KILANG Samuel wudekiong leh pohn mwoangen ohlo. Ih soahng me irail kin wiaiong emen pwen kasalehda me e pilipilda ong nanmwahrki. Siohwa padahkiong Samuel en wudekihdi leh pohn mwoangen Saul. Leho ehu soahngen leh pwohmwahu.

Saul sohte lemeleme me e itar ong wia nanmwahrki. ‘I kisehn kainok en Pensamin, kainok me keieu tikitik nan Israel,’ e indaiong Samuel. ‘Dahme kahrehda ke inda me I en nanmwahrki?’ Siohwa mwahuki Saul pwehki e sohte mwomwehda me e lapalap oh kesempwal. Ihme kahrehda e pilada ih en nanmwahrki.

Ahpw Saul kaidehn emen me semwehmwe de aramas mwahl. E kohsang peneinei kapwehpwe ehu, oh e inenen masamwahu, reirei. E pil reireiki sang aramas en Israel koaros piht ehu! Saul pil marahra, oh inenen kehlail. Aramas kan eri perenkihda pwe Siohwa ketin piladahr Saul pwen wia arail nanmwahrki. Irail eri ngisingiski: ‘Nanmwahrki en mour werei!’

Imwintihti kan en Israel pil inenen kehlail. Irail wiahda soahngen kahpwal tohto ong mehn Israel kan. Mwehrin Saul nanmwahrkihla, mehn Ammon kohdo pwen peiong irail. Ahpw Saul kihpene karis en sounpei laud ehu, oh kohla mahwin oh kalowehdi mehn Ammon kan. Met pil kahreong aramas kan en peren pwehki Saul me arail nanmwahrki.

Sounpahr kei dower powe, Saul kin kahluwa mehn Israel kan ong mahwin oh kana tohto pohn arail imwintihti kan. Pil mie nain Saul pwutak kommwad men me adaneki Sonadan. Oh Sonadan pil sewese mehn Israel kan kana nan mahwin tohto. Mehn Pilisdihn kan me imwintihti keieu suwed ong mehn Israel kan. Rahn ehu mehn Pilisdihn kid kid kei kohdo pwen mahwiniong mehn Israel.

Samuel padahkiong Saul en awih lao e pwurohdo oh wiahda meirong, de kisakis, ong Siohwa. Ahpw Samuel me ekis pwand en kohdo. Saul masakada me mwein mehn Pilisdihn kan pahn tapiada mahwin, ih eri tiehngala mwowe oh pein wia meirong. Ni ansou me Samuel leldo, e padahkiong Saul me e sapeik. ‘Siohwa pahn pilada emen aramas tohrohr pwen nanmwahrki pohn Israel,’ Samuel inda.

Mwuhri Saul pil pwurehng sapeik. Samuel eri padahkiong ih: ‘E mwahu en peikiong Siohwa sang ahmw pahn patohan ong ih kisakis ki sihpw me keieu mwahu. Pwehki ke sohte peikiong Siohwa, Siohwa sohte pahn mweidong uhk en nanmwahrki pohn Israel.’

Kitail kak sukuhliki sang ire wet padahk mwahu tohto. E kasaleong kitail me inenen kesempwal en peikiong Siohwa ansou koaros. E pil kasaleong kitail me aramas mwahu, duwehte Saul, kak wekidekila oh wiahla aramas suwed men. Kitail sohte men wiahla aramas suwed, kaidehn?