KILANG! Sohpo uhdahn lelohng apwal! Ilok ko poakipesang! Ke kak kilang aramas kan me lusdihlahr nan sehd? Ekei doudahr pohn oaroahr. Ohlo iei Paul? Kitail pahn kilang dahme wiawiong ih.

Tamataman, sounpahr riau Paul kin sensel nan imweteng Siseria. Eri ih oh ekei me selidi kan kohwong nan apwoat sohp, oh tapiada seiloklahng Rom. Ni arail kerenih oh daulih deke en Krihd, melimel ehu lel irail. Kisinieng me nohn uk kahrehda irail sohlahr kak ilihli sohpo. Oh irail pil sohte kak kilang ketipin ni rahn de usu kan ni pwong. Mwehrin rahn tohto, irail kan me mi pohn sohpo sohlahr arail koapwoaropwoar me irail pahn mourala.

Paul eri kesihnenda oh indahda: ‘Sohte emen rehmwail pahn mehla; sohpet kelehpw pahn ohla. Pwe pwohng emen tohnleng en Koht pwaradohng ie oh inda, “Ke dehr masak, Paul! Ke pahn kesihnenda mwohn kaun en Rom Sihser. Oh Koht pahn doarehla koaros me iang uhk.”’

Ni luhkepen pwong en rahn kaeisek pahieu mwehrin melimelo tapida, seilor ko diarada me wasao pedepedlahr! Pwehki irail masakada me re pahn lel takai ni rotorot, irail eri kasehdi ankor. Ni menseng en rahn mwuhri irail diarada dahu ehu. Irail eri song en tangakihla sohpo ong ni oaroahr.

Eri ni arail kerenlahng oaroahr, sohpo sereda wasakis me pedeped oh tengala. Ilok ko eri tapiada pwupwedi ong ni sohpo, oh sohpo tapiada mwerpesang. Kaun en sounpei me apwahpwali irail eri inda: ‘Kumwail koaros me kak pampap lusdihla nan sehd oh papdahla ni oaroahr. Kumwail teikan lusdi mwuhrirail oh papki lepin tuhke kan sang ni sohpet.’ Oh ihme irail wia. Ni wiewia wet koaros me 276 me mi pohn sohpo lela ni oaroahr oh mourala, duwehte me tohnlengo inoukihdi.

Deke me re sereda ie ede Malda. Aramas en wasao me inenen kadek, oh re apwahpwali irail tohn sohpo. Ni ansou me iren lahng mwahula, Paul pil kohwong nan apwoat sohp oh iangala kohla Rom.