KE ESE dahme kahrehda ohl menet kapakapki ong Siohwa? Dahme kahrehda e pwilikihdi kisin likou pwukat mwohn pehi sarawi en Siohwa? Ohlo iei Esekaia. Ih me nanmwahrki en kainok riau palieir en Israel. Oh ohl menet mi nan ansou apwal. Pwehkida?

Pwehki karis en sounpei en Assiria kawehlahr kainok eisek en paliepeng. Siohwa mweidong met en wiawi pwehki aramas akan suwed. Oh ansouwet mehn Assiria kan kin kohdo peiong kainok riau en wehin Israel.

Nanmwahrki en Assiria ahpwtehn kadarala kisin likou kan ong Nanmwahrki Esekaia. Iei kisin likou pwukat me Esekaia pwilikihdi mwohn Koht. Kisin likou ko kin kapailoke Siohwa, oh padahkiong Esekaia en peki mahk. Ihme kahrehda Esekaia kapakap: ‘Maing Siohwa, doare kiht sang nanmwahrki en Assiria. Eri wehi kan koaros pahn ese me komwi kelehpw Koht.’ Siohwa pahn rong Esekaia?

Esekaia nanmwahrki mwahu men. E sohte wia soahng suwed kan me nanmwahrki kan en kainok eisek en wehin Israel wia, de pil duwehte seme suwed Nanmwahrki Eihas. Esekaia kin kanahieng ah kapwaiada kosonned kan en Siohwa koaros. Ihme, mwehrin Esekaia kaimwisekelahr ah kapakap, soukohp Aiseia kadarala rohng sang rehn Siohwa, ketihtiki: ‘Nanmwahrki en Assiria sohte pahn pidelong nan Serusalem. Sohte emen nah sounpei ko pahn kohdo kereniong. Irail sohte pahn pil kesikih apwoat arep ong kahnihmwo.’

Kilang kilel wet nan pali wet. Ke ese ihs sounpei pwukat me mehlahr? Irail sounpei en Assiria. Siohwa poronehla emen tohnleng, oh ni pwong tehieu tohnlengo kamehla me 185,000 sounpei en Assiria. Pwehki met nanmwahrki en Assiria peki mahkehr oh pwurala nan sahpwe.

Kainok riau en wehin Israel kamourala, oh aramas kan pil pwurehng ahniki meleilei ong ansoukis. Ahpw mwehrin Esekaia mehla nah pwutak Manaseh uhd wiliandi ih nanmwahrki. Manaseh oh nah pwutak Amon ira koaros wia nanmwahrki suwed. Sahpwo eri pwurehng direkihlahr mwersuwed oh pepei. Ni ansou me nain Nanmwahrki Amon ladu kamehla ih, nah pwutak Sosaia kasapwilda nanmwahrki en kainok riau en Israel.