NANMWAHRKI Nepukadnesar alesang irail mehn Israel kan me sukuhl laud oh wahla Papilon. Mwuhri nanmwahrkio pil pilada sang nanpwungarail pwutak kan me keieu masamwahu oh loalokong. Pahmen sang nanpwungen irail pwukat iei pwutak kan me ke kilang wasaht. Emen Daniel, oh me silimen teiko mehn Papilon kahdaneki Sadrak, Mesak oh Apedneko.

Ahn Nepukadnesar pilahn iei en kaianiehda mwanakapw kan pwe ren doadoahk nan ah wehi. Mwehrin sounpahr siluh en arail kin wia kaiahn e pahn pilada me keieu loalokong rehrail pwen sewese ih kosonnedi ire kahpwal akan. Nanmwahrkio mwahuki pwutak ko en kehlail oh roson mwahu ni ansou me re kin wia kakaiahn. Ihme kahrehda e kehkehlikiong nah ladu kan en kihong mwanakapw ko soahngen mwenge oh wain kasehlel me pein ih oh ah peneinei kin kang.

Kilang Daniel. Ke ese dahme e indindaiong kaun en ladu kan en Nepukadnesar me adaneki Aspenas? Daniel indaiong ih me e sohte mwahuki kang mwenge kan me e wahdo sang ni tehpel en nanmwahrkio. Ahpw Aspenas pahtouki met. ‘Nanmwahkio kosonnediehr me kumwail en kang oh nim,’ e inda. ‘Oh ma kumwail sohte pahn roson mwahu duwehte mwanakapw teikan, e pahn kameiehla.’

Daniel eri kohieila rehn sounapwali me Aspenas idihada pwen apwahpwali ih oh kiseh me silimen ko. ‘Menlau kasonge kiht mahs erein rahn 10,’ e inda. ‘Kihong kiht wahn tuhke oh pihlte sen nim. Eri kapahrekipene kiht oh mwanakapw teikan me kang mwenge kan sang ni tehpel en nanmwahrkio, oh kilang ihs me roson mwahu.’

Sounapwalio pwungki met. Oh ni en rahn 10 nekiehr, Daniel oh kiseh me silimen ko uhdahn ahniki paliwar mwahu sang mehteikan. Ihme sounapwalio eri mweidong irail en kangete wahn tuhke oh kaidehn mehkan me kohsang ni tehpel en nanmwahrkio.

Ni imwin sounpahr siluh mwanakapw kan koaros kohla mwohn Nepukadnesar. Mwehrin ah koasoaiong irail koaros, nanmwahrkio diarada me Daniel oh kiseh me silimen ko me keieu loalokong. Ih eri doadoahngki irail ni ihmwen nanmwahrkio. Oh ni ansou me nanmwahrkio idek rehn Daniel, Sadrak, Mesak oh Apedneko peidek kan de kosonnepen kahpwal kan irail ese laud pak 10 sang nah samworo ko de ohl loalokong kan koaros.