MIE en Noah pwoud oh nah pwutak silimen. Eden nah pwutak ko iei Sem, Am oh Saped. Nah pwutak ko koaros pil mie arail pwoud. Irail koaros peneinei en Noah me walemen.

Koht kosonnediehr Noah en wia mehkot kapwuriamwei. E padahkiong Noah en kauwada ehu warihmw. E duwehte sohp laud pwoat, ahpw mwomweo duwehte kohpwa ehu. ‘Wiahda en posoke siluh,’ Koht mahsanih, ‘oh wiaiong pere kan loale.’ Pere pwukat wiawihda ong Noah oh ah peneinei, mahn akan, oh mwenge kan.

Koht pil padahkiong Noah en wiahda warihmwo pwe en dehr pwilipwil. Koht mahsanih: ‘I pahn kadaralahng sampah pihl kalaimwun pwen kawehla sampah pwon. Koaros me sohte mi nan warihmwo pahn mehla.’

Noah oh nah pwutak kan peikiong Siohwa oh tapiadahr kauw warihmwo. Ahpw mehteikan kouruhrki. Irail kin wia me suwed. Aramas kan sohte kamehlele Noah ansou me e kin padahkiong irail dahme Koht pahn wia.

Ansou werei anahn ong kauwada warihmwo pwehki e inenen laud. Kadekadeo, mwehrin sounpahr ngeder, e nekier. Met Koht padahkiong Noah en wahdo mahn akan ong nan warihmwo. Koht mahsanih me emen lih oh emen ohl en kohsang ni soahngen mahn koaros. Ahpw sang ekei Koht padahkiong Noah en wahdo wad isimen. Koht pil padahkiong Noah en kihlohng soahngen menpihr koaros. Noah wia duwehte me Siohwa mahsaniehr.

Mwuhri, Noah oh ah peneinei pil pidelong nan warihmwo. Koht eri ritingihdi wanihmwo. Irail ahpw mihmi awiawih. Medewela ma kowe mi nan warihmwo iang irail, awiawih. Mehlel me pahn mie nohlik ehu duwehte me Siohwa mahsanih?