DAHME kahrehda kehl en Seriko pwupwedi? Duwehte ehu pakudang laud lel. Ahpw ni ansou ko sohte pakudang; pil sohte kesik. Met pil manaman ehu sang Siohwa! Kitail sukuhliki dahme wiawi.

Rong duen me Siohwa mahsanih ong Sosua: ‘Kowe oh noumw sounpei kan en pideki kahnihmwo. Pideki kahnihmwo pak ehu, rahn ehu nan rahn wenou. Kumwail en pil wah kohpwa en inou. Samworo isimen pahn alu mwowe oh peuk neirail koronet.

‘Ni kaisuh en rahn pideki kahnihmwo pak isuh. Eri mwuhri peuk koronet ko, oh mwuhri aramas koaros en wiahki ehu weriwer en mahwin. Oh kehl en kahnihmwo pahn pwupwedi!’

Sosua oh aramas kan wiahda duen me Siohwa ketin kehkehliki. Ni arail kin pidepideki kahnihmwo, aramas kan koaros kin nennenla. Sohte emen kin koasoaia mehkot. Ihte me aramas kak rong ni arail pidepidek iei ngihl en koronet oh nehrail ko. Imwintihti kan en sapwellimen Koht aramas kan nan Seriko uhdahn masapwehkada. Ke kak kilang sahl weitahta langalang sang wanihmwtok? Ahn ihs wanihmwtok mwo? Ei, Rehap wiahdahr met duen me lipahrok riemen padahkiong ih en wia. Ih oh ah peneinei koaros mi nan ihmweo.

Kaimwisekelahn rahn isuh, mwehrin arail pideki kahnihmwo pak isuh, oh peuk koronet kan, ohl en mahwin kan wiahki ehu weriwer, kehlo ahpw pwupwedi. Sosua eri inda: ‘Kamehla aramas koaros nan kahnihmwo oh isikada. Isikada soahng koaros. Ihte silper, kohl, kopper oh mete en rikirikpene, oh mehpwukat en kohwong wasahn nahk en tehnpas en Siohwa impwal.’

Ong ohl riemen me lipahrok, Sosua inda: ‘Kohla nan ihmwen Rehap oh kahrehdo ih oh ah peneinei.’ Rehap oh ah peneinei doarehla, duwehte me lipahrok ko inoukiong liho.