KE ESE dahme kisin serepeino koasokoasoaia? E padapadahkiong liho duen soukohp Elaisa, oh me kapwuriamwei kan me Siohwa sewesekin ih en wia. Liho sohte ese duen Siohwa pwehki ih kaidehn mehn Israel men. Kitail pahn kilang dahme kahrehda kisin serepeino mih nan ihmwen liho.

Liho iei mehn Siria. Ah pwoud adaneki Naaman, kaun en sounpei en mehn Siria kan. Mehn Siria kan parokediehr kisin serepein menet, oh wahihdohng ahn Naaman pwoud pwen wia ah lidu.

Naaman soumwahukihda ehu soumwahu suwed me adaneki tukotuk. Soumwahu wet kak kahreong uduk en emen en pwupwsang. Eri ihme serepeino padahkiong ahn Naaman pwoudo: ‘I men ai soumwas en kohla rehn soukohp en Siohwa nan Israel. E pahn kamwahuiala ah soumwahu tukotuk.’ Mwuhri re padahkiong ahn liho ah pwoud.

Naaman uhdahn men mwahula; ih eri kosonnedi me e pahn kohla Israel. Ni ah lela wasao, e kohieila ni ihmwen Elaisa. Elaisa ilakih nah ladu en indahng Naaman en kohla nan Pillap Sordan oh duhdu pak isuh. Met kahreong Naaman en mwakarada, oh inda: ‘Mie pillap ai wasa mwahu sang pihl en Israel koaros!’ Mwehrin ah inda met, Naaman eri mweselwei.

Ahpw emen nah ladu ko indaiong ih: ‘Maing, ma Elaisa pahn padahkiong uhk en wia mehkot apwal, ke pahn wiahda. Eri dahme kahrehda ke sohte kak wia ni ah inda ken duhdu?’ Naaman rong kaweid en nah ladu oh kohla duhdu nan Pillap Sordan pak isuh. Ni ah wia met, e kilang me kili ko medendela oh mwahulahr!

Naaman inenen perenkihda met. Ih eri pwurohdo rehn Elaisa oh indahng ih: ‘Met I eseiehr ni mehlel me Koht en Israel ihte Koht mehlel nan sampah pwon. Ihme, menlau, alehda kisakis pwukat sang ie.’ Ahpw Elaisa sapeng: ‘Soh, I sohte kak alehda.’ Elaisa ese me sapwung en alehda kisakis, pwehki Siohwa me kahreong Naaman en mwahula. Ahpw nain Elaisa ladu Kehasai noarokehda kisakis ko.

Ihme iet me Kehasai wia. Mwehrin Naaman mweselwei, Kehasai tang mwuhri lao e leldo reh. ‘Elaisa ilakiehdo pwen padahkiong uhk me e mwahuki ekei kisakis kan pwe mie kompoakpah kan me ahpwtehn leldo,’ Kehasai indahda. Met kitail ese me likamw. Ahpw Naaman sohte ese me met likamw ehu; ih eri kihong Kehasai ekei dipwisou ko.

Ni ansou me Kehasai pwurohdo, Elaisa ese dahme wiawiehr. Siohwa kaesehkin ih. Ih eri inda: ‘Pwehki ke wia me suwed wet, soumwahu me mih rehn Naaman pahn pil mihla rehmw.’ Oh met pweidahr, ansouohte!

Dahme kitail sukuhliki sang padahk wet? Keieu, kitail en duwehte kisin serepeino oh koasoaia duen Siohwa. E pahn kahrehda soahng mwahu tohto. Kariau, kitail en dehr aklapalap duwehte me Naaman wia ni tapio, ahpw kitail en peikiong ladu kan en Siohwa. Oh kasiluh, kitail en dehr likamw duwehte me Kehasai wia. Kaidehn mehlel kitail sukuhliki soahng tohto ni atail kin wadek Paipel?