KE ESE ihs ohl pwukat oh dahme irail wiewia? Irail kohkohlahng mahwin, oh ohl akan me mi mwowe kin kokoul. Ahpw ke pahn mwein idek: ‘Dahme kahrehda sounkoul ko sohte wah kedlas oh mehn dok kan pwe ren peiki?’ Kitail pahn kilang.

Sehosapad iei nanmwahrki en kainok riau en wehin Israel. E memour ni ansou me Nanmwahrki Ehap oh Sesepel kakaun wehin kainok eisek en paliepeng. Ahpw Sehosapad nanmwahrki mwahu men, oh seme Asa pil emen nanmwahrki mwahu. Eri pahr tohto aramas akan en wehin kainok riau en palieir kin ahniki mour insenamwahu.

Ahpw met mehkot wiawiehr me aramas kan masapwehkadahr. Soun wah rohng kairehki Sehosapad: ‘Karis en sounpei laud ehu kohkohdo sang Moap, Ammon oh Dohl en Seir pwen peiong uhk.’ Mehn Israel kan tohto pokonpene nan Serusalem pwen rapahki sawas sang rehn Siohwa. Irail kohla nan ihmwen kaudoko, oh wasao Sehosapad kapakap: ‘Maing Siohwa aht Koht, se sehsehlahr dahme se pahn wia. Sohlahr sewespaht en pelian karis en sounpei laudo. Se patohdo rehmwi pwen rapahki sawas.’

Siohwa rong, oh e poronehla emen sapwellime ladu pwen padahkiong aramas kan: ‘Mahwino kaidehn omwail, ahpw sapwellimen Koht. Kumwail sohte pahn pei. Kumwail pahn kilang, oh kadehde duen Siohwa pahn doarehla kumwail.’

Mahnda en rahno Sehosapad padahkiong nah aramas kan: ‘Liki Siohwa!’ Ih eri kosonneong sounkoul kei mwohn nah sounpei kan, eri ni arail karis kohkohla, irail kokoul kapinga Siohwa. Ke ese dahme wiawi ni ansou me irail kerenlahng wasahn mahwino? Siohwa kahreong sounpei imwintihti kan en peipene nanpwungarail. Oh ni ansou me mehn Israel kan lel wasao, sounpei en irail imwintihti kan koaros mehlahr!

E soh uhdahn loalokong me Sehosapad wiahda ni ah liki Siohwa? Kitail pahn pil loalokong ma kitail liki Ih.