emen pwehki e lemei ong kitail. Ahpw ia duwen ma emen song en peiong uhk? Mwein e pahn kauwe iuk pwe ken lingeringerda. Oh mwein e pahn kouruhrkin uhk oh nda me ke masepwehk. Dahme ke pahn wia? Ke pahn peiong ih?—

Kita pahn pwurehng kilang dahme Paipel mahsanih. Pahkala nan Madiu 5:39. Wasaht Sises mahsanih: ‘Kumwail dehr dupungki me suwed ong emen me wia suwed ong kumwail. Ma mehmen pahn pohr uhk ni palimaun en mesomwen, a kihong pali teio pwe en pil pohr.’ Ke ese ia wehwehn dahme Sises mahsanih wasaht? Ia duwe, met wehwehki me ma emen pahn pakeri apali mesomwen, ke pahn mweidohng en pakeri pali teio?—

 Soh, kaidehn ih me Sises mahsanih wasaht. Popohr ehu sohte duwehte paker ehu. E duwehte en emen eh pahn siken uhk. Aramas men mwein pahn pohr kitail pwe kitail en peiong ih. E men kitail en lingeringerda. Ahpw ma kitail lingeringerda oh pil siken ih, dahme pahn wiawi?— Mwein kitail pahn peida.

Ahpw Sises sohte kupwurki sapwellime tohnpadahk ko en pei. Ihme kahrehda e mahsanih me ma emen pahn pohr kitail, kitail en dehr kapwure. Kitail en dehr lingeringerda oh pei. Ma kitail wia met, kitail sohte weksang irail me tapiada peio.

Ma emen pahn song en tapiada pei, dahme ke leme me pahn keieu mwahu en wia?— Iei en kohkohla. Aramaso mwein pahn pwurehng siken uhk. Ahpw mwein e pahn sohla wia met mwurin  mwo. Ahmw pahn kohkohla sang wasao sohte wehwehki me ke luwet. Ke kin kasalehda me ke kehlailki dahme pwung.

Ahpw ia duwen ma ke peiong ih oh ke kana? Dahme kakete wiawi?— Lahp me ke kemehdao kakete pwurodo oh wa ekei ienge. Re kakete doadoahngki tuhke de naip pwehn kemeiuk. Ke kilang ia kahrepen Sises eh sohte kupwurki kitail en pei?—

¹³ Dahme kitail pahn wia ma kitail kilang meteikan pei? E pahn mwahu ma kitail iangala ehu pali?— Paipel padahkihong kitail dahme pwung. Pahkala nan Lepin Padahk 26:17. E mahsanih: “Iang pidada pingiping ehu me sohte ahmwohng, rasehng omw kekeid nan ahl apwoat oh poarehng salengen kidi kommwad emen.”

Dahme pahn wiawi ma ke poarehng salengen kidi men? E sou pahn kamedekihala kidio oh e kakete song en ngalis uhk? Kidio pahn nantihong en pitla oh ke pahn anahne koledi teng, oh ma ke wia met, ehute kidio eh pahn lingeringerda. Ma ke pahn mweidala kidio, e pahn kakete ngalisuhkedi. Ahpw ia duwe, ke pahn kak kolokolete salengen kidio kohkohlahte?—

Eri, ih soangen kahpwal me kitail pahn lelohng ma kitail iang pidada pei en aramas teikan. Mwein kitail sehse ihs me tapiada peio de dahme kahrehda re pei. Mwein emen rehra kamakamda pwehki eh pirapa meteio. Ma kitail pahn sewese ih, kitail pahn sewese lipirap emen ahpw kitail sohte men wia met, kaidehn?

 Eri dahme ke pahn wia ma ke kilang pei ehu?— Ma e wiawi nan sukuhl, ke kak mwadang padahkihong ahmw sounpadahko. Oh ma e wiawi ekis wasa tohrohr, ke kak padahkihong ahmw pahpa de nohno de emen pilismen. Mehnda ma meteikan kin men pei, kitail anahne wia aramas kei me kin wiahda popohl.

Tohnpadahk mehlel kan en Sises kin wia uwen me re kak koaros pwe ren dehr pei. Ni ahl wet kitail kin kasalehda me kitail kehlailki dahme pwung. Paipel mahsanih me sapwellimen Sises tohnpadahk men “en dehr akamai. E pahn kin kadek ong aramas koaros.”​—2 Timoty 2:24.