MWEHRIN Depit tapiadahr kaunda sang kahnihmwen Serusalem, Siohwa ketikihong nah sounpei kan kana tohto pohn arail imwintihti kan. Siohwa inoukihdiehr me e pahn ketikihong mehn Israel kan sahpwen Kenaan. Eri met, ki sawas sang rehn Siohwa, sahpw ko koaros me inoupe wiawiehr lohdi oh irail sapwanekihlahr.

Depit kaun mwahu men. E poakong Siohwa. Ihme kahrehda keieu en mehkan me e wia mwehrin ah kalowehdi Serusalem iei ah wahdo sapwellimen Siohwa kohpwa en inou wasao. Oh e mwahuki kauwada ihmwen kaudok oh pwilikihdi kohpwa en inou loale.

Ni ansou me Depit mahla, e wiahdahr sapwung suwed ehu. Depit ese me e sapwung emen en alehda mehkot me kaidehn ah. Ahpw ehu ni soutik, ni ah mi pohn kadoken ihmwe, e kilangdi oh kilang emen lih kasehlel. Eden liho Padsihpa, oh ah pwoud emen nain Depit sounpei me adaneki Uraiah.

Depit uhdahn inengieng Padsihpa laud, ih eri ilekla ren kahrehdo liho nan ihmwe. Ahn lih menet pwoud kin iang mahwin saikinte pwurohdo. Eri, Depit wendi rehn lih menet oh mwuhri liho diarada me e liseian. Depit eri pwunodkihda oh kadarala lokaia ong nah kaun en sounpei Sowap en kadarala Uraiah mwohn mahwino pwen kamakamala. Uraiah eri mehla oh Depit pwoudkihda Padsihpa.

Siohwa engiengkihda me Depit wia. Ih eri poronehla sapwellime soukohp Nedan en padahkiong Depit duen dihp me e wiahdahr. Ke kak kilang Nedan koasokoasoaiong Depit. Depit koluhkihla mehlel me e wiahda, oh ihme kahrehda Siohwa sohte kamehla ih. Ahpw Siohwa mahsanih: ‘Pwehki ke wiahdahr me suwed pwukat, ke pahn ahniki soahngen kahpwal tohto nan ihmwomw.’ Oh soahngen kahpwal laud me Depit ahniki!

Keieu, nain Padsihpa pwutako mehla. Mwuhri nain Depit mesenih wiahda tiahk suwed rehn rie serepein Tamar oh wendi reh. Pil nain Depit pwutak Apsalom mwakarkihda duen met oh kamehla Amnon. Mwuhri, aramas tohto iangala Apsalom oh Apsalom pein kasapwilada ih nanmwahrki. Ni kaimwisekelahn met, Depit kana ni ah mahwiniong Apsalom, oh Apsalom kamakamala. Ei, Depit lelohngehr kahpwal tohto.

Nan ansou me mehpwukat kin wiawi, Padsihpa kaipwidi emen pwutak me adaneki Solomon. Ni ansou me Depit mahlahr oh soumwahudahr, nah pwutak Adonaisah song en pein kasapwilada ih nanmwahrki. Ansouo Depit likwerido samworo Sadok pwen wudekiong leh pohn mwoangen Solomon pwen kasalehda me Solomon pahn nanmwahrki. Mwuhri ekis Depit mehla ni ah mahkiehr sounpahr 70. E kin kakaun Israel duen nanmwahrki men erein sounpahr 40, ahpw met Solomon uhd wiahlahr nanmahrki en Israel.