SOUNPAHR riau dower powe, oh Sosep mihmihte nan imweteng. Sounlang dahlo manokehlahr ih. Pwong ehu Paroh auramenehda auramen riau, oh e kin wapwonki ia wehwehn met. Ke kilang duen ih memeir? Mahnda en rahno Paroh likweripene nah aramas loalokong kan koaros oh padahkiong irail me e aurameniehda. Ahpw irail koaros sohte kak padahkiong ih wehwehn ah auramen ko.

Ansouwet sounlang dahlo tamanda Sosep. Ih eri padahkiong Paroh: ‘Ni ansou me I mihmi nan imweteng mie ohl emen me kak kawehwehda wehwehn auramen.’ Paroh eri ilekila ren kahrehdo Sosep sang imweteng.

Paroh padahkiong Sosep ah auramen ko: ‘I kilang kou mworourou, lingan isimen. I pil kilang kou tihtih isimen. Oh me tihtih ko kangala me mworourou ko.’

‘Nan ai auramen kariau I kilang wahn krein mworourou isuh. I pil kilang wahn krein tierehr isuh. Oh me tierehr ko tapiadahr kadelehla wah mwahu ko.’

Sosep padahkiong Paroh: ‘Auramen riau ahniki wehweh tehieu. Kou mworourou isimen oh wahn krein mwahu isuh wehwehki sounpahr isuh, oh kou tihtih isimen oh wahn krein tierehr isuh wehwehki pil sounpahr isuh. Sounpahr isuh e pahn mie mwehimed nan Isip. Ah sounpahr isuh mwuhri lehk pahn kipehdi Isip.’

Sosep pil padahkiong Paroh: ‘Pilada ohl loalokong men en sounapwahpwali oh kihpene mwenge erein sounpahr mwahu isuh. Aramas kan eri sohte pahn duhpek nan erein sounpahr suwed isuh me pahn pwarada mwuhri, ansou me wahn mwetuwel sohte pahn wosada mwahu.’

Paroh uhdahn perenki me kasansaldao. Ih eri pilada Sosep pwen kihpene mwenge, oh nahkpene. Paroh kelehpw me lapalap sang Sosep nan Isip.

Sounpahr waluh mwuhri, ansou me lehk lelehr sahpwo, Sosep kilang ohl kei kohkohdohng Isip. Ke ese ihs irail? Irail iei rie ohl 10 me mah sang ih! Arail pahpa Seikop kadarala irail Isip pwe ren pwain kenarail pwehki sohlahr mwenge nan Kenaan. Sosep ese rie ko, ahpw irail sohte ese ih. Ke ese dahme kahrehda? Pwehki Sosep ansouwet pil ekis mahlahr, oh e kapwatki soahngen kapwat tohrohr.

Sosep eri tamanda me ni ansou me e tikitik e kin auramenehda duen rie kan ahr kin kohdo oh dairukedi mwowe. Ke tamanda me ke wadek ekis mwowe? Sosep ahpw wehwehkiehr met me Koht me kadaradihla ih Isip ong kahrepe kesempwal wet. Dahme ke lemeleme Sosep wia? Kitail pahn kilang.